Wednesday, November 2, 2011

ج د ع

من ساعة ما إدارات المرور بدأت تشتغل بالنِمَر الجديدة اللي فيها حروف وأرقام وأنا باحب أبُص على الحروف وأشوف لو بيكَوِّنوا كلمة ليها معنى وللا لأ.. ولأن  كلمات العربي أساسا بيرجع جذرها ل3 حروف وكمان لأننا ممكن نستخدم نفس الحروف بتشكيل مختلف فعدد الكلمات المختلفة رهيب..

طبعا قالوا في بدايات تطبيق الحكاية دي إنها شالوا أي كلمات ممكن تِتقِري على إنها شتايم أو كلمات خارجة.. الظريف إن كلمات كتير من الشتايم في العربي مكونة من 3 حروف (عشان اللي بيشتم بيبقى مستعجل فمش معقول هيقول مثلا: يا بطريق المجاري! أسهل قوي إنه يقول: يا جحش!) :)

المهم.. راجع من شغلي من يومين ولقيت عربية ملاكي أرقامها (ط ف س) و3 أرقام مش فاكرهم.. طبعا صِعِب عليّ صاحب العربية وحاولت أتخيل اليوم اللي راح فيه يجيب النمر الجديدة..

التلات الساعة 10 ونص الصبح.. إدارة المرور.. صباح الخير.. <صباح النور (أو وعليكم السلام)>.. بعد إذنك عايز أعمل النمر الجديدة.. <أوراقك..> اتفضل.. <ارتاح وهأنادي عليك..>

التلات (كويس.. يا مسهّل) الساعة 1 ونص وخمسة (داخلة على إلا تلت).. إدارة المرور (نهار داخلي)..< الأستاذ فلان الفلاني..>.. لأ "الفللاني" يا فندم مش الفلاني..< يا سيدي مش هتفرق.. اتفضل النمر..>

إيه ده؟.. <إيه فيه إيه؟..> إيه النمر دي؟ ط ف س 504؟ طِفِس504؟..<يا عم اشكر ربنا اللي قبلك كان ط ف س 507..>
وهو أنا متضايق من الرقم؟؟ معلش يا أستاذ شوفلي حروف تانية..<حروف تانية دة إيه؟.. هي دي الحروف المخصصة ليك>.. طب أنا ممكن أستنى وآجي بكرة (الأربع نهار داخلي أو خارجي أي حاجة).. <بكرة زي بعده.. هي دي النمرة المخصصة ليك>.. طب شوفلي حاجة أرحم شوية.. يعني مثلا ر ز ل 309 أو غ ل س 734.. أي حاجة غير طفس دي!


يمكن مش كلنا بييجي حظنا في كلمة شكلها وحش على ضهر العربية.. لكن كلنا من غير استثناء اتكتب على ضهورنا كلام على مر السنين.. كلام بيسموه labeling  أو "وضع مسمى" ومع السنين فضل المسمى ده مرتبط بي.. والناس شايفاه علي وشي..
يمكن مش موظف إدارة المرور هو اللي حط المسمى ده عليّ.. يمكن أبويا.. يمكن أصحابي في المدرسة وأنا صغير.. جايز مراتي.. ممكن زميلي في الشغل..

"هو كده على طول غبي".. "عمره ما هيتعلم".. "ما ده العادي إنه يضيع الفلوس".. "يا عم ده ضايع في الكورة" "أنا ماشفتش حد بخيل زيك".. "إنتي دايما كده همك على الفلوس".. وغيرها من العناوين أو الـ labels اللي اختارناها لغيرنا أو ناس قررت إنها تختارهالنا..

كل مرة أنا بيتقاللي "انت شاطر في المزيكا" مش بس باتبسط.. لكن كمان باتشطر في المزيكا.. وكل مرة بيتقاللي "سواقتك أي كلام" غالبا بتبقى نبوءة بتحقق نفسها خصوصا لو جاية من حد قريب ليّ..

كلنا بتجيلنا فرص كتير إننا "نسمي" الناس.. ياترى هاقدر أختار عنوان يشجع ويفرّح ويزق لقدام؟ ياترى ممكن أكون السبب في إن طالب عندي يكون متفوق بسبب إني قلتله "إنت دايما مركز.. برافو عليك"؟ يا ترى ممكن جوزِك يبقى متميز في شغله بسبب إنك شايفاه "على طول ملتزم في الشغل"؟..

لو مش قادرين نغير النِمَر.. ممكن نكتب "عناوين" حلوة لبعض.. وافتكر إن اللي بتقوله النهاردة لحد ممكن يكون "النمرة اللي بيستلمها ومايقدرش يغيرها"


10 comments:

  1. لو مش قادرين نغير النِمَر.. ممكن نكتب "عناوين" حلوة لبعض.. وافتكر إن اللي بتقوله النهاردة لحد ممكن يكون "النمرة اللي بيستلمها ومايقدرش يغيرها"
    القصة كلها فى السطر دة بجد يعنى يا ريت كلنا نحط عناوين حلوة لبعض و حتى لو قصدنا العكس يعنى مثلا أنا خالتو لما بنتها بتضايقها بتقولها يا حلوة متعمليش كدة مع ان لو نفس الموقف اتكرر مع أم تانية هتقعد تشتم فى بنتها قد كدة ف تقريبا نفس الفكرة حلوة جداا يا ماجد تسلم :))

    ReplyDelete
  2. Maged,

    I almost cried! It touched me badly ya Maged. This is mainly why I feel that our culture is so stiff, it puts people in molds that are hard to break sometimes. And this has a bad effect no only on the people that are "labeled" with a bad label but also makes those who have no labels or with good labels conscious all the time that well they might be labeled at some point and that makes them seek people's approval always in order not to be "labeled".
    This article is totally so connected to your previous one about saying "NO" to others, I think that this article is one of the reasons? What do you think?!

    I love you ya Maged, thanks a lot for allowing God to use your thoughts in such a wonderful way.

    Sincerely,
    misho

    ReplyDelete
  3. أجمل حاجة ف بوستاتك يا ماجد . انك بتبدا الاول بفكرة بسيطة وبعدها تبدا بتوصيل امعلومة او الهدف من البوست . دمت مبدعا

    ReplyDelete
  4. ر ا ء ع كالعادة يا ماجد بجد كتباتك بتخلي الواحد يتفائل جدا :))

    ReplyDelete
  5. حبيت أوي "بطريق المجاري " على فكرة

    ReplyDelete
  6. u know what , when i'm feeling bad i always read ur blogs

    ReplyDelete
  7. طب أنا ممكن أستنى وآجي بكرة (الأربع نهار داخلي أو خارجي أي حاجة)


    بوست دمه خفيف ، وإيجابى بشكل خطر ... التشجيع سر استمرار الحياة ، دى وجهة نظرى :)


    عجبى فكرة وصياغة وروح ... كالعادة

    ReplyDelete
  8. Great article... Fear makes us try to put someone down for us to feel up.
    We all are learning. Thanks

    ReplyDelete
  9. مش هنقدر نشيل اليفط القديمة السلبية بس بالتأكيد نقدر نضيف آخري إيجابية.....التجربة خير دليل....ديم علينا يارب نعمة التشجيع وإحفظها من الزوال يا كريم
    Thank u ya Maged
    Joanna

    ReplyDelete
  10. فكرة عبسيطة ولكن عميقة جدا

    ReplyDelete