Saturday, November 5, 2011

أوّل إيميل


أول إيميل كتبته في حياتي كان بالظبط من 13 سنة.. وأفتكر إن الموضوع أخد مني يمكن ساعة عشان أكتب إيميل قصير.. بعت الإيميل  ده لأختي.. وجه الرد بتاعها مبسوطة بإننا قادرين نتواصل عبر القارات في وقت سريع جدا وقالت حاجة بما معناه إني هأكسل بعد كده أكتب جوابات عادية بما إني بأكتب emails !أنا طبعا استغربت الجملة جدا.. حسيت إنه أكيد لأ.. ده أنا كنت باخد وقت طويل قوي عشان ألاقي الحروف على الكيبورد (حاجة تقرف!)..

كان شعوري وقتها إن اللي عمل ترتيب الحروف على الكيبورد بالشكل ده حد رخم!.. قاصد يخللينا نطفش عشان نكتب جملتين على بعض!

اللي يضحّك إني حاليا(و بعد 13 سنة) باكتب البوست ده على كيبورد مافيهوش حروف عربي على الزراير.. أنا عارف أماكنهم وباكتب بسرعة معقولة!

ال Qwerty System هو النظام اللي بيستخدم الحروف بالترتيب اللي موجود في الكيبورد للكومبيوتر اللي بتقرا عليه البوست ده أو حتى تيليفونك لو فيه كيبورد كامل.. qwerty هي كلمة بتجمع أول 6 حروف في أول صف في الكيبورد

كلمة QWERTY هي كلمة بلا معنى لغوي ومعظمنا من اللي بيتكلموا إنجليزي يعرف إن تقريبا كل الكلمات اللي فيها حرف Q بييجي بعده حرف U لكن الكلمة دي ليها علاقة بالكومبيوترات ومن قبلها الآلات الكاتبة..

لو جربت تسأل مجموعة من الناس: هو ليه ترتيب الحروف على الكيبورد موجود بالطريقة دي؟ ممكن الإجابة تكون"أصل دي أحسن طريقة عشان يبقى فيه سرعة في ال typing" أو "أكيد عملوا دراسة على أنهي حروف بتيجي مع بعض كتير وقربوها من بعض" أو "عشان إن لو ترتيب تاني هيبقى صعب أحفظه" أو "ماعرفش".. (لو حد من أصحابك قال الإجابة الأخيرة حاول تتأكد من جنسيته وإذا كان مصري أصيل وللا مخلّط!) :)

المهم.. قعدت أدور على سبب الترتيب بالشكل ده لقيت إن أول واحد عمل أي ترتيب مقترح كان كريستوفر لاثام شولز والترتيب اللي كان مقترحه كان على صفين اتنين بس (شبه البيانو) وكانت الحروف بنفس الترتيب الأبجدي..

مشكلة الترتيب ده كان في إن الtypebars  اللي هي زي الشواكيش بتاعة الآلة الكاتبة كان بيحصل فيها jamming يعني بتخبط في بعض وبتعلق المكنة.. فبدأ نفس الراجل ده في محاولات عشان يغير ترتيب الحروف شوية بحيث يبعد الحروف اللي بتستخدم كتير مع بعض عن بعض..

أحد القصص اللي بتتقال إن كمان كان أحد الأهداف لترتيب الحروف اللي موجود دلوقتي هو إنه "يبطّأ" السرعة بتاعة اللي بيكتب فما يحصلش تداخل بين الشواكيش دي.. المهم إن الراجل توصل للترتيب ده سنة 1878

تخيل؟
يعني إيه علاقة ده باللابتوب؟ وبالكومبيوتر؟ إيه علاقة ده بالتيليفون اللي عليه كيبورد كامل؟ وليه مضطرين النهارده بعد أكتر من 133 سنة لاستخدام نفس الترتيب؟
ولا حاجة!

لكن بسبب انتشار الترتيب صعب قوي إن حد يجرؤ يقدم ترتيب مختلف.. على الرغم إن لا فيه شواكيش ولا حبر ولا أزمة في مساحة ولا أي حاجة..

الوقت كفيل بحاجات كتير.. ساعات ناس بتدي للوقت أهمية العلاج.. الوقت بينسّي والوقت بيعمل حاجات كتير.. لكن كمان ساعات الوقت بيقلب حقايق ويغير مفاهيم..

اعتيادنا على حاجات معينة بيخلينا نفترض إن اللي موجود هو أحسن حاجة.. أفضل طريقة.. أسهل وسيلة.. وإلا أكيد كانوا فكروا في حاجة تانية..

"هي بلدنا كده".. "الشعب ده مايمشيش غير بالطريقة دي".. "لازم اللي يحكم يكون دكتاتور".. "صعب جدا يبقى عندنا وضع مختلف"
عايز أقوللك: مش شرط.. حاجات في حياتنا وفي بلدنا وفي عائلاتنا موجودة لمجرد إنها موجودة.. لأن ماحدش فكر في إن ممكن طريقة تانية تبقى أفضل..

فيه كام qwerty system موجود في حياتي؟ فيه كام حاجة أنا مفترض إنها أكيد الأنسب؟ فيه كام عادة أو تقليد أو فكر أو عُرف أنا متأكد –من غير دليل- إنه هو الصح؟

التغيير بياخد سنين.. وعادة بيبدأ بواحد بيستفسر عن حاجة "مسَلّم" بيها.. حاجة تقريبا "غير قابلة للنقاش"

هل ممكن ابني كمان كام سنة يتريق على جيلنا إننا فضلنا نستخدم ترتيب للحروف على الكيبورد بدون أي سبب؟ أو فضلنا خايفين من ديمقراطية حقيقية؟ أو فضلنا مصدقين إن ماينفعش يبقى عندنا أفضل جامعات ومدارس ومستشفيات؟

يمكن مانغيّرش ال qwerty system   لكن قدامنا كتير نغيّره.. كل حاجة ممكن تتغيّر.. التغيير مش مستحيل..

19 comments:

  1. الإرادة والثقة بالنفس والعمل " ثلاثة عناصر كافية لأن ترف الإنسان الي عنان السماء .. بوست هايل يا ماجد

    ReplyDelete
  2. Great .....thank you maged...I got your point...especially the

    التغيير بياخد سنين.. وعادة بيبدأ بواحد بيستفسر عن حاجة "مسَلّم" بيها.. حاجة تقريبا "غير قابلة للنقاش"

    ReplyDelete
  3. أنا كمان كنت بدرو ليه الترتيب كدا ,بس ماكنتش عارف السبب!!! برافو!

    ReplyDelete
  4. افتح الصورة لتجد التعليق
    http://i42.tinypic.com/11mgk86.gif

    ReplyDelete
  5. Years ago I decided to think this way about my quit time, I admit how much I enjoy it since that ....Have my vote.

    Joanna

    ReplyDelete
  6. As usual you come the deep inside of what we name it "Facts" to show it and say there is nothing fixed in our life, everything could be changed.
    Thanks Maged for this post and all your posts

    Rababoush

    ReplyDelete
  7. I'm only one out of the many people you influence, but I don't think I'm the only one waiting for the day when you would write 31 posts per month, at least one every day; a new inspiration every brand new day!

    ReplyDelete
  8. maged sob7y 's POST is outstanding ! =D

    ReplyDelete
  9. speechless !!!!!!!

    thinking - searching - knowledge

    TASFEEEEEEEEEEEEK 7AAAAAAAAAAAAAAAAAAAAAAAD :)

    ReplyDelete
  10. التغيير محتاج شجاعة وجرأة كبيرة،ودي مهمة المفكرين الشجعان انهم يشجعوا البسطاء الخوافين علشان يحصل التغيير!! بوست رائع ومختلف..أحييك وأشكرك

    ReplyDelete
  11. Great article....Thanks Maged.
    I wanted to write a short comment... 6 pages notes... so i'll do it next time.

    ReplyDelete
  12. أنا كمان قرأت عن موضوع الكي بورد مقال بيقول إنهم بيفكروا يعملوا واحد بالترتيب الابجدي للشباب اللي ما شافش الاله الكاتبة ، يعني يقدر يتعلم علي ميه بيضا

    كتاباتك بتشد و حقيقية ، أنا أولادي مش متخيلين حياتنا كانت إزي بدون إنترنت و موبيل و الخ الخ

    و الايمان بالقدرة علي التغيير هو المهم في المرحلة ديه

    علشان كده مهم جدا الشباب المثقف و الواعي واللي بيغرد خارج السرب ، هو اللي يقود

    Revnia II

    ReplyDelete
  13. Amazing . Thanks ya Maged .

    ReplyDelete
  14. Amazing . Thanks ya maged .

    ReplyDelete