Tuesday, November 8, 2011

طُز

طز في الأكل.. مش سهل تقول الجملة دي.. الأكل حاجة حلوة وبيبقى أحلى لما تعمل ريجيم عشان تخس!.. بيبقى أحلى لما تتمنع عنك أنواع معينة من الأكل لأسباب صحية أو لتدريبات رياضية معينة أو لأي سبب.. أنا حاليا بأحاول أخس حوالي 3 كيلو ونص.. يمكن مايبانش عليّ لكن طبعا مش شايف حواليّ غير شوكولاتات ومكرونة ورز وكشري وساندويتشات :).. ومع إني بطبعي مش أكّيل خالص.. لكن غالبا أي حد بيتحول لأكّيل لما بيعمل ريجيم..

بالمناسبة كلمة "طز" مش بعيدة عن الأكل! "طز" هي كلمة  أصلها تركي ومعناها "ملح"!

بيقال إن الحكومة العثمانية كانت بتفرض ضرايب على كل التجار اللي داخلين ببضايعهم ما عدا الملح (الطز) فالتجار العرب لما كانوا بيعدوا من قدّام المفتشين الأتراك ويسألوهم عن البضاعة اللي معاهم كان الرد: طز (يعني ملح).. وبكده التاجر مش بيدفع ضريبة.. وبكده الكلمة فضلت تستخدم لحد ماوصلت لمعنى "انت مالكش حاجة عندي".. :)

ومن الظريف إن آخر كام شهر كده  كان فيه مناقشات كتير (على تويتر ساعات وفي ندوات مختلفة أو على فيسبوك.. أو بين أصحاب على القهوة) عن فكرة الشتايم..

هي الشتايم حرام؟ هو فيه شتيمة معينة حرام وشتيمة تانية عادي؟ هو لو أنا وصفت حضرتك بإنك كلب أحسن من إني أوصف السيد الوالد بنفس الوصف؟..

وطبعا هنا المبادئ بتظهر.. والمبادئ دي غالبا مالهاش أي مرجعية.. فتلاقي واحد يقوللك.. "تشتم بالعيلة لأ".. أو "الأب ماشي.. الأم لأ"... "ماتشتمش قدّام بنات".. "إوعى تسب أي معتقد ديني".. "ماتشتمش حد عشان حاجة فيه لكن ممكن عشان حاجة عملها".. "اللي مش بيحب الشتيمة مايقراش كلامي".."مادام الشتيمة مكتوبة بس مش متقالة.. يبقى مافيش مشكلة".. "الشتيمة موجودة في المجتمع ولازم التيليفزيون والوسائل المختلفة تنقل ده عادي وإلا نبقى بنضحك على نفسنا".. وغيرها من الآراء اللي بتنال احترامي لسبب تمسّك صاحبها بمبدأ (على الرغم من اختلافي مع المبدأ في حد ذاته في حاجات كتير)..

إيه اللي بيخللي الشتيمة مستفزة؟ إيه اللي بيخللينا نحس إن "لأ.. الشتيمة بتلزق!" و بنحس إن حتى لو الشتيمة هتلف تلف وترجع لصاحبها "أنا مش عايز الشتيمة تعدّي عليّ"؟

ليه ساعات بنلاقي ناس أصحاب قوي كل ما يتصاحبوا أكتر كل ما المفردات بتاعة الشتايم تبقى أعمق وأكثر إبداعاً؟ وتلاقي الواحد بيتشتم ومبسوط؟

على الرغم إن ناس مننا بيقضوا وقت طويل في وضع لستة افتراضية من الشتايم المسموح بيها ولستة تانية من شتايم غير مقبولة إلا إني شايف حكاية الشتايم من منظور مختلف شوية..

الفكرة مش في اللفظ.. مش في الكلمة اللي بأقولها.. الفكرة في التوجّة اللي ورا الكلمة دي.. أنا عايز أهينك.. عايز أحسسك إن قيمتك قليلة.. عايز أشبهك بحاجة أقل من البني آدم.. عايز أضايقك بإهانتي ليك أو لعيلتك أو لبلدك أو لديانتك أو لشغلك أو لشكلك..

وقتها اللفظ نفسه مش هيفرق.. ولو موجّة ليك أو لوالدك مش فارق كتير.. وكلنا عارفين إن على الرغم إن قدراتنا محدودة في إننا "نسمع" أكتر من مجرد كلام إلا إن الخالق سبحانه عارف اللي جوايا.. سامع لاتجاه قلبي وذهني لما بأقوللك مجرد كلمات..

وقتها لما بأقول "طز" لحد هل فارق إن أصل الكلمة مش شتيمة؟ وللا أنا قلتله حرفين فيهم الإهانة المطلوبة؟ وقتها لو قلت طز في الأكل القصد مفهوم..
أعرف ناس كتير بتشتم وتهين من غير شتايم بكلام.. الشتيمة ممكن تكون ببصّة أو بتعبير على الوش.. أو في السلام.. أو في نغمة الصوت..أو حتى بكلاكس عربية!

"لا تشتم الأصم".. تخيّل؟ طب ما الأصم مش هيسمع.. ماشي لكن الفكرة في الرغبة في الإهانة.. هي دي اللي أنا محتاج أراجعها جوايا..

معقولة أشتمك واحنا أصحاب؟ معقولة أشتمك وأنا شايف فيك حد مخلوق بأحسن صورة؟ معقولة أحاول أهينك وأنا عارف قيمتك؟
مش ممكن.. ده احنا بيننا عيش وطز!

18 comments:

  1. نفسي أعرف بتجيب الأفكار الرئاعة دي منين ) . الشتيمة في كل الأحوال الناس بتاخدها بمعتقد ان اللي يقولها يبقي غير محترم . وبردة مش المفروض نشتم اي حد وفي اي موقف ... وعندك حق جدا ف موضوا اني ممكن اهين واحد من غير ما اتكلم معاة اصلا من خلال نظرتي لية او طريقة تعاملي معاة

    ReplyDelete
  2. طز ف أي حد بيشتم و مش عارف يبقي متحضر و بجد أحييك علي فكرة مقالتك...شابو!

    ReplyDelete
  3. المُشكلة ان ودنك تتأذي انك سمعت لفظ
    مش فاهمه بس حاسس انه خارج
    او حتي شتيمه!
    الناس ليها مُعتقد ان الشتيمة بتوضح أد إيه هو مواكب الشتايم
    و عصري
    =D

    ReplyDelete
  4. دي اول حاجة اقرها ليك بس انت برنس =)

    ReplyDelete
  5. Fantastic article as usual... What you said is true, all true.... God Bless

    ReplyDelete
  6. جميلة قوي يا ماجد ، يعني ممكن نقول إننا طز العالم ، أرجوا الإفاده
    بس بجد حلوه قوي

    ReplyDelete
  7. مقال جميل كالعادة , مش مهم اللفظ المهم النية , يعنى لو واحد صحبى قوى قالى أنت فين يا كذا هضحك ولكن لو نفس الكلمة قلهالى مديرى همسكه أضربه و أقدم أستقلتى

    ReplyDelete
  8. حلو اوي الطز .. قصدي البوست ده ... توأ مقصدش

    ReplyDelete
  9. بقدر أفهم الشتيمة لقلة الحيلة للرغبة فى رد صفعة والامكانيات البدنية مثلا لا تسمح بأفهمها لما يعجز الفرد عن صياغة غضبه في ألفاظ وعبارات مناسبة بأفهمها لما سرعة وحدة الخلاف تفقدك القدرة على ممارسة الضبط الانفعالي العقلانى لكن مش بفهمها خالص ومحتاجة مساعدة علشان أفهمها لما تبقى هزار ورواشة وخفة دم و وسيلة للاضحاك .
    Thank u Maged
    Joanna

    ReplyDelete
  10. ليس المؤمن بالطعان ولا اللعان ولا الفاحش ولا البذيء:)

    ReplyDelete
  11. المقاله حلوه طبعا
    بس انا مش عايز اعلق عليها
    عايز اعلق عليك انت يا ماجد
    :)
    من الاخر انت انسان راع بمعنى الكلمه
    بتحول توصل لمعاني جميله جدا بكلمات قليله .. او افعال بسيطه
    و الدليل لعبة السمك الي انت حاططها في المدونه هنا
    مع بساطتها الشديده .. بس بشوف فيها شي جميل جدا
    بيعبر عنك
    انك بتحاول تساعد .. ولو بشيء بسيط جدا .. لان الاشياء البسيطه .. حتى لو كانت مجرد فكره ... ممكن تريح الانسان نفسيا جدا
    شكرا ليك يا ماجد و شكرا لصداقتك

    ReplyDelete
  12. جميل :)

    حتة أن كل ما الناس يبقوا اصحاب أكتر يشتموا بغعض أعمق دى واقعية جدا وبجد مش قادرة اقهمها !
    أنا اشكر ربنا على اصحابى أننا كل يوم بتحترم بعض أكتر وأكتر رغم أننا اصحاب من ابتدائى بس دا ماخلناش ندخل مرحلة الضرب بالمطاوى ورش مية النار ..

    لكن بلاقى بنات بيشتموا بعض شتايم بذيئة جدا ولما استغرب ألاقى رد "لأ ، أصل إحنا صحاب قوى" !!

    وواحدة تانى بقولها فلان بيكتب حلو قوى بس بيكتب شتايم خارجة كتير
    قالتلى أيوة أصله مثقف كبير قوى !!!
    بقى مقياس الثقافة بكام كيلو شتايم
    :S

    keep writing plz :)

    ReplyDelete
  13. Raaaaaaaaa2e3a !!!! Inta mobde3 .Afkaarak 3ameeqa and at the same time written be taree2a salisa w moshawweqa..Fantastic .Thanks ya Maged . N

    ReplyDelete
  14. فكرنى موضوع التاجر اللى بيقول طز علشان ما يدفعش ضريبة بالفلاح اللى كان كان بيقول كوسة على باب السوق علشان يدخل الاول. يحكى إنه زمان كان الفلاحين يجمعوا محصول الخضار من أراضهم ومن بدرى جدا يجرو على المدينة بسرعة علشان يلحقوا يدخلوا السوق وبيبعو الخضار قيل ما يدبل ولا يجراله حاجه (ماهو لسه ما كانش فيه تعبئة ولا تغليف ولا تجميد). المهم كان كل الفلاحين بيقفوا بالطوابير على باب السوق علشان يدخلوا ما عدا اللى جامعين كوسة ودا لان الكوسة بتدبل بسرعة وممكن تعفن وما ينفعش تتباع خاصة فى الجو الحر. وحرصاً من الحراس اللى واقفين على باب السوق إن الخضار ما يبوظش كان الحراس يسألوا الفلاحين الاول إنت معاك إيه؟ والفلاح اللى يقول معايا كوسة كان طبعا يدخل الاول . ومن هنا جات "الكوسة" بمعناها اللى بقى معروف دلوقتى. ميرسى يا ماجد على الكوسة.... ياووووو قصدى على الطز...... ياااااااااوووو قصدى على المقال

    ReplyDelete
  15. من فترة قريت لكاتب بحترم تفكيره .. مقال عن الشتيمة
    ملخصه كان بيقول
    ان الشتيمة موروث ثقافى !
    وانها حرية شخصية طالما مش بتأذى حد .. ولو فعلا بتأذى الشخص اللى بيسمعها نفسيا ..
    يبقى يثبت الأذى النفسى اللى وقع عليه
    !!!!!!!!!!

    ودى كانت أكتر مقالة سخيفة أقرأهاله .

    ع المستوى الشخصى ..
    أنا متربتش على انى اشتم ولا على انى اسمعها .. أبدا !
    بس _ آسفة على اللفظ _ بقيت بحتقر اى حد بسمعه بيشتم
    مهما كانت اسبابه أو مبرراته .

    .....
    البلوج دى شدانى جدا وبتابع بس من فترة صغيرة
    عجبنى فى تعريف حضرتك لنفسك
    حبك للغات والترجمة _ مجال دراستى حاليا _ وكمان تعدد مواهبك وهواياتك .

    أنا فعلا استمتعت .. شكرا ليك : )

    ReplyDelete
  16. الشتيمة:أضعف الكلمات و لا تستحق قيمة حروفها...وفي رأيي هي دليل قصور في اللغةو غالباً بتكون دليل عدم القدرة علي مواصلة الحوار عند الاختلاف أو التناقض في الرأي...أما استخدامها في المزاح بين الأصدقاء فلا تعليق!تدوينة رائعة وموضوع مهم فعلاً

    ReplyDelete
  17. الله ينور عليك

    ReplyDelete
  18. انا مقنعه جداااااااا بكلام حضرتك يا د . ماجد
    بس انا اللي بساله
    مش المفروض اني مقولش الفاظ غلط اصلا ؟
    يعني مثلا مع اصحابي بنحهز مع بعض بكلمه يا هبله يا مجنونه
    الفاظ من دي يعني ..........بس اوقات كتير بحس ان ده كمان غلط اني ااقولها
    راي حضرتك ايه ؟؟؟؟

    ReplyDelete