Thursday, November 17, 2011

أسهل بكتير

 بعد أول يوم دراسي في سنة جديدة رجعت البنوتة اللي عمرها 4 سنين بيتها وبدأت تسأل الأسئلة اللي مليانة استغراب ومحاولات للفهم..
ماما.. هو إحنا "مسيحيين وللا مسلمين"؟
إحنا مسيحيين.. ليه يا حبيبتي؟
أصل أصحابي في المدرسة النهاردة سألوني.. طب هو إيه الفرق؟
مافيش فرق يا حبيبتي.. بس إحنا بنصلّي لربنا في الكنيسة وهم بيصلّوا لربنا في الجامع..
يعني "نحبهم"؟؟

وعلى الرغم من توقعنا للرد إلا إن الرد مالهوش وزن قدام السؤال بتاع: يعني نحبهم؟.. كما لو إن لسان حال البنوتة هو إنه "ماحدش يقوللي على الفروق.. أنا بس عايزة أعرف لو ينفع أحبهم وللا لأ"

جوانا كلنا ميل تلقائي فطري للحب.. مخلوقين و"العادي" بتاعنا إننا "عايزين" نحب ونتحب.. الكُره هو الحاجة الجديدة.. الحاجة الغريبة..

عشان أكره أنا محتاج أبذل مجهود.. عشان أكرهك أنا محتاج إني أعرف معلومات عنك.. أكوّن أسبابي.. أحدد شوية أمثلة تساعدني إني ماحبكش.. محتاج "أبطّل" ألعب معاك.. محتاج "أعمل نفسي" مش شايفك.. محتاج أتفادى التواجد في أماكن إنت موجود فيها.. محتاج أفضل أفكّر نفسي بمواقف انت عملتها فيّ أحسن "أنسى" وألاقي نفسي "باحبك"!..

عشان أحبك أنا مش محتاج أكتر من إني "أسيب نفسي".. الطبيعة اللي ربنا حاططها فينا كلنا لسّة فيها الميل للخير والحب والاحترام.. النزعة (حلوة النزعة دي) للبر والتقدير والمساعدة.. التوجه النقي لمحاولة إسعاد حد تاني...

عايز تشوف أكتر علامات ميلنا للمحبة؟ مثال ممكن يبان عكس المحبة تماما: إيه أكتر أمنية عند واحد مسلم مخلِص؟ مش إن صديقه اللي مش مسلم "يهتدي"؟ لو واحدة مسيحية نفسها في إيه؟ مش إن جارتها اللي مش مسيحية "تيجي للنور"؟ هم لو مش بيحبوا بعض كان كل واحد قال: "ياللا مش مهم أهو هيروح جهنم".. "ياللا أحسن.. أهي هتروح النار"!

على الرغم إن الأمثلة تبدو طفولية.. إلا إن رغبة الخالق سبحانه هي إننا نرجع أطفال في النقطة دي بالذات.. نحب "الإنسان"..
تحدي صعب إنك تحاول تكره.. جرب تكره الطبيعة.. صعب قوي.. الشجر والشمس.. السما والمية والورد.. محتاج تبذل مجهود ضخم عشان تكره عمل إيدين الله..

وأصعب وأصعب إني أحاول أكره إنسان اتخلق على صورة هذا الإله اللي مليان رحمة وخير وحب وتقدير..

يعني أحبهم؟ آه.. أسهل بكتير!

12 comments:

  1. very good one ya dod

    ReplyDelete
  2. دعوة للحب ! منتهى الروعة و الإنسانية و الرقي ! أشكرك أيها الإنسان المبدع المحب ..N

    ReplyDelete
  3. Fantastic again and again.. No doubt that you have the talent... God Bless
    Very true.. when you try to hate someone, it consumes you from within. In the process you realy loose your energy to love your own. Go Figure.
    Fantastic...

    ReplyDelete
  4. ركيكة (مش رقيقة) بس معبرة عن نفس المعنى
    :)

    http://www.youtube.com/watch?v=xChDwC_43Aw

    ReplyDelete
  5. مش عارف لية الواحد لما بيلاقي ناس حلوة زيك بيسأل نفسة هما كانوا فين من زمان كانت الأمور هتختلف فعلا انت انسان حبوب و تتحب يا ماجد بجد و كلامك دائما مؤثر و بيلمس القلوب اكتر .. انت ببساطة انسان رائع

    ReplyDelete
  6. كلام جميل و يدخل القلب

    ReplyDelete
  7. على مدى تقريباً ستة شهور وغالبية التعليقات كلها بتطلب منك تجميع كل المقالات وطبعها علشان فعلا تستحق. بتدى بصيص أمل "حلوة بصيص دى" فى أوقات الدنيا بتبقى ضلمه فيها "ما تفهمش النور بقى بيقطع كتير ليه؟ يا ريت تستجيب على الاقل ناس أكتر هتستفيد ومقالاتك دى هتنورلهم أو على الاقل هتخفف شوية من أحاسيس الضيق والخوف اللى كل الناس عايشاها بسبب ظروف البلد.
    أحب اسجل شكرى وتقديرى ليك بجد
    ميرسى يا ماجد

    سحر البحيرى

    ReplyDelete
  8. رائعة تسلم دماغك و أيديك :)

    ReplyDelete
  9. الله عليك وعلي رقي وشفافية أفكارك!علي فكرة،الأطفال دايماً أقدر الناس علي التفاهم من غير مايتكلموا نفس اللغة أو حتي من غير ما يتكلموا،لأن لغتهم هي الإنسانية...البراءة...الحب،اللغة اللي بنتكلمها كلنا واحنا صغيرين و ننسي حروفها ومفرداتها كل ما نكبرو يعلمونا الكبار نتكلم لغة أو لغات تانية...لكن الأمل في بكرة الأحسن هيفضل موجود طول ما في ناس زيك بتفكر اللي بينسي وتشرح للي مش فاهم وتنبه اللي مش واخد باله....أشكرك وتحياتي

    ReplyDelete
  10. عجبني قوي حكاية عشان أكره أنا محتاج أبذل مجهود..والحقيقة أن في ناس بيحاولوا يبذلوا المجهود ده .. وفي بعض الاحيان بيفلحوا في الحكاية دي .. في الوقت اللي فيه جبهات كتيره في حياتهم محتاج للمجهود ده .. لكنهم بيكرسوا جهودهم لهذا الغرض السامي آلا وهو الكراهية ؟؟؟؟؟؟؟؟؟

    ReplyDelete
  11. بوست ملئ بالمحبة من انسان محب!
    بغض النظر انى معترضة على ان دليل الحب هو ان يدعو لك الناس بالهداية،فى الواقع ده دليل على حبهم لنفسهم،كونك مختلف بيشكك اللى قدامك فى نفسه و بيخليه مصمم يخليك زيه عشان يتأكد انه صح،سواء بقى كان مسيحى ولا مسلم ولا بوذى..المحبة اللى بجد انك تدعى و تتوقع الجنة لصاحبك وهو على دينه و قناعاته لأنك قدرت تخترق ببصرك الغمام و تشوف ما وراء تعقيدات الاختلاف و التناحر العقائدى،انسان زيك زيه.وده برضه مش محتاج مجهود..ده محتاج انك تسيب نفسك تفتح عينك و تشوف و متقفلهاش بالعافية.

    ReplyDelete
  12. heeeeeeeeeeeeeeeeeeeeeeeeeeeeeeeeey

    شوف الإعلان دا

    http://www.youtube.com/watch?v=SF7aTN_1-oI&feature=share

    هاتلاقى الحكاية اللى كنت بتتكلم عليها قبل كدة بتاعت ارقام العربيات الجديدة

    :))))))))

    ReplyDelete