Wednesday, August 13, 2014

انتحار مش تقليدي

أحد الظواهر الموجودة في الاستبيانات اللي بتطلب من الناس اختيار إجابة من بين مجموعة اختيارات هي ظاهرة بيسموها ال Primacy Effect   وفيها بيبقى ملحوظ إن الناس عندها ميل أكبر لاختيار "أول اختيار ينفع" من مجموعة اختيارات كتير. أول إجابة تبان أنها صح.. وعشان كده لقوا إن فيه تحيّز أكبر للاختيارات الأولى (مثلا من 1 ل 5 لو عدد الاختيارات عشر اختيارات) في حين إن نفس الاختيارات دي لو اتعكس ترتيبها، برضه بيكون فيه ميل لاختيار "أول اختيار يبان صح".

الأزمة في الموضوع ده إن ما بيكونش فيه فرصة لاختيار اختيار "أفضل" أو "أحسن" أو "أدق" لأني "بأتخمّ" في أول حاجة شكلها صحيح.

الموضوع ده موجود في التواصل بشكل عام. وإحدى النظريات اللي بتشرح التواصل بتتكلم عن فكرة إن العقل بيدوّر على أكتر معنى ليه علاقة بالموضوع بأقل مجهود ممكن. مش مجرد إن العقل بيدوّر "في كل المعاني المحتملة" لجملة معينة.. لأ.. أقرب معنى. وإلا المخ مش هايلاحق على فلترة كل الكلام اللي بيتقال.

افتكرت الموضوع ده مع خبر موت روبين ويليامز وردود أفعال وتعليقات ناس كتير على الخبر. هاسيب التعليق على الخبر نفسه وفكرة الانتحار، وهاسيب التعليق على "الهري" و"الفتي" بحسب تعبير ناس كتيرة، وهاسيب التعليق على حُرمانية الانتحار من عدمها. هاسيب كمان مناقشة هل المنتحر يُعتبر مريض نفسي يستحق التعاطف، أو مُجرم قرر ينهي حياته اللي هي مش ملكه.. وبرضه هاسيب الوعظ والنصايح والتأملات في مدى فايدة حياة المشاهير، وهل هم بجد سُعدا وكل الكلام ده.. هاسيب كل المناقشات دي، لأنها بالنسبالي هي تحت فكرة "أول حاجة بتيجي في البال" لما بنسمع عن خبر انتحار.. وإذا كان روبين ويليامز كوميديان فأعتقد إنه هو شخصياً لو شاف المناقشات "البدائية" دي كان ممكن ببساطة يبتسم ويحس إن الانتحار كان أحسن قرار ياخده!

لكن اللي حابب أفكر نفسي بيه هو الآتي: حواليّ ناس كتير انتحرت من زمان.. وقّفت حياتها. أنهت عُمرها.. من غير ماتاخد منومات ولا تشنق نفسها بحزام ولا تقطّع شرايينها.. ناس باينين أنهم لسّة "صاحيين وبيلعبوا".. بيشتغلوا، وبيتجوزوا وبيخلفوا وبيذاكروا وبيتفسحوا.. وبيصلوا وبيصوموا.. كأنهم عايشين بالظبط!

انتحروا لما حسّوا إن مالهمش قيمة.. انتحروا لما حسّوا إن حياتهم ماتساويش أي حاجة.. انتحروا، بس قرروا يفضلوا يتنفسّوا ويفضل قلبهم يدق.. جايز مكسوفين أو خايفين أو مستحرمين "الانتحار التقليدي"..

على قد ما بيكون موت أي شخص مؤلم، على قد ما بيكون مؤلم أكتر موت ناس كتير حوالينا فاكرين إنهم عايشين.. هم فاكرين إنهم عايشين، وإحنا فاكرين إنهم عايشين!

يمكن يكون صعب إني أمنع حد من أنه يربط حزام حوالين رقبته عشان يموّت نفسه، لكن أخاف أكون يومياً بأساعد ناس إنها تنتحر! خايف أكون في تعليقاتي أو عدم تعليقاتي أكون بأخلي ناس بأتعامل معاهم يفقدوا حتة ورا حتة من قيمة وجودهم.. ناس تكون بتنتحر وتفضل باينة أنها عايشة..


التويت اللي في الصورة مبعوتة في فبراير اللي فات من حد بيشكر روبين ويليامز وبيقوله "أشكرك إنك خليتني أضحك جامد جداً. أنا كنت محتاج لكده".. وكان رد روبين ويليامز عليه في تويت بيقول "أنا كنت محتاج التويت بتاعتك دي. أشكرك!"

أتمنى أعرف ألاقي وأميّز الناس اللي بأحبهم حواليّ، وأكون سبب أدعى لإحساسهم بقيمتهم وقيمة وجودهم، سواء بكلمة أو بابتسامة أو بخدمة أو بوقت كافي أقضيه معاهم.. قبل ما يفوت الوقت وأسأل انتحروا ليه، وهايروحوا فين، والسعادة إيه!

9 comments:

  1. It is very sad when someone who has great value to the public, family, friends, relatives, as everybody is and as we all are, and see hope is slipping and pain is endless. Robin is famous but so many aren't. So a nice comment, a smile, an encouragement can go a long way.

    ReplyDelete
  2. Thank you, Maged. I love it.

    ReplyDelete
  3. Simplicity is the main feature of the topics u handle.
    Brilliant as usual.

    ReplyDelete
  4. I like all your posts ..
    Thank you maged :)

    ReplyDelete
  5. صح مش بختلف معاك وفى امثال وايات كتير بتدعو لدا زى "الكلمة الطيبة صدقة" " بس فى احيان اخرى بيبقى فيها المنتحر وهو عايش دا مقدرش يلاقى فى الحاجات او الاشخاص الموجوديين حواليه حاجة تداوى المه. خصوصا المشاهير اللى حواليهم ابتسامات وكلمات جميلة من معجبيين كتير بس فى الحقيقة مش هو دا اللى بيمثل قدامهم الهدف. احيانا لما يفقد الانسان شخص مهم اوى فى حياته مهما كانت كل الناس حواليه بتشجعه وتهديه مش ممكن هيقدروا يعوضوه اللى خسره ممكن يساعدوه يكمل مشاور حياته بس فى الاوقات اللى هيحس فيها ان الشخص دا وحشه اوى مش هيقدروا يتصرفوا ووجودهم عمره ما هيملا فراغه , فى اوقات الانسان بيحس فيها ان حتى الامنيات اللى طول عمره كان بيتمناها لو اتحققت دلوقتى مش هتسعده. وبنظرة اخرى للموضوع منقدرش نعتبر ان تمنى الموت هو تشاؤم لو فكرنا من زاوية ان كل شئ فى الحياه وقتى وغير مشبع وان الحياه الحقيقية مش هنا على الارض وان فى مكان تانى اجمل هرب منه الحزن والكابة والتنهد هنعيش فيه حياه ابدية ومش هنبعد ابدا عن الناس اللى بنحبهم- مجرد وجهة نظر

    ReplyDelete
  6. Brilliant Maged. ..
    Thanks :)
    Rania

    ReplyDelete
  7. Good one , It helped me a lot , thanks.

    ReplyDelete