Wednesday, November 9, 2011

الفنان الراحل

 الفنان الراحل كان أكتر حد متواضع.. كان أول واحد ييجي اللوكيشن.. أفتكر في رمضان كان دايماً يجَمّعنا كلنا وكنا بنحس معاه إننا أسرة واحدة.. كان يعطف على الكل من أصغر واحد لغاية المخرج.. أفكاره كانت عظيمة.. مش هييجي فنان تاني في احترامه وثقافته وأدبه...

باتكلم عن مين؟ عن تقريبا "كل" ممثل أو مغني أو مخرج مات.. (مع اختلاف في بعض التفاصيل.. يعني اللوكيشن ممكن يبقى الستوديو أو الحفلة.. رمضان ممكن يبقى السنة الجديدة)..

كل واحد يموت يتحول في لحظتها إلي أجمل وأحسن واحد.. أوصاف كتير مابتبقاش مبالغة.. ومش باتكلم عن كدب أو تفاصيل فيها خداع.. لكن باتكلم عن التوقيت..

الممثل من دول يبقى عايش بني آدم عادي جدا ويمكن مايكونش سمع كلمة كويسة في حياته.. يمكن كذا مرة يقولوله ييجي في المعاد.. أو يتطلب منه يعيد مشهد.. لكن بمجرد مايموت بياخد لقب فنان راحل اللي بيوازي على طول كل الحاجات الحلوة..

وطبعا لمدة أسبوع يفضل التيليفزيون يذيع أفلامه والأغاني.. ويتعمل عنه أو عنها أفلام ومسلسلات (يطلعوه ملاك أو ملاكة).. وكُتُب وبرامج على التيليفزيون وتسجيلات نادرة....ويسمّوا حارة باسمه ويكتبوله إهداء في الإصدارات الجديدة من شوية كتب.. وياخد اسمه جوايز في المهرجانات..

الكلام ده كان فين؟ ليه الراجل ده ماسمعش الكلام ده وهو عايش؟ تكريم إيه اللي يكون بعد ما البني آدم يبقى في مكان مش فارق معاه التكريم؟..

ولما باتكلم عن الرحيل هنا ماقصدش بس الموت لكن كمان السفر أو تغيير الشغل أو تغيير أي ظروف بحيث يبقى صعب عليّ إني أعبر لحد معين عن مدى احترامي أو إعجابي بشخصيته أو أداؤه..

اللي مننا كان بيتابع زمان بريد الأهرام يفتكر إن رسايل كتير كان فيها إحساس بالندم بصياغات مختلفة.. "أتمنى يرجع ولو يوم واحد عشان أقوله قد إيه باحبه".. أو "آه لو لحقت أقولها عن مدى احترامي وتقديري ليها"..

أفتكر إن أكتر حاجة خلتني أبكي لما عرفت بخبر وفاة أول حد علمني مزيكا هي إن كان بقالي فترة ماشوفتوش وكان نفسي إني أدّيله نسخة من CD المزيكا اللي عملته مع أصحابي.. كان نفسي أسمع رأيه.. كان نفسي أكون بأقدمله ال CD كعلامة شكر إنه علمني مزيكا.. كان في بالي إني أعمل كده لكن أجلت...خسارة

فيه في حياتنا "فنانين" كتير.. وباتمنالهم كلهم الصحة.. لكن اللي ناوي أعمله الوقت اللي جاي إني ما أحتفظش بكلمة تشجيع جوايا من غير ما أقولها في مكانها ووقتها..أهالينا وأصحابنا وجيراننا وزمايلنا في الشغل ممكن جدا تفرق معاهم كلمة حلوة النهاردة.. مش بعد 30 سنة.. وبالمناسبة ماشفتش حد في حياتي بيزهق من كلام حلو يتقال عنه..

مش هاستنى عيد ميلادك عشان أقوللك إني فخور بيك.. مش هتكسف أشاور على حاجة إيجابية في شخصيتك بمجرد ما ألاحظها..

أنا وانت مش هيفرق معانا قوي بعد 100 سنة إنه يبقى فيه شوارع ومكتبات ومستشفيات باسمي! أعرف ناس دلوقتي مستعدين إن أساميهم تتشال من كل المؤسسات دي مقابل إنهم مايسمعوش كلمة وحشة عنهم.

اِلحَق كل الفنانين اللي في حياتك.. كَرّمهم وهم عايشين.. وماتستناش تقول كلمة حلوة في حق الفنان الراحل بس!

19 comments:

  1. الله ينور يا دكتور كلام صحيح

    ReplyDelete
  2. إلحق كل الفنانيناللى فى حياتك .. كَرّمهم وهم عايشين .. وما تستناش تقول كلمة حلوة فى حق الفنان الراحل بس !

    قد إيه الجملة رغم بساطتها عميقة أووى
    أنا فعليا بعمل كدا فى حياتى .. بس مش مع الناس كلها
    ليه ؟!! .. مش عارفة
    يمكن خجل .. أو أوقات بيكون التعبير عن الحب والاحترام مش كافى بالكلام بس .


    البوست فكرته بسيطة بس عميقة اووى
    ف حقيقى تسلم بجد
    تحياتى ليك يا ماجد :)

    ReplyDelete
  3. الله ! تخيل إني ما بحاولش احوش اي حاجة جواليا لحد
    بتبع دايماً
    كلمة
    ( ما تبقاش حمار خليك قنبلة ما تبطلش انفجار)
    اصل أنا هتأثر بالطاقة الإيجابية اللي هتفرحه!

    يا ماجد هاااايل
    =)

    ReplyDelete
  4. فعلا عندك كل حق يا ماجد. دايما مش بنعرف قيمة اللي بنحبهم غير لما يغيبوا عننا لأننا بيتولد جوانا شعور ان كلام كتير اوي كنا عايزين نقولة وغيابة دا هوا المانع. علشان كدا بطبيعتي مش بخبي مشاعر الحب ودايما لما اكون بحب حد بقولة انا يبعزك انا بقدرك وخلافة . وحتي مشاعر الكرة كش بخبيها وبحاول أوضح بكل الأشكال للإنسان اللي مش بحبة دا انة فعلا بكرهه . مش عارف ان كان دا صحّ ولاغلط لكني اتعودت علي كدا

    ReplyDelete
  5. I like it very much .... you are amazing :)

    ReplyDelete
  6. باحب أقول الحاجة الحلوة للغريب لما بأشوفها لأني غالبا بأقول النقد اللي في نفسي، لو حد جر شكلي
    Revnia II

    ReplyDelete
  7. Amazing ! inta fannaan , raa2e3 , mobde3 w insaan be koll ma fil insaneyya min ma3aany gameela . Thank you ya Maged . N

    ReplyDelete
  8. رائع كالعاده و كلامك جميل و بيلمس مش بس الفنانين حتي الناس اللي حوالينا بيحصل معاهم كدة مش بنشوف الا الجانب السئ منهم و لما بيموتوا احساسنا بالذنب اننا ضغينا عليهم بزيادة بيخلينا نفتكر كل حاج حلوة ليهم و نكتشف ان كان فيهم حاجات حلوة ممكن نمدحها و ممكن ننميها جواهم او كانت ظاهرة بس احنا اللي مش شايفين او بنتعمد منشوفش كلام جميل جدا يا ماجد بجد

    ReplyDelete
  9. جميلة جدا و معبرة عن واقع احنا بنتجاهله مش بس مع فنان يمكن مع البقال اللي بيعاملنا كويس او المدرس في المدرسة ينقصنا الوفاء و اظهار الحب لغيرنا و لو حصل كتير جدا هيتغير في حياتنا يمكن ناس كتيرة مش بيهمها الفلوس اد ما بيهمها كلمة حلوة او ابتسامه

    ReplyDelete
  10. Brilliant , wonderful ,most needed post.It
    reminds me of the proverb that says ,
    ياللي بتبكي وفر مدامعك .في الحياه ما نفعتني ،في الموت ما نا سامعك
    Thanks ya Maged . N

    ReplyDelete
  11. انت كده يعنى بتحاول تحرجنا علشان نقولك كلام حلو ، ماشى برضه مش هقولك :)

    ReplyDelete
  12. هوا انا أقدر أقولك انك بجد انسان جميل قوي وبتكتب كلام بسيط قوي لكن عميق قوي؟ بجد دي حقيقة مش مجاملة عشان بكتب على المدونة بتاعتك .. رغم اني عمري م شوفت حضرتك بس بجد انا فخورة ان في مصري زيك بيتكلم ببساطة ورزانة وحكمة عفوية .. انسان مصري ... لو كان في كتير كده من فكر "ماجد" متوزعين في مصر كان زماننا تجنبنا الكثير من المآسي الاجتماعية .. كانت مصر بقيت أفضل ..
    سلمتْ يمينك .. أو شمالك لو كنت بتكتب بالشمال :))

    ReplyDelete
  13. بعيد عنك و عن السامعين ندالة وأنانية وتمركز حول الذات وكبرياء ويا أرض اتهدى ما عليكي قدى ..... ربنا يرحمنا جميعا من هذه الطبيعة البشرية اللعينة ....ألله يسامحك ياآدم قادر ربنا يتوبنا عل
    كل آدم فينا وأنا أولكم

    Always happy to read from you ... Thank u
    Joanna

    ReplyDelete
  14. كالعاده كلامك مبدع وبناء ودايما فيه رساله بتحاول توصلها بابسط واعمق الكلمات.. دى كلمات بسيطه من القلب باعمل بوصيتك "اِلحَق كل الفنانين اللي في حياتك.. كَرّمهم وهم عايشين Hala helmy

    ReplyDelete
  15. من الاخر...كل مرةأقرالك،افتكر موقف حصلي وأفكر فيه بشكل مختلف أو ترجعلي ذكري معينة تسعدني أو آخد بالي من حاجة لازم اعملها أو تنور لي فكرة محتاجاها....أو كل دوول مع بعض،و لازم مع كل ده الإبتسامة متفارقنيش،هو ده في رأيي الابداع الحقيقي...الالهام بمنتهي البساطة...أشكرك من كل قلبي

    ReplyDelete
  16. "لماذا نعتبر الموت شرطاً أساسياً لكى نصاب بحالة من الإعجاب المطلق بمن مات ؟ ونلهث وراء كل حرف كتبه ؟ فى حين أننا نضن عليه بالحب والحنو والمتابعة فى حياته"

    جملة كتبها يوسف القعيد فى مقال فى الأهرام بتاريخ 11-5-2009
    بيتكلم فيها عن صلاح جاهين .. ومن يوم ماقريتها قصتها ولزقتها قدامى على الحيطة .. علشان أنا بحب صلاح جاهين قوى ، وعارفة أنه مات باكتئاب .. ولأنى "متتصاه" فعارفة أن كلمة الحب كانت هاتنقذه .. بس يا خسارة أنا ملحقتوش ..
    لكن لسة قدامى الفرصة الحق ناس كتير

    ***

    أنا لسة النهاردة كنت بتكلم فى الموضوع دا بالظبططططططط مع مجموعة أطفال واتفقنا إننا هاتشجع بعض وكل اللى فى البيت ، وأى حد نشوفه بيعمل حاجة كويسة علشان نفرحه ..
    وعلشان إحنا كمان بنفرح لما حد يقولنا كلمة كويسة :)

    ReplyDelete
  17. Fantastic article.... Simple... yet deep
    الله ينور يا دكتور كلام صحيح

    God Bless

    ReplyDelete
  18. Maged, Maged, Maged ... ana 7elwa w ba3mel keda .. sa7 ??

    ReplyDelete