Friday, July 29, 2011

مش عايز أبقى أبو قردان

أبو قردان صديق الفلاح! صح؟ مش علمونا كده؟ ليه بقى؟ أصل قال إيه أبو قردان بيساعد الفلاح ومش بيضره..بينقيله كل الحاجات اللي ممكن تضر المحصول..يبقى صديقه ولا لأ؟ لأ طبعا!! وألف لأ!
أنا أفهم إن أبو قردان يبقى صديق الفلاح لما الفلاح يبقى صديق أبو قردان!! الصداقة اللي طرف فيها مبسوط بوجود الآخر لأنه بيفيده أو يحميه أو يوفرله..هي صداقة أبو قردان..
اللغة بتاعتنا بتنقل مفاهيم كتير من غير ما نحس.. ساعات اللغة نفسها بتأثر في نظرتنا للمواقف..وساعات ثقافتنا وتاريخنا بيأثروا في اللغة ويؤدوا لتغيرها..
المهم.. تعالوا نشوف إيه تاني غير حكاية أبو قردان صديق الفلاح..جمل وتعبيرات تورينا نظرتنا للصداقة والأصحاب عاملة إزاي!
لو مش موافق على الجمل دي..فكر بنفسك إيه هي الصداقة!
فلان صاحب عيا! وصحوبية العيا غالبا بترجع لفكرة إن العيا وراه وراه..ملازمه طول الوقت! واللي أعتقده هو إن مش شرط الصداقة تكون كده..صاحبك مش شرط يكون الشخص اللي على طول بتخرج معاه أو بتشوفه..
فلان صاحب أطيان وعمارات! حاجة تقرف (على رأيي)!ومعنى الجملة إن الأطيان والعمارات بتاعته! ياترى توافق إن علاقات الصداقة تكون انت فيها بتمتلك صاحبك؟ تكوني بتتحكمي في صديقتك؟ أكون بأحس إن فلان ملكي؟
فلان هو صاحب الفكرة! هو اللي عملها..خلقها..لولاه الفكرة ماكانتش موجودة! مين يوافق يكون هو محور حياة شخص تاني؟ ومين يوافق إنه يفضل يدور في فلك حد تاني ويكون مجرد فكرة في حياته؟
دور في فلك اللي عملك..اللي خلقك..خللي مركز حياتك الله سبحانه مش حد تاني..
وارفض إنك تدخل في علاقة ممكن يسموها صداقة لو حد من الأطراف مجرد فكرة..أو أطيان وعمارات..أو عيا..
وبالنسبة لأبو قردان فمن أظرف التشبيهات اللي سمعتها: فلان عامل زي أبو قردان..أبيض وغتت!
 أكيد مش عايز تبقى أبو قردان!

Monday, July 18, 2011

صاحبي حلقلي


أحلى حاجة في الصداقة إنك تقدر تتريق على نفسك من غير ماتتضايق.. وتلاقي أصحابك بيضحكوا معاك مش عليك وماحدش فيهم متضايق :).. كان يوم جميل النهاردة مع الأصحاب وكان تتويج المتعة إننا قررنا -كلنا- إني محتاج أقص شعري..كان فيه شوية شعر زيادة كده وباين إني محتاج أحلقه في أقرب فرصة...
هُمة الحقيقة شافوا إن أقرب فرصة هي النهاردة..مكنة الحلاقة موجودة..راسي موجودة..واحد من أصحابي شاطر وجرب يحلق قبل كده -ده اللي هو قاله- وليه لأ؟
طبعا مش محتاج أشرحلكم الموضوع مشي إزاي..لكن ببساطة المعطيات كانت واحد محتاج يخفف شعره بسيط..بلغة الحلاقين: يوضبه..وملحوظة كده على جنب أوعى تقول للحلاق كلمة يخفف ..مش لأنه مش دكتور..لأ..بس لأن الكلمة دي معناها: شيل يا معلم..أو: حلل الفلوس اللي هتاخدها وشيل كتير
الساعة كانت اتنين الصبح..كنا أربعة: واحد هيوضب شعره..وصاحبه اللي هيقوم بعملية التوضيب..وواحد واقف يصور فيديو..وواحد واقف يتريق...طبعا مش دايما الناس بتلتزم بالدور اللي اتفقوا عليه من البداية..الوحيد اللي قام بدوره وأداه بشكل هايل..أكتر من اللي كان مطلوب منه هو صاحبنا اللي كان واقف يتريق..كان هايل فعلا..
الاتفاق على درجة طول الشعر حصل فيها مفاوضات على مدى العملية..طبعا وانت مش دافع فلوس ماتقدرش تزعق..وكمان لما يكون صاحبك هو المتطوع الموضوع أصعب..وممكن تزعق زي ما انت عايز..انت الخسران..يعني تخيل مثلا إنه جه في النص وقاللك لأ خلاص أنا مش مكمل! هتتصرف إزاي..
طبعا كل الخطوات اللي كان فيها درجة طول الشعر بيتاخد فيها قرار إنها تقل..ما كانتش مصحوبة باعتذارات أو أسف أو وعود ببيع المكنة أو كده..لكن كانت بشكل عام مناقشات عن قد إيه شكلي هيبقى أحسن لو شعري أخف...
أنا استفدت كتير من الحلقة دي..دلوقتي أنا ممكن أستغنى عن كذا حاجة زي المشط والشامبو والكريم أو الجيل..أقدر أوفر وقت الصبح..وكمان أتفادى إن القُصة تضايق عينيّ..
الخبر الكويس إني سمعت إن الشعر بيرجع يطول تاني.....اللي يمكن مايرجعش بنفس القدر هو الاستمتاع والضحك اللي حصل في الساعة دي...
يا بختك لو عندك أصحاب زي أصحابي..تقدر معاهم تكون نفسك..تتريق على نفسك وانت عارف إنهم بيحبوك...تشاركهم أوقات مافيهاش تكلف...يوفروا عليك مصاريف :) وأول مايحسوك محتاج حاجة...يحلقولك...
حواجبي لسة موجودة على فكرة :)...

Saturday, July 16, 2011

ناوي أصدق

ثقة؟ هه؟ راحت؟ فيه حاجة اسمها ثقة؟ (لأ على فكرة..الموضوع مش عن غياب أو زيادة الثقة..الموضوع عن إيه هي الثقة!) ..ساعات بنقول إن الثقة هي إني أبقى متأكد من نتيجة حاجة أو رد فعل حد..أو إن الثقة هي التصديق إن حد معين هيفضل في صفي على طول...أو إن الثقة هي عدم وجود أي قلق أو خوف أو توتر بشأن موضوع أو حد معين...
النهاردة وأنا بافكر في الحكاية دي لقيت إن التعريفات أو المعاني دي بتلخبط أكتر ما بتساعد! صح؟
فيه إيه النهاردة ممكن تكون متأكد منه 100%؟ مين ممكن تكون عارف بيقين رهيب رد فعله؟..لو إجابتك ما فيش..جايز تحتاج تكمل قراية...
بما إنك مكمل قراية..فواضح إني أنا وأنت عارفين ومتأكدين من حاجة واحدة: إن مافيش حاجة أو حد تقدر طول الوقت تتوقع منه نتيجة أو رد فعل قياسي ما يتغيرش لو حصل إيه
جايز تصدق للآخر في أبوك لكن يتصرف عن عدم معرفة بحسن نية..وتخيب آمالك..جايز تتوقعي الكتير من مديرتك.. وعن غير قصد يكون رد فعلها مش مبرر...جايز يكون ماعندكش أدنى شك في عظمة وحب الخالق ليك..لكن تحصل حاجة انت ماتقدرش تصدقها..ووقتها ترجعها لحكمة أعلى مني ومنك مش قادرين نفهمها...
الكلام شكله ملخبط..أو على الأقل بيلخبط..لكن اللي اتعلمته النهارده وأتمنى أعيشه هو إن متعة الثقة هي في الغموض اللي بيحيط برد الفعل..جمال الثقة إني أعرف إن صاحبي ممكن يخطئ في رد الفعل.. لكن أختار آخد الخطوة..
الطفل اللي بيرمي نفسه على أبوه...العيان اللي بينام على سرير عشان تتعمله عملية...الصديق اللي بيفتح قلبه لصاحبه بسر صعب...البنت اللي بتحكي لمامتها على مشكلة كبيرة....كل دول معرضين لردود أفعال ممكن تخيب الأمال...لكن كمان مفتوحلهم فرص رائعة لفرح وراحة وبال صافي وقلب يحس...
الثقة هي التصديق إنه برغم وجود احتمالات للرفض..أنا ممكن أتقبل... 
التصديق في حاجة لسة ماشوفتهاش...
الثقة هي اختيار...
أنا باختار إني أرمي نفسي على بابا..وفي الغالب هايشيلني...مش بابا؟

Friday, July 15, 2011

أحسن واحد

عبقرية الخالق فعلا ما تتوصفش –آسف على استخدام تعبير مهما كانت قوته مش ممكن يعبر عن الخالق سبحانه... عبقرية فعلا..أخدت بالك؟
أنا أعرف إن لما واحد يبتكر أو يخترع أو يألف حاجة بيفضل يفكر لغاية ما يوصل لأفضل صورة للحاجة دي وبعدين ينفذها بكل دقة وبشكل قياسي عشان المواصفات ماتتغيرش...لكن أنا وانت وانتي اتعملنا بطريقة مختلفة...
طبعا التصميم بتاع الإنسان نفسه مختلف..لكن كمان كل إنسان فينا مختلف..
فيه جملة جميلة بتقول إن ربنا بعد ما عملني كسر القالب..تعبير عن إنه ماعملش اتنين زي بعض بالظبط..كل واحد فينا مختلف..كل واحدة فينا متميزة...مافيش اتنين على كوكب الأرض متشابهين تماما إلا في إنهم اتعملوا بفن ورقي...هل يجوز ليّ أقول: اتعملوا بمزاج...كامل احترامي وإجلالي لخالق اختار إنه يخلقني مختلف عنك بحيث إنه لو أنا وانت بقينا أصحاب أو إخوات أو زوج وزوجة أو شركاء عمل أو جيران أو أو..يكون ناتج العلاقة في منتهى الغنى والشبع...
عشان كده أنا عارف إني أحسن واحد..بجد..وده ممكن يتشاف إنه غرور..أتمنى إنه مايتشفش كده..بالعكس..أنا أحسن واحد لأن اللي عملني هو أحسن خالق..وبالمناسبة أحب أفكرك إن أحسن خالق ده مش بيخلق حاجة وحشة ولا حتى حاجة نص نص..وللا إيه رأيك؟ وعشان كده أكمل وأقول إني أنا كمان عارف إن انت أحسن واحد وانتي كمان.. وانت برضه (أيوة انت :) )..
احنا مش مفروض نتنافس..لكن نكمل بعض..
ماتحاولش تبقى مختلف..انت بالفعل مختلف..انتي كده كده متميزة..استمتع بالاختلاف..اعرف كويس قوي إن مافيش حد في البشرية زيك بالظبط...
وعلى فكرة لو انت مش فارق أو الدنيا ممكن تمشي من غيرك..ما كانش خلقك..ربنا مش بيضيع وقت..
أصحابك لو مختلفين..هايل..الناس في الشغل لو مختلفين..جميل...هو ده المقصود :) مافيش غلط ولا حاجة..
بالنسبة لأمي..أنا أحسن ابن..وأخويا برضه أحسن ابن..أما أختي فبرضه أحسن بنت! :)
ربنا عرف يعملني أحسن واحد ويحبني قوي..ويعملك انت كمان أحسن واحد ويحبك قوي..
.... بس بيحبني أنا أكتر شوية  :)

Wednesday, July 13, 2011

هو بابا بيتعب عشان مين؟


سؤال غالبا هتكون سمعته بمتوسط 14 مرة قبل ماتكمل 15 سنة! وغالبا بيبقى في بالك ترد تقول: إيش عرفني بيتعب عشان مين؟!..طبعا ده أشهر سؤال.. لكن فيه جمل تانية ..أينعم مش بتنافس السؤال ده في شهرته لكنها معروفة في أسر كتير لدرجة يصعب فيها تجاهلها (حلوة يصعب دي)...جملة زي: مافيش حد في الدنيا دي يتمنى إنك تكون أحسن منه غير بابا..أو جملة: عمرك يا حبيبي ماهتعرف بابا بيحبك قد إيه إلا لما تكبر وتتجوز وتجيب عيال.. وطبعا انت تسمع كده وتدور في ذهنك كل الأفكار الشقية اللي ممكن بيها تحاول تطلع عين عيالك لما يشرفوا!...
وطبعا الأسئلة والجمل دي بنستقبلها واحنا صغيرين باستغراب وبتكون سبب رئيسي في إن أطفال كتير بيبدأوا يصدقوا إن بابا وماما ممكن يكونوا فضائيين! واللي من حضراتكم كبر واتجوز وجاب عيال بيحصل معاه حاجتين: 1- بيكتشف إن الجمل دي كانت صح..2- بيقول نفس الجمل والأسئلة لعياله من منطلق إنه لازم نقرفهم هم كمان..اشمعنى يعني! جدير بالذكر (حلوة دي برضه) إن معظمنا قبل ما يجيب عيال بياخد على نفسه عهد غير مكتوب إنه مايقولش ولا حاجة من الحاجات اللي كانت بتغيظه دي!
مقدمة طويلة لكن باختصار لو فكرنا هنلاقي إن المشكلة مش في الكلام اللي بيتقال..لأن الكلام حقيقي ومليان إخلاص..ولا في الطريقة اللي بيتقال بيها..ولا في التوقيت..لكن المشكلة إنك بتقول كلام صح لكن مش فارق معايا...
خليني أوضح أكتر...
كان فيه زمان حملة لتنظيم النسل..الحملة كانت كويسة وكل حاجة..لكن المشكلة كانت إن التوجه اللي الحملة كانت واخداه هو إنهم يفهموا الناس إن لو انت جبت 3 عيال وده جاب 3 عيال وده جاب 4 عيال..بعد 20 سنة هنزيد كذا مليون ومش هنلاقيلهم مدارس يتعلموا فيها ولا مستشفيات للعلاج ولا مواصلات ولا ولا.. كلام مظبوط..لكن..أنا هيبقى عندي 3 عيال بس..مش كذا مليون..هيدخلوا مدرسة واحدة ومش هيفرقوا يعني في التعداد..وده اللي خللى الحملة تواجه صعوبات كتير.. التوجه اللي الفكرة بتتقدم بيه هو توجه وزير الصحة والسكان اللي شايف إن أعداد الناس هتزيد وبيتعامل مع البني آدمين دول على إنهم أرقام..مجرد أرقام..
البديل هو إن القائمين على الحملة يحطوا نفسهم مكان المواطنين المستهدفين ويفكروا: إيه اللي ممكن يخليني ماجبش 4 عيال؟
كان فيه دكتور نفسي مشهور قال إن الناس مش دايما بتعمل الحاجة الصح..لكنهم دايما بيعملوا الحاجة اللي تشتغل..اللي تنفع..
وأنا بحاول أوصل فكرة ماينفعش أحاول أقنعك قد إيه الفكرة مظبوطة..أنا محتاج أحاول أقنعك قد إيه الفكرة مفيدة ومثمرة بالنسبالك انت..أحط نفسي مكانك وأشوف إيه اللي مفيد ويشتغل معاك..مش مجرد إيه اللي صح...
عمري ما هعرف أعمل كده إلا لو حاولت أفكر من منظورك..الابن اللي عمره 11 سنة محتاج إن أبوه يفكر كما لو إنه 11 سنة..وساعتها بس هيعرف يوصل فكرته لابنه..
كلنا بنحب التحفيز..لو عرفت تحفزني وتشجعني..هاعمل اللي انت عايزه..مش لو حاولت تفهمني إن اللي انت عايزه هو الصح...
وانت بتشجع الموظفين اللي معاك حاول تحط نفسك مكانهم..وانتي بتربي بنتك جربي تفكري بمخها (حاولي)..وانت بتتعامل مع صاحبك شوف لو انت مكانه هتحب إيه..
مش فارق كتير بتقول إيه..يفرق قوي بتقوله إزاي...
إلا بالمناسبة..هو بابا قبل مايبقى بابا يعني..كان بيتعب عشان مين؟ :)

Tuesday, July 12, 2011

انت تتحب!


عبقري اللي فكر في جووجل ترانسليت أو ترجمة جووجل..مننا ناس ممكن يكونوا استخدموه أو لا زالوا بيستخدموه كتير.. أينعم مرّات لو مثلا الانجليزي بتاعك ضعيف ممكن تطلعلك ترجمة حرفية مالهاش أي علاقة باللي انت تقصده بالعربي...في الحالة دي-لو الانجليزي بتاعك ضعيف – حاول تستشير حد بيعرف انجليزي...أنا قصدي مصلحتك يعني عشان ما تتطلعلكش حاجة زي مثلا: Our night is egg وانت كان قصدك: ليلتنا بيضة...
المهم.. دورت في جووجل –أو غووغل- ترانسليت عن كلمة من الكلمات القصيرة قوي وهي كلمة "لو" ...كنت فاكر إن الكلمة دي قصيرة قوي كده في العربي والانجليزي والفرنساوي والاسباني بس! لكن اكتشفت إن الكلمة دي مكونة من بس حرفين اتنين في 22 لغة مش بس في ال 4 أو 5 لغات دي...تخيل؟

كلمة من أكتر الكلمات المحورية والمؤثرة والمغيرة...كلمة بتقلب مواقف...كلمة بتنقذ..كلمة بتودّي في داهية..بتنجح جوازات..وتوقّع شعوب كاملة..وتشجع..وتحبط...وتغيظ...وتبسط...كلمة لو كان أول واحد استخدمها عارف تأثيرها كان ألّف كلمة كبيرة محترمة كده مش بس حرفين.. لو بقى J
طب هتقوللي إن كلمات كتير كده..أنا فاهم..لكن أول حاجة جت في بالي لما فكرت في كلمة "لو" هي فكرة: هاحبك اكتر لو..ربنا مش هيحبك لو...بابا هيبقى مبسوط بيك لو...ماما مش هتكلمك تاني لو...
كام مرة قدمت محبة بس بشرط؟ كام مرة استقبلت محبة وانت عارف إن المحبة دي ممكن تتغير لو ظروفك اتغيرت؟ كام مرة بتبقي خايفة تكبري في السن أحسن ماحدش يحبك؟ كام مرة بتبقى خايف تخسر فلوس أو شغل عشان خايف ماتتحبش زي الأول؟ كام مرة حاولت تشتري الحب بــجمال أو سلطة أو فلوس أو ذكاء أو ممتلكات؟
من أجمل الأمثلة اللي ينفع أنا وانت نشوف بيها الحب غير المشروط: حب الأم للبيبي اللي لسة مولود..وعايز أسألك بصراحة..عمرك شفت بيبي مولود وشكله حلو من أول يوم؟ معظمهم بيبقى شكلهم مش باين والملامح غريبة كده...أقوللك على حاجة؟ النونو ده محبوب جدا من أمه..من غير ما يعمل حاجة..من غير مايبقى أحلى بيبي في الدنيا..من غير ما يبقى شاطر أو خيبان..ومتهيألي من غير مايبقى معاه فلوس أو منصب! من غير أي "لو" إطلاقا.. حب مش مشروط! حب للآخر..حب مش منتظر مقابل..حب مش منتظر حتى تقدير..حب مش مستني كلمة شكراً..حب كامل عن طيب خاطر...حب مش مستني حتى يترد عليه بحب...
اكتر واحد بيحبك هو اللي بيحبك زي ما انت...بيحبك من غير "لو" ..بيحبك وانت عيّان أو تمام..معاك فلوس أو مفلس..مبسوط أو متضايق..وانت بتصلح في نفسك أو وانت زي ما انت..
أنا وانت اتخلقنا واتحبينا حب مش مشروط..حب الأم كان غير مشروط.. وقبله وفوقه بمراحل حب الخالق ليّ وليك.. الحاجة الأساسية اللي أنا وانت وانتي وكل إنسان محتاجها هي إني: أحب وأتحب حب مش مشروط...من غير "لو"
مين في حياتك تقدر تقول إنك بتحبه من غير "لو"؟ مين في حياتك بيحبك مهما حصل؟ دوّر على الناس دي والزق فيهم!
وبالنسبة لجووجل ترانسليت فأنا أتوقع إن بعد كام سنة كدة هيضيفوا خاصية تطلعلك كلمة: ERROR لو حاولت تكتب أو تترجم جملة: "أنا هاحبك لو" وبعدها بكام شهر ممكن بدل ال Error يطلعلك رسالة بتقول: هل تقصد: "أنا هحبك لأنك تتحب" ؟

Monday, July 11, 2011

القطر هو اللي غلطان


جمل بسيطة ويمكن معروفة لكتير مننا..وكلها بتبدأ بكلمة I" " يعني" أنا" ومكانها في الجملة فاعل..الجمل دي بتعبر بطريقة مش مباشرة على مسئوليتي عن الحاجات اللي حصلت..الغريب شويتين إن الجمل دي مختلفة في تركيبها في العربي..أنا عارف إن الاختلاف في التركيب متوقع بين أي لغتين..وفي اللغة العربية الفصحى الجمل دي مافيش عليها أي غبار زي مابيقولوا..لكن في العامية الجمل دي مختلفة تماما..تعالوا نشوف الجمل دي بتتقال إزاي بالعربي..وهاسيبلك التعليق...

I missed the train
القطر فاتني! –واخد بالك؟ القطر هو اللي غلطان
I cut my finger
صباعي اتعوّر
I ran out of coffee
القهوة خلصت –قال يعني خلصت لوحدها
I spilled the tea
الشاي اتدلق –عمرك سمعت حد قال: أنا دلقت الشاي؟
I lost my keys
مفاتيحي ضاعت –صح؟
I broke my leg
رجلي اتكسرت –على فكرة لو حاولت تقول الجملة دي حرفيا في الإنجليزي الجملة مش هاتبقى صح..يعني ماينفعش تقول: My leg was broken.
I like this phone
التليفون ده عاجبني!
I overslept
راحت عليّ نومة –بمعنى إن النوم ابن الإية ضحك عليّ وأنا غلبان ماليش ذنب
I outgrew my shirt
القميص صغر عليّ- يا شيخ؟
I missed you
وحشتني! –انت اللي اديتني الإحساس ده!
I had an accident
حصلتلي حادثة –الدنيا مستقصداني!
زي ماقلتك في البداية التعليق متروك ليك...
الظريف إن فيه تركيبة مخصوص في الانجليزي تقول بيها إن حد متخصص عملك حاجة..لكن في العربي باقول إني أنا اللي عملتها..بص معايا
I had my car repaired
رحت صلحت عربيتي
I had my hair cut
حلقت شعري

جملك جايز ماتتغيرش في العربي.. ومش مطلوب من أي حد فينا إنه يتكلم انجليزي..لكن ممكن نفكر إزاي ممكن نتحمل مسئولية أكتر..
ونفتكر إن احنا نتيجة أفكارنا واتجهاتنا وكلامنا وقراراتنا...

أسيبكم بقى عشان الوقت سرقني –الوقت هو اللي وحش :)

نتمنى لكم رحلة ممتعة...


أنا وإنت وإنتي غالبا في رحلة...طول الوقت وفي أي مرحلة في حياتك هتلاقي إنك في رحلة..سواء طويلة أو قصيرة.. وغالبا فيه محطة وصول محددة انت بتتحرك ناحيتها...ماتخفش مش باكلمك عن الحياة بعد الموت...مش باكلمك عن هتكون فين لما حياتك تخلص..أنا باتكلم عن كل يوم بنعيشه...

دايما فيه سكة..ودايما فيه محطة وصول...

سؤالي هو: إيه الأهم؟ السكة؟ وللا محطة الوصول؟..

أف بقى أنا زهقت..امتى هنوصل؟ - ياه لسه قدامي تلات سنين واخلص دراسة – امتى أولد واخلص من الوجع ده؟

دي جمل ممكن تكون سمعتها وممكن تكوني قلتي بعضها...

السكة أو الطريق ماينفعش من غير محطة وصول..وساعات المشكلة بتكون إننا بنبص على الطريق على إنه حاجة مضطرين نمشيها عشان نوصل للهدف...يعني محطة الوصول حلوة وجميلة وعايزينها...والسكة غالبا طويلة وسخيفة ومملة بس مضطرين...

اللي نفسي ألفت نظرك ونظري ليه هو إننا ينفع نستمتع بالسكة...ينفع نتبسط بالطريق...ينفع نكون مشتاقين نمشي مشوار ممكن يكون طويل وفي نفس الوقت نتطلع لمحطة الوصول الجميلة...

الفرق بين الطفل والكبير والناضج ممكن يتلخص في الطريقة اللي بيتعاملوا بيها مع الطريق...

الطفل بيزن ويعيط وتبقى عايز تلهيه في أي حاجة لغاية ماتوصل عشان مايقرفكش...

الكبير ممكن يستحمل و يلهي نفسه بنفسه لغاية مايوصل...عشان مايقرفكش برضه..

لكن الناضج هو اللي بيستمتع بالمشوار..وبيلاقي حاجة جميلة في كل دقيقة بيمشيها ناحية هدفه..وبيرتب إنه يتبسط السكة كلها مش بس لما يقرب يوصل...

الموضوع مش مجرد إني أستحمل السكة في سبيل الهدف..لأ..الفكرة إني أستمتع بالسكة وبالهدف...

أغلبنا بيقضي وقت في السكة أكتر من الوقت في محطة الوصول..لو بتذاكر طب انت بتذاكر سنين وتحتفل بالتخرج في يوم...لو بتسعى لتكوين أسرة حلوة بتفضل طول العمر في السكة دي...لو بتربي بنتك بتفضلي في مشوار طويل..

لو فكرت هتلاقي إن أجمل ذكرياتك كانت سكك مش محطات وصول...فاكر التمنتاشر يوم في الميدان؟ فاكرة لما كنت مضطر أشتغل شغلانتين؟ فاكرين لما كنا بنسهر نذاكر مع بعض وننام لنا ساعتين ونقوم نكمل؟ فاكر لما كان النونو يفضل يرفس طول الليل؟ فاكر لما تهنا وفضلنا من غير أكل أربع ساعات؟

إن المشوار بيقى جميل أو لأ؟ ده اختيارك...إن السكة تبقى ممتعة وللا مملة؟ ده قرارك...

أنا قررت إني أختار الاستمتاع بالسكك اللي بامشي فيها..

رحلتك الجاية أخبارها إيه؟ تلاتاشر ساعة طيران؟ حمل تسع شهور؟ مذاكرة ست سنين؟ تربية أطفال عشرين سنة؟ اعتصام ومطالبة بالحقوق والعدل شهور؟...

أيا كانت..أتمنى ليك رحلة ممتعة...

Saturday, July 9, 2011

خير اللهم اجعله خير


أفكار كتير بتحاول تفرق بين الإنسان من ناحية والحيوان والنبات من ناحية تانية...وفيه بعض الأفكار اللطيفة زي مثلا إن الإنسان حيوان ناطق أو الإنسان حيوان ضاحك وغيرها كتير من الفروق اللي بتحاول تشوف الميزة اللي موجودة في الإنسان وبتخليه مختلف...
في رأيي إن من الحاجات الكبيرة والمهمة اللي بتميز الإنسان هي إنه بيعرف يحلم..ما أقصدش بس و هو نايم...لكن إن يكون عنده آمال وتطلعات..أحلام وحاجات نفسه تحصل..أشواق لوضع أفضل..
مش متهيألى إن ممكن تمساح يحلم إنه يعيش حياة أفضل..أو مثلا قطة تبقى نفسها تخس..أو فار يبقى عايز يكون أقوى!!
لو لقيت نفسك بطلت تحلم..خاف..خاف لإنك ممكن تكون مجرد إنسان عايش وخلاص..
لو مش عايز تبقى عايش وخلاص..احلم..اتعلم تحلم..واقبل أحلام الآخرين..
عمر ما بلدك ماهتبقى أحلى إلا لو فيها ناس بتحلم...شغلك ممكن يتحسن لو بدأت تحلم..أسرتك هتحقق كتير لو بتحلم...
خليك فاكر إن الاختراعات كلها بدأت بحلم...العدالة في شعوب كتير بدأت بحلم...
احلم..ماتسمحش لحد يسخر من حلمك...شجّع اللي حواليك إنهم يحلموا...
لو لقيت كلماتك فيها كتير من: مش ممكن..أكيد لأ...مستحيل...طبعا مش هيحصل...- خاف قوي على نفسك لأنك ممكن تكون بتخسر حاجة من أحلى الحاجات في حياتك...
لو لقيت مفرداتك فيها: ليه لأ؟ ...ياريت...طب نجرّب...-يبقى غالبا انت مستعد لحياة أحسن...
احلم...