Thursday, November 10, 2011

Tattoo

صورة معبرة جداً.. الراجل ماخللاش حاجة.. ال tattoo اللي عايزه واضح زي الفل ومعاه الرسمة واضحة أهي.. أمّال المشكلة فين؟

مرات كتير بيبقى الحلم عندي صريح وواضح وقادر أرسمه بشكل كامل.. معايا "الورقة" وكله تمام.. لكن باتحرك ناحية حد ممكن يبوّظ الدنيا..

هو الراجل دة كان المفروض يعمل إيه؟ مايرسمش ال tattoo  يعني؟ يأجّل؟ يتناقش مع حد فيقوله لو حرام أو حلال؟.. أعتقد لأ..

أعتقد إن مع وضوح حلمي أنا محتاج إني أنفذ حلمي بوضوح.. ولما الموضوع يتعلق بناس تانية أنا محتاج أتأكد إني باستعين بالشخص الصح.. خصوصا لو بنتكلم في قرار مصيري.. هجرة مثلا.. جواز.. طلاق.. تغيير لمجال الشغل.. خلفة.. تفرّغ لعمل خَدَمي أو روحي أو سياسي.. اختيار رئيس للجمهورية.. tattoo يمكن مش سهل يتشال..

طبعا القرارات المصيرية ومدى "مصيريتها" بتختلف من حد للتاني.. لكن أنا محتاج إني أتأكد إن مش بس "الحلم" إلي حد كبير واضح.. لكن كمان وسايل التنفيذ –بقدر الإمكان- مش هتكون بتعطّل..

أعمل إيه لو أنا مقبل على قرار للهجرة؟ أو تغيير لل career؟ أو أي قرار أو حلم أنا شايفه كبير؟

جرّب قبل ما تاخد القرار إنك "تستكشف" وتجيب أكبر قدر من المعلومات تقدر تعرفه عن طرق تنفيذ الحلم.. اقرا واعرف عن البلد الجديدة (أو مرشح الرياسة أو الراجل اللي بيعمل tattoos).. المعلومات سلاح.. وممكن تسهل حاجات كتير قدام..

اسأل عن اللي فات.. من أهم الحاجات اللي أي صاحب عمل بيشوفها في أي CV هي خبرات الشغل السابقة.. لو أنا صاحب عمل مهم أعرف إنت اشتغلت فين قبل كده وفي إيه ولمدة قد إيه.. دة أهم بالنسبالي من energetic, work in teams and under pressure! مش كده؟ اعتبر نفسك صاحب عمل وانت بتقيم المرشح أو اللي هيعملّك ال tattoo أو اللي نازل انتخابات مجلس الشعب.. عمل إيه قبل كده؟ إيه إنجازاته؟ لو حد اشتغل بنجاح قبل كده حتى لو في مجال مشابه في أغلب الظن هيقدر يكون بيدّي في مجالات تاني كمان..(لو حد "حارب وقتل واتقتل" غالبا مش هتكون عايز تعذبه تاني!)

لو قادر تعمل حاجة "وَسَط" قبل القرار النهائي يكون كويس.. مثلا.. اتطوع لمدة شهر في المجال اللي نفسك تغير ال career  ليه.. وشوف يمكن تتبسط أو لأ.. جرّب تزور البلد اللي نفسك تهاجر ليها.. بدل ما "تتدبس" لما تروح وتكتشف إنها مثلا ساقعة قوي.. أو الناس فيها مش مرحبة أو أي حاجة تاني يمكن صعب تعرفها من مجرد القراية عنها..

اسأل مجرّب.. شوف ناس اشتغلت أو اتعاملت مع المرشّح دة.. حد جرّب شغل الشخص اللي انت ناوي تشاركه.. حد هاجر للبلد دي.. حد ذاكر نفس ال program اللي بتفكر تعمل فيه دراسة..

على الرغم إن حلمي ممكن يكون متفرّد ومش عند حد تاني.. إلا إن حلو إني أستخدم كل الأدوات المتاحة عندي عشان أعرف إزاي أحققه بقدر كويس من النجاح..

وبالنسبة للصورة.. أنا مستغرب إن الراجل اللي بينفّذ ال tattoo سمح لحد إنه يصوّر وهو شغال!.. ثقة برضه.. مش كده؟ :)

7 comments:

  1. Brilliant as usual .You got to the point . Yes , we have to take good care of our choices as you said ,lest the tattoo yetla3 3asfoora !!!! The picture put a big smile on my face , soooooo mo3abbera :)) Thanks ya Maged. N

    ReplyDelete
  2. Great Article.... We imigrate and then complain it is cold... and I am speaking for myself.

    ReplyDelete
  3. بوست عظيــــــــــم مش رائع بس . وعندك كل حق لأني بمريت بموضوع القرارات الميرية دا كتير . انا بقترح تجمع بوستاتك دي ف كتاب يا ماجد . بدون مبالغة هيكسّر الدنيا. دمت مبدعا :)

    ReplyDelete
  4. i liked the photo ,
    but i have more and different variables for my goals.

    ReplyDelete
  5. Really great people make you feel that you, too, can become great

    ReplyDelete
  6. لأن الانتخابات البرلمانية أو حتي الرئاسية هي الشغل الشاغل حالياً...أنا أتمني انك تقدر تستغل قدرتك المذهلة في تبسيط الأمور وتشرح خطورة وأهمية البحث في تاريخ المرشحين ودفاترهم القديمة لعشرة علي الأقل من الناس في الشارع المصري المحبط قبل محاصرته بأبواق الزيف والخداع من أصحاب المصالح المستترة،وكل واحد من العشرة دول يكلم عشرة وهكذا(نور "بتشديد الواو" لعشرة بس) ..أظن حاجات كتير هتتغير (ده لو مبتعملش كده فعلاً).....تدوينة مبهرة،إستخدام التاتو للتعبير عن فداحة الخطأ وصعوبة أو إستحالة تصليحه،أكثر من رائع وفي محله جداً..والصورة إضافة قوية لتبسيط الفكرة.....بس سؤال:هو ممكن الفوتوشوب يكون اتعمل للصورة اللي عايزها الراجل تكون التاتوو؟!!

    ReplyDelete