Thursday, December 29, 2011

XX

الاختصارات اللي بنستخدمها على الإنترنت من أكتر الحاجات اللي بتلخبط المستخدمين الجُداد.. ولو جربت تشرح لحد كبير سنا الاختصارات والحاجات دي ساعات بتبقى المشكلة إنهم مابيصدقوا! فتلاقي بين كل جملة والتانية LOL أو BRB وهكذا..

وطبعا من ضمن الحاجات اللطيفة استخدام نفس الحروف في لغة تانية.. فتلاقي ناس كاتبة: لول! أو برب!

البنات بصفة عامة أشطر شوية في التفصيلات والـemoticons الجديدة.. فتلاقي مثلا الراجل ببساطة بيستخدم علامة" :) " للتعبير عن ابتسامة.. تلاقي البنات عندهم "خط إنتاج" كامل للتعبير عن ابتسامات مختلفة..:-) :> :--)  :+) =) :)) ده طبعا غير: o-O وغيرها!

والمعروف عند معظمنا إن علامة X معناها "بوسة".. عادة الناس بتستخدم XX.. ولو بوسة وحضن يبقى XO.. ويمكن مش كلنا عارفين مصدر استخدام حرف الـ X للتعبير عن "بوسة"..:)

من ضمن التفسيرات اللي موجودة التفسير اللي بيقول إن في العصور الوسطى الناس اللي ماكانتش بتعرف القراية والكتابة كانوا لما بيحتاجوا إنهم "يمضوا" على عقد أو اتفاقية أو كده كان الشخص بيرسم علامة X مكان الإمضا.. وبعد كده "يبوس" على الـ X كتعبير على الأمانة وإنه كأنه بيمضي!

المحيّر إننا مرات بنبقى شايفين في الحاجات الصغيرة قيمة صغيرة! مجرد بوسة.. حضن بسيط.. سلام بحرارة.. ابتسامة.. لكن قد كدة كانت مجرد "بوسة على ورقة" علامة إخلاص وموافقة رسمية على عقد أو اتفاق..

بسيطة آه لكن مش تافهة!..كل كلمة حلوة أو ابتسامة أو تربيتة على كتف أو حضن.. كل صقفة أو سلام حار أو مكالمة مشجعة ليها قيمة كبيرة.. كل كلمة "بحبك" أو "انت غالي" آه ببلاش.. بس مش رخيصة! حتي لو كانت مجرد كام حرف على شاشة على الإنترنت!

XX  :)


18 comments:

  1. وحتي الابتسامات اللي شكلها واحد مش بالضرورة يكون ليها نفس المعني،فتفضل دايما أحلي وأهم الابتسامات أصدقها....أكثر من رائعة،تحياتي

    ReplyDelete
  2. الإبتسامة هي سر السعادة .. بيفرق معايا اوي لما حد يبتسم في وشي او لما بببتسم في وش حد الصبح كدا . بيبقي يوم جميل ولطيف جدا ... الناس ممكن تكون شايفاها حاجة بسيطة لكن بالعكس بتفرق جدا جدا جدا الإبتسامة دي .. بوست اكثر من رائع يا ماجد

    ReplyDelete
  3. منكم نستفيد وانا اقول ايه الحروف دى اتاريها ليها معنى
    واتارينى انا فى الضياع حبقى اخد بالى بعد كده
    ((:

    ReplyDelete
    Replies
    1. ما معني علامة اَكس في نهاية الرسالة

      Delete
    2. اريد ان اعرف معناها

      Delete
  4. البوست ده تستاهل عليه بوسة XX :))رائع يا ماجد.

    ReplyDelete
  5. ايه ده انا كنت هاموت واعرف اصلها ايه فعلا , تحفة يا ماجد :)
    فعلا فيه حاجات بسيطة بتشجع كتير بالذات لو من حد ما تعرفوش اوي بتضفي حميمية ودفء رائع كالعادة :)

    ReplyDelete
  6. More than raa2e3.. x x :) N

    ReplyDelete
  7. حلو أوى دى يا ماجد
    ومفيدة جدا أول مرة اتعرف على خط الإنتاج دا ...

    ميرسى دايما بستفيد من مقالاتك

    S

    ReplyDelete
  8. جامدة اووووووووووى يا ماجد

    ReplyDelete
  9. يا جماعه خوشو اعملولو فولو ع انستا
    @mohab_eldahshory

    ReplyDelete
  10. يا جماعه خوشو اعملولو فولو ع انستا
    @mohab_eldahshory

    ReplyDelete
  11. يا جماعه خوشو اعملولو فولو ع انستا
    @mohab_eldahshory

    ReplyDelete
  12. انا من المستقبل 😂

    ReplyDelete