Thursday, May 10, 2012

السهم المتين

من أبسط الرموز اللي مختلف الثقافات والشعوب بتفهمها رمز السهم.. ببساطة علامة بتشاور على اتجاه أو على حاجة تانية.. وعلى الرغم من أهمية الرمز ومدي جدية الحاجة اللي بيشاور عليها إلا إننا نادرا ما بنبص على السهم نفسه.. عمرنا ما بنشوف مثلا تشريح لجسم الإنسان في كتاب لعلم التشريح ونلاقي سهم بيشاور على غدة معينة مثلا ونقول "يا سلام! أما سهم!.. لولاه ماكناش عرفنا الغدة الدرقية هي أنهي زغميدة في الكلاكيع دي".. ماحدش بيقول كده.. (أو على الأقل مش هتقول كده لو بتذاكر بصوت عالي وفيه احتمال حد يسمعك!)

وطبعا مظلوم السهم.. ماحدش عايز يبقى سهم.. كله عايز يبقى الغدة الدرقية.. أو أي غدة تانية تحمل اسم أكثر رومانسية!
المهم إن في نظريات القيادة والإدارة بدأ من وقت طويل تغيير في مفاهيم بخصوص "القائد".. نظريات زمان كانت بتبص على القائد من منظور "شخصيته".. مولود قائد.. القيادة في دمه.. ونظريات تانية بدأت تبص على القائد "بيعمل إيه" وتحاول تقدم نصايح للناس اللي عايزين يكونوا قادة إنهم يعملوا كده..

لكن الملفت إن فيه توجه بدأ يبص مش على القائد.. مش على أول واحد في المنظومة.. مش على الرسام المشهور.. مش على رئيس الجمهورية.. لكن على "السهم".. على أول واحد "صدق" إن الشخص ده ممكن يكون فنان.. أول واحد "شاور" عليه وقال يا جماعة اقروا للكاتب ده.. اسمعوا صوت المغني الجديد ده..

"السهم" نفسه ممكن صوته يكون وحش.. ممكن يكون مش بيعرف يمثل.. ممكن لا يصلح يكون قائد.. بس من غيره يمكن مش ناس كتير تتشجع إنها "تبص" على واحد هيبقى في يوم من الأيام حاجة..

موسيقيين كتير اكتشفوا فنانين وفي بعض الحالات كمان إدوهم اسمهم.. مدرسين كتير شافوا في طلبة كانوا "شوية أطفال" حاجة كبيرة.. أمهات وآباء.. أصدقاء وإخوات شجعوا وشددوا وشاوروا على واحد شافوا إنه في يوم من الأيام ممكن يبقى قائد..

تشجيعك واقتناعك بحد مش مجرد تصديق فيه.. لكنه بمثابة سهم بيشاور بوضوح على واحد موهوب.. أنا وإنت مش شرط نكون موهوبين.. لكن حوالينا من أصحابنا وزمايلنا طاقات رهيبة.. ينفع نكون بنشاور عليهم.. ومين يعرف؟ ممكن نكون السبب في إن آلاف يسمعوهم ويشوفوهم..


من أحلى الفيديوهات اللي شفتها مؤخرا.. بسيط بزيادة.. بس فيه المفيد.. سيبك من أول واحد وركز في التأثير الكبير لأول واحد تجاوب معاه..


ممكن ماكونش قائد.. لكن ينفع آخد المخاطرة إني أكون أول تابع.. أول واحد شاور على شخص مش معروف ممكن يكون رئيس.. وأكون أول سهم يشاور على قائد أو فنان أو عمل جميل..

9 comments:

  1. raw3a ! begad astfadt w 3agabetny 2wy :)

    ReplyDelete
  2. You realy picked a fantastic topic. The video illustration just incredible. At the end I couldn't figure out who is the leader.
    President Reagan said "There is no limit to the amount of good you can do if you don't care who gets the creditis" Thank you.

    ReplyDelete
  3. Amazing!I guess I'll never be able to pick my most favorite post!!!Keep giving the inspiration ya Maged.God bless.

    ReplyDelete
  4. أكتر من رائع يا ماجد!! شكرا علي إبداعك ده :)

    ReplyDelete
  5. ممتاز جدا و الفيديو ظريف اوى

    ReplyDelete
  6. More than wonderful.
    N

    ReplyDelete
  7. Beautifully written..capturing simplicity..and yes I do believe in that concept..most important is that we recognise the Arrows in our lives..the ones that believed in us day 1 and brought us to where we are! Thx Maged

    ReplyDelete
  8. Every time I read this post, I can't think of any other word but AMAZING! Thank you Maged for the inspiration you never fail to give me. Emma

    ReplyDelete