Tuesday, November 15, 2011

سيبه يعيّط

شكلك متضايق النهاردة
آه فعلا.. متضايق.. مفتقد حد بشكل محزن جداً..
طب محتاج حضن؟
لأ.. أنا مش ضعيف للدرجة دي!

حوار حقيقي حصل النهاردة قدامي.. 4 جمل خللوني أفكر مرة تاني في المشاعر والاحتياجات.. إحنا رايحين فين؟

"أنا مش ضعيف للدرجة دي!"؟ درجة إيه؟ إنك تحتاج حضن من صديق؟ إنك تحس بإن واحد حاسس بيك؟ 

من أجمل الحملات اللي شفتها كانت حملة Free Hugs والراجل اللي بدأها بدأها لما اضطر إنه يرجع بلده.. وعلى المطار مالاقاش حد مستنيه.. وشعر كما لو إنه سايح في بلده! طلع لوحة وقلم وكتب Free Hugs (أحضان ببلاش).. الناس الأول استغربت.. لكن بعدها بدأت الناس تيجي وتتكلم معاه.. تشاركه مشاكلها.. فيه ناس حضنته.. وفيه ناس قالوله إن الحضن ده فرق جدا في يومهم.. الحملة كبرت خصوصا لما الشرطة "منعت" الحملة فبدأ الراجل يجمع توقيعات من الناس..



استغربت من نفسي لما لقيتني باتخيل مشهد أي واحد بيبكي.. إيه أول جملة بتيجي في بالك؟ إيه أول حاجة بتقولهاله؟
"ماتبكيش!".. "ماتعيطيش".. "مش عايزك تبكي"!
كأني باقوله: "ماتعبّرش".. "ماتخرّجش اللي جوّاك".. "مش عايزك تسيب نفسك على راحتك".. "ماتحسّش"..

وطبعا الجمل التقليدية بتاعة "الراجل مايعيّطش" (طبعا الغدد الدمعية ربنا خالقها "زيادة" في الراجل!) أو "ماتعيّطيش.. كل حاجة هتبقى كويّسة"

في الوقت اللي فيه بابكي باحتاج إيه؟ باحتاج حد "موافق" إنه يشوفني بابكي.. حد "متواجد" جنبي.. مايعملش حاجة.. ماينصحنيش.. ما يحاولش يخلليني أبطل أبكي..

في الوقت اللي بابكي فيه مش محتاج حد يطبطب عليّ عشان أسكت.. مش محتاج حد "يهدّيني".. مش محتاج حد يدّيني منديل (حركة في منتهى الاستفزاز...بجد.. وإن دلّت على شيء فبتدل على إنك مش عايزني أبكي قدامك أو يمكن عايز تساعدني "أشيل أثر الجريمة"!)

هيحصل إيه لما هتبكي؟ كده يعني مابقتش راجل؟ كده رجعتي عيلة صغيرة؟ كده بقيت ضعيف؟

عايز أرجع أتلامس مع الطفل اللي جوايا.. اللي بيتبسط قوي.. وبيبكي قوي.. اللي مش همه شكله يبقى إزاي.. اللي بيعبر عن اللي جواه زي ما هو.. من غير مقدمات.. من غير ذواق..

هيحصل إيه لما تطلب من صاحبك حضن؟ لما تطلبي من أمك إنها تضمك؟

أصحابك اللي بيبكوا قدامك بيثقوا فيك.. وشايفينك حد يقدروا يكونوا "معرّضين" vulnerable قدّامه.. بدل ما تمنع صاحبك من إنه يبكي قدامك.. اسمعه.. كون متاح.. اسكت.. وسيبه يعيّط!

19 comments:

  1. نا لما باشوف حد بيعيط .. باديله منديل .. لازم .. أمال هسيبه يقعد يسحسح ويقرفنا ؟
    ده يا زاخر مالوش دعوة بالتعاطف الانساني .. ده : عطاء إنساني وكرم :)

    ReplyDelete
  2. Maged,
    Thanks for bringing back humanity to our culture! Really really thank you!!!
    Love you so much wa da mesh da3f, di 2owa.
    Misho

    ReplyDelete
  3. بجد شئ جميل بس صعب الناس كلها تفهو هنا في مصر

    ReplyDelete
  4. ياااه يا ماجد ! جيت على الجرح ..فعلا ،محتاجين هذه المشاعر الإنسانية الراقية الرائعه ،نعبر عنها و تخفف عنا .لا أملك إلا أن أشكرك أيها العبقري المبدع N

    ReplyDelete
  5. بعض الكلمات لا تحتاج الي تعليق وهذا ليس تقليلا منها ولكن مهما تكلمنا لن نوفيها حقا فالسكوت هنا أبلغ من أي كلام . أبدعت يا ماجد :)

    ReplyDelete
  6. "قصة رائعة التي أوردها المؤلف "ليو بسكاجيا" والذي طلب منه أن يكون حكما في مسابقة لأختيار أكثر الأطفال حنية ( من الحنان ) وأكثرهم اهتماما بالأخرين يقول خضت المسابقة وكان الفائز الأول بلا منازع هو طفل في الرابعة من عمره وتتلخص حكاية الطفل فيما يلي:



    كان الطفل جالسا في فناء البيت ولاحظ أن جارهم المسن كان جالسا في حديقة منزله ويبكي بحرقة بعد أن فقد زوجته التي توفيت وتركته وحيدا , عندما شاهد الطفل ذلك المشهد ذهب الى الجار وجلس في حضنه , وعندما عاد بعد فترة سألته أمه ماذا صنعت مع ذلك الجار أجابها:
    " لا شيء .. لقد ساعدته على البكاء

    thanx GOD 4 my friends who leaves me cry and keep speaking , looking to my eyes not my tears.

    ReplyDelete
  7. للاسف الحملة دي مش هتنفع عندنا في مصر بس انا سمعت واحد عمل حاجة ري دي إنا اسمها عاوز اسلم عليك والناس بقت تسلم وتتفاعل لكسر حواجز الغربه في الشارع. فعلا احنا محتاجين نتواصل اكتر من كدة خصوصا ان في ناس اصلا احساسها بيزيد اكتر بالتلامس يعني لما تكون بتكلم حد وتحط ايدك علي كتفة دا بيخلي الكلام اكثر حميمية او لة شديت علي ايدة دا بيعمل سخر في النفس

    ReplyDelete
  8. Maged.. I read the article and the comments as well. You drawing groupies...
    Last week the Leader of support group said something similar. You'r crying makes me uncomfortable so stop being uncomfortable and think of your friend's feeling. Just be there.
    Thanks maged... as anonymous said "Brilliant"

    ReplyDelete
  9. عندك حق يا ماجد محتاجين اوى نحس ببعض ونقدر مشاعر بعض
    وبنقى متحاجين فى اوقات نعيط بس لاننا مش قادرين نعبرعن ال جوانا وبتريح اوى لما تلاقى ال تترمى فى
    حضنه ويحتويك ونحس بصدق تعاطفه معاك حتى لو ما اتلكلمش معك ولكن تشعر بصدقه

    ReplyDelete
  10. Maged, this is simply amazing. Be blessed.

    Missed you my friend

    ReplyDelete
  11. في الجيش بيختلف الموضوع يا ماجد

    ReplyDelete
  12. ana nefsy el 7agat di tnzel 3la facebook awo lawo already nazla ana nefsy asherhaa 3shan kol el nas t2rahaa

    ReplyDelete
  13. No comment.

    fe3lan 3iza a3iat bas 3lashan a3'sel 3nia we a3raf ashof odami!!

    S.

    ReplyDelete
  14. هو انت صح وانا متفق معاك ف كل حاجه بس ف مصر؟؟؟صعب
    انت هنا عندك مشكلتين مع كل الناس الي هنا
    اولا انه اتعلم انه عيب يعبر عن مشاعرة من وهو صغير
    ودي مقدور عليها
    والمشكلة التانية الي طاغية ع الكل ان محدش بيسمع حد

    ReplyDelete
  15. لو الحملة دى اتعملت فى مصر اكيد هتقلب بجرسة :)

    ReplyDelete
  16. واااااااااااااااااااااااااو حلو ه اوي فكره free hugs دي فعلا
    احنا فعلا محتاجين نعبر عن مشاعرنا ولما نلاقي حاجه كويسه في غيرنا نششجعه بيها
    احنا محتاجين فعلا ده

    ReplyDelete