Tuesday, October 4, 2011

أحلى عزومة مراكبية

وقت اختلاف فرنسا مع أميريكا على دخول العراق سنة 2003 بدأت حملات في أميريكا لمقاطعة المنتجات الفرنسية..وامتدت الحملة إلى محاولة تغيير اسم الـ French fries  لـ freedom fries ..!

والظريف إن الحكاية دي موجودة بالفعل في لغات كتير..تسمية حالة أو مشكلة باسم جنسية دولة تاني خصوصا لو الدولتين كان فيه بينهم مشاكل..فمثلا فيه تعبير في الإنجليزي بيتقال عن اللي يمشي من حفلة مثلا من غير مايسلم على اللي دعاه للحفلة إنه عمل French leave لأن في فرنسا في القرن ال18 كان عادي إنه ده يحصل...على فكرة نفس الجملة دي في الفرنساوي بتتقال:  filer à l'anglaise اللي فيها "رمي كلام" على الإنجليز!

واكتشفت إننا مش بس بنتريق على شعوب على الرغم إننا بنعمل زيهم..ده احنا ساعات بنربط سلوكيات سلبية بمهن يمكن يكونوا أقل ناس بيعملوا السلوك ده..

"عزومة مراكبية"...مراكبي في وسط البحر ومعدي جنب مركب تانية وبكل عزمه: "اتفضل"..والمراكبي التاني: "كتّر خيرك..يزيد فضلك!"
اللي يضحّك إن هُمه الاتنين عارفين إن ماحدش فيهم ينفع يقبل العزومة..لكن مش بس كده..ده همه الاتنين "مستنيين" العزومة..وممكن يتضايقوا قوي لو التاني ماعزمش عليهم!!

مظلومين المراكبية..لو عملنا إحصائية سريعة يمكن نكتشف إن أقل ناس بتعزم عزومة مراكبية هي المراكبية!

عايز تشوف بجد عزومات مش من القلب؟ عزومات صاحبها مايقصدهاش؟ شوف المترو..يبقوا اتنين واقفين في المترو..وأول ما كرسي يفضى يجري الاتنين عليه..بس قبل ماحد فيهم يقعد يبدأوا يتعازموا..وبيبقى باين قوي إنهم مش طايقين بعض..ولما واحد فيهم يصر إن التاني يقعد يقعد ويبقى عامل نفسه إنه مضطر (إن ماكنتش تحلف!) :)

لي صديقة من الهند وكانت بتقوللي
عندنا نفس الحكاية..مرة جاتلي واحدة صاحبتي تزورني في البيت ومعاها ابنها الصغير..فعَزَمت على الولد:
أنا: تاخد شوكولاتة؟
الولد: لأ..شكرا..
أنا: خد يا حبيبي..
الولد: لأ..شكرا..
بعد 5 دقايق بالظبط الولد راح لمامته وشوشها في ودنها
الولد: ماما..أنا جعان..
الأم: مش طنط لسة عازمة عليك بشوكولاتة؟؟
الولد: أيوة..بس إنتي قلتيلي في البيت إنها لازم تعزم عليّ 3 مرات عشان آخد!

لما بأشوف الطريقة اللي بنستخدمها مع بعض واحنا ناس عاديين..مش باستغرب لما رجال السياسة يبقوا بيقولوا كلام ويطلع مجرد كلام..أو ينشروا خبر غلط ويطلع خبر أو صورة "تعبيرية" أو حد فيهم يقول تصريح وفي الآخر يقول "كنت باهزّر" أو "كلامي اتفهم غلط"...

الظاهر احنا محتاجين نبتدي من أبسط الحاجات..
من فضلك ماتعزمش على حد تقعده في المترو إلا لو بجد مستعد تخليه يقعد..
ماتعملش نفسك ناوي تدفع المشاريب لكل أصحابك وانت مش عايز..
أنا باحترم جدا اللي بيعزمني على حاجة وهو حابب يعمل كده..باحترم اللي يقول: لأ شكرا..لو مش عايز..مش يكون "بيتمنّع" عشان ماياخدش من أول مرة..

ماتيجوا نجرب نبقى حقيقيين حتى لو في الحاجة الصغيرة دي؟ يمكن وقتها أصدقك في حاجات أكبر..وقتها لما تقوللي "وحشتني" أو "باحبك"..أو "أنت هايل".. ماحسش أنك بتقوللي "اتفضل" واحنا في وسط البحر!

وقتها بس ممكن "عزومة المراكبية" تبقى حاجة جميلة..لما أشوف اتنين مراكبية قاعدين على الشط في نهاية يوم شغل..وهمه الاتنين بيشاركوا بعض في أكلة سمك حلوة بعد يوم شغل طويل..ولو حد فيهم قاللي اتفضل..هاتفضل!..هتبقى أحلى عزومة مراكبية!  :)

8 comments:

  1. جميله جدا .. ومش كلام مجامله ولا .. عزومة مراكبية :)

    ReplyDelete
  2. فيه ناس تنحة تقول لها اتفضل يرمي نفسه عليك انا مجرب الموضوع دة مع اني مشهور اني انجليزي قوي في الحاجات دي و مش بحب عزومة المراكبية لأني لو مش قد الحاجة او العزومة مش بقول ولا بعزم لمجرد العزومة و فية ناس بتزعل مني في كدة بس انا صح و هما لسة متعلقين بعادات بائدة نفسي تتغير بس لما كنت في الجيش و اجيب اكل مع زميلي كنت بتجنن منه لما اي حد معدي علينا يفضل يرمي كلمة اتفضل دي في الرايحة و الجاية و ما بيصدقوا مفيش كسوف ولا من تاني مرة لدرجة ان فية شخص معين بيحب يرمي جتته و قولت لية اوعي تعزمة و التاني خرج و مكملش خمس دقايق و قال ادام انتوا معزمتونيش انا اعزم نفسي بلاوي الواحد بيشوفها

    ReplyDelete
  3. جميلة بجد ... بس المشكلة لما تكون عايز ترفض عزومة وإللي قدامك يصر وإنت بتضطر تقبل عشان ماتخليهوش يحس إنك بتتعالى عليه....

    ReplyDelete
  4. عجبني ربطها ب"متيجوا نجرب نبقي حققيين" فكر تعملها سلسلة هتلاقي حاجات كتير ترصدها تحت العنوان ده

    ReplyDelete
  5. حلوة يا ماجد و الله :)
    أنا عازمك على نيسكافيه على أدى كده لما أنزل مصر إن شاء الله :D
    عزومة بجد :)

    ReplyDelete
  6. و انا بدور علي اصل كلمة عزومة مراكبية لقيت البلوج ده و قريته. بجد عجبني فكرته و نشرته عندي علي االفيس بعد اذن حضرتك. و بصراحة انا رايي ان فعلا المفروض نعزم لو عندنا النية اننا نشارك الحاجة اللي احنا معانا بس زي ما صديق حضرتك بيقول (مستر انونيموس ) التعليق الااولاني اني فعلا كده لما حد بيعزم علي مش برفض لانها بتبقي فرصة حلوة اشارك الناس بأني اقعد اكل او اشرب او او معاها بس بعض الناس بتشوف دي علي اانها تناحة زي ما الشخص علق و قال و انا شايفة لو مش قد العزومة متعزمش و خلص نفسك بس فكرة انك تتكسف و تعزم لا دي محبهاش اصلا و شكرا علي البلوج الجميل ده امتعني بجد
    مس سارة

    ReplyDelete
  7. علي فكره انا بفكر بالطريقه دي بالظبط:D
    باحب لما اقول لحد حاجه تكون من قلبي
    مش مجرد كلمه بقولها رد خانه وخلاص
    وبحس ان لما بعمل ده عن حقيقه جوايا مش تمثيل
    الناس بتحس فعلا بالمحبه دي
    شكرا د .ماجد علي المقاله دي
    في حاجات كتير فعلا جوايا بس مش باعرف اعبر عنها اوي وبلاقي حضرتك بتعبر عنها
    بطريقه واضحه جدا وجميله jesus bless u

    ReplyDelete