Friday, November 18, 2011

قزازة أمل

فيه في التجارب الطبية نوعيّات مختلفة من الأبحاث..  وعشان يجرّبوا دوا جديد مثلا لازم يكون فيه مجموعتين من العيانين.. مجموعة بتاخد الدوا.. ومجموعة تانية مش بتاخد الدوا (بيسموها control group) بحيث يقدروا يقارنوا النتايج.. وطريقة من طرق تقسيم أنواع التجارب دي بتعتمد على مدي معرفة المريض بإنه بياخد الدوا الجديد اللي بيجربوه وللا لأ..

ففيه مثلاً نوع من التجارب اسمه blind study وفي  النوع ده ال control group بتاخد حاجة شَبَه الدوا بالظبط في كل حاجة ماعدا في المكوِّن العلاجي..عشان يبقوا حاسّين نفس إحساس المجموعة التانية اللي بتاخد الدوا بجد..وفي الحالة دي كل العيانين بيتصرفوا على إنهم بياخدوا الدوا بحيث إن العيان مايكونش متأثّر على المستوي النفسي لأن ده ممكن يؤدي لنتايج مالهاش علاقة مباشرة بالقدرة العلاجية للدوا..

لكن فيه نوع تاني من التجارب بيسموه ال double blind studies وفي النوع ده لا العيان بيبقى عارف.. ولا كمان الدكتور.... بحيث إن النتايج تبقى حيادية لأقصى درجة..

ليه بقى؟
لأنهم اكتشفوا إن لو الدكاترة المعالجين عندهم "أمل" في الدوا الجديد اللي بيحاولوا يشوفوا تأثيره.. عادة بيكون عندهم ميل –من غير مايقصدوا- إنهم ينقلوا الأمل دة للعيانين... وفي كتاب لفيليب يانسي بيقول إن الدكاترة دول ممكن ينقلوا الأمل ده في ابتسامة.. في كلمة تشجيع.. في انطباع على الوش.. في طبطبة على كتف عيان.. وكل جرعات الأمل دي من شأنها إنها تزود النتايج الإيجابية في صف الدوا..

التصديق اللي عند الدكتور إن الدوا ده ممكن يبقى مفيد بيتنقل للعيان وبيتنقل معاه "عدوى" مشجعة للعيان ولجسمه على إنه يستجيب للدوا..

لولا الفرق الواضح في النتايج ماكانوش لجأوا لل double blind studies وخبّوا على الدكاترة كمان.. الفرق الواضح ده نتيجة بس "للأمل"..

وسط كل حاجة صعبة ومؤلمة في الحياة.. مع كل تحدّي ووقت فيه وجع.. فيه "عيان" "بيتلكك" عشان يسمع كلمة أمل.. صديق يمكن يكون الفاصل بينه وبين الاكتئاب هو شعاع ضوء بسيط قوي أنا وانت بننوره.. يمكن من غير مانقصد.. زي الدكاترة دول اللي كانوا "حقيقيين" في رغبتهم في نجاح الدوا..

شعاع نور صغير بيفك ضلمة رهيبة.. كلام أمل بسيط ممكن يغير مصاير.. نظرة فيها إيجابية ممكن تحوّل حياة بني آدم..

ده احنا في إيدينا قوة للدرجة اللي فيها اضطروا "يخبّوا" على الدكاترة مين بياخد الدوا عشان العيانين "ماتخِفِّش" أسرع والنتايج تبوظ!

مع كل حد حواليّا بيتألم.. أنا عندي فرصة إني "أنوّر" حتة أمل قدامه.. يمكن كلمة أو جملة أو ابتسامة تفرق.. يمكن تعليق أو طبطبة أو سمع بإنصات يساعده "يخفّ"..

خلليك جاهز.. حواليك ناس مش ناقصها غير شوية صغيرين من قزازة أمل..

15 comments:

  1. بيعجبنى فيك الاسقاط اللى بتجيبه من العلوم وتسقطه على الواقع انت مبدع :)

    ReplyDelete
  2. هتكلم عن نفسي .. كلامك بيجبلي في وقته
    الكلام دا مُقدر أني اقراه و في الوقت دا بالذات!
    انت .. سبب
    =)

    ReplyDelete
  3. نفس كلام التعليق السابق .. برضه حاسس ان الكلام دا مقدر لي اقراه دلوقتي .. وان كنت انا في الاصل بتلكك للامل :)

    ReplyDelete
  4. Sometimes all we need is placebo. Enlightening as usual.

    ReplyDelete
  5. انت رائع يا ماجد ومجرد رؤيتى ليك بيخلينى اتفائل وبتدينى امل :)

    ReplyDelete
  6. وضحتلي نقطة مهمة مكنتش فاهماها في الترايالز بتاعت الادوية ...مكنتش اعرف ليه مبيقولوش للناس اللي مش بتاخد الدوا انهم فعلا مش بياخدوه!!

    والبوست ده فكرني ببوست قريتهولك امبارح بتاع free hugs

    متابعاك بقالي 3 بوستات كده..وحقاً مستمتعة بشدة

    ReplyDelete
  7. Hay Fantastic again. Hope what a great concept. Thanks.

    ReplyDelete
  8. ياخالق الكون بالحساب والجبر
    وخالقنى ماشى بالاختيار والجبر
    كل اللى حيلتى زمزمية أمل
    هاتكفى إيه دى غير لحد القبر
    وعجبى

    صلاح جاهين ...
    :)

    ReplyDelete
  9. right words in the right time

    ReplyDelete
  10. Sometimes Faith alone is enough, more than enough even against all logic !

    ReplyDelete
  11. Thanks Maged for this fantastic touching post . You live what you say.You gave and still giving "hope" and spreading it to all those around you . God bless you . N

    ReplyDelete
  12. لا فض فوك يا دكتور
    بجد كل واحد فينا مستنى جرعه من زجاجه الامل
    الكلمه دواء والامل اول طريق الشفاء
    سعيده جدا لمعرفه طريق مدونتك
    ولى رجعه مره ثانيه لقراءه باقى الموضوعات
    اشكرك استمتعت هنا

    ReplyDelete
  13. عن تجربة: جرعة "أمل" اعادتني إلى الحياة .. أو علي اقل تقدير .. اعادة رغبتي في الحياة

    ReplyDelete
  14. I think that I am one of the people who need that kind of light ,, I love it.

    ReplyDelete
  15. بجد أكثر من رائع يا دكتور ماجدإيمان العزب

    ReplyDelete