Sunday, November 6, 2011

العيد فرحة

وإحنا بنِدرِس ترجمة كانوا دايماً بيعلّمونا فكرة إنه ممكن ننزلق (عاجباني ننزلق دي) لترجمة الكلمات حرفياً من غير مانفهم المقصود من وراها.. عشان كده كان بين الخطوة بتاعة "اللغة الأصلية" و"اللغة المترجم إليها" كان فيه خطوة مهمة بيسموها "اللغة الأصلية 2" وفيها بنفهم كويس المقصود في اللغة الأصلية قبل الترجمة..

مش بس جملة "إن شاء الله" هي اللي بتمثل صعوبة في الترجمة لكن جمل كتير تاني زيها..

عندك مثلا "كل سنة وانت طيب".. الجملة دي لو لاحظت من أكتر الجمل المستخدمة على مدار السنة.. ومعناها يختلف من موقف للتاني..

قاعد على قهوة.. بنت صغيرة جاية ناحيتك.. عمو عمو.. هات أي حاجة "كل سنة وانت طيب".. وهنا هي أكيد ماتعرفش عيد ميلادك.. أكيد قصدها هات فلوس..

معدّي في الشارع.. خناقة كبيرة... خلاص خلاص يا جدعان.. فيه إيه.. "كل سنة وانت طيب يا حاج".. يعني كفاية خناق.. دي أيام مفترجة.. (قال يعني الخناق مستحب في أيام تانية)

رايح متأخر على معاد الإنتيرفيو.. الأوفيس بوي.. لا يا باشمهندس دول خلّصُوا من ساعة تقريبا.. "كل سنة وانت طيب".. قصده يغيظك!

إلا إن فيه أيام قليلة في السنة المفروض إن الجملة دي تُستخدم فيها كتير.. زي الأيام دي.. المسلمين في العالم كله بيحتفلوا بعيد الأضحي.. كل سنة وانتوا طيبين بجد..

أيام الأعياد من أحلى الأيام في السنة ومع اختلاف الطقوس من بلد للتانية ومن معتقد ديني للتاني إلا إن اللي بيجمع معظم الأعياد هو الاستعداد "للفرح".. أوقات الأعياد فيها انطلاق وبهجة وإقبال على السعادة بشكل كبير..

لما فكرت في القصة دي لقيت إن الأعياد في معتقدات كتير (يهودية ومسيحية وإسلامية) هي "أمر" من ربنا.. الله سبحانه بيوصي الناس إنهم "يفرحوا"..إنهم "يحتفلوا".. إنهم "يستمتعوا".. إنهم "يقربوا منه" في الأيام دي ويدوقوا سعادة وبهجة مختلفة..

ساعات بننسى الحكاية دي.. بننسى إن ربنا خلقنا بني آدمين عشان نستمتع بإنسانيتنا للآخر.. وعشان نقرّب منه سبحانه وتزيد سعادتنا بيه.. ماخلقناش على فكرة عشان "يجبرنا" على طاعته.. ماخلقناش علشان –آسف في التعبير- "ينكد" علينا.. بالعكس.. ده رتّب أوقات معينة "لازم" فيها نفرح ونتبسط..

مش مصدق قوي؟ شوف الأطفال اللي مليانين براءة.. اللي بنقول عنهم بيحبوا ربنا بالفطرة.. شوفهم بيتبسطوا إزاي في الأعياد.. انطلاق وابتسامات وأصوات عالية.. أحلام جميلة وتطلعات ليوم العيد.. عد تنازلي "لفاضل كام يوم على العيد".. (ننام ونصحي 6 مرات!)

إوعى تكون خايف تفرح.. إوعى تحس إن الفرح بيقلل من "وقارك".. بالعكس..

افرح بالعيد.. افرح بعطية ربنا سبحانه.. فكّر في رموز الاحتفال واشكر ربنا.. افرح بالذبيحة الحيوانية واشكر ربنا على رحمته ورعايته وعنايته ومحبته ليك.. افرح بعيلتك.. افرح بالبركة والخير اللي محاوطاك.. افرح ده أكيد ربنا سبحانه يحب يشوف خليقته سعيدة..

العيد مش بس "للعيال".. "أهو المهم الولد والبنت يتبسطوا".. "لا مش مهم عيدية ولا لبس".. هو بالمناسبة آه مش مهم.. بس مهم إنك تستقبل فرح من عند ربنا ليك..

افرح واتبسط.. لو مش عارف بص في عيون أطفال صغيرة في بيتك أو شارعك أو منطقتك..

وإذا من مواليد أواخر السبعينات أو التمانينات.. أكيد عدّت عليك الأغنية دي.. وإوعي تقول إنك عمرك ما سألت: "هو مين سعد نبيهة؟"!

كل سنة وانت طيب.. كل سنة وانتي طيبة.. العيد "فرحة"


14 comments:

  1. وانت طيب يا ماجد. ظريفة قوي النوت وخصوصاً بدايتها وحديثك عن الترجمة. انا اصلي زميلة مترجمة. وحلو قوي كلامك عن الفرح وضرورته وانه احتفاء بعطية ربنا. انشالله مصرنا دايماً في عيد.
    شكراً يا ماجد.

    ReplyDelete
  2. وإنت طيب يا ماجد.. مبهجة وفيل جود كده..
    يارب أيامك كلها سعادة

    ReplyDelete
  3. كل سنة وأنت طيب :)

    ReplyDelete
  4. كل سنة و انت طيب يا ماجد و عقبال اول كتاب تنشره ان شاء الله :)

    ReplyDelete
  5. صباح البهجة والسعادة والكلام الجميل يا ماجد . كالعادة دائم الإبداع . كل سنة وانت بخير دايما :)

    ReplyDelete
  6. كل سنه وكل الناس طيبه، مش عاجبني ابداً "الموضه" اللي طالعه اليومين دول ان مش بحب العيد ومش بعيد علي حد والعيد بالنسبالي يوم عادي. كفايه تمثيل واستحداث وبلاش نعمل لنفسنا اماثل

    ReplyDelete
  7. كالعادة, رائع و ايجابي و مستنية الكتاب :)

    ReplyDelete
  8. وانت طيب ياماجد فكرتني باية "هذا هو اليوم الذي صنعه الرب لنفرح ونبتهج فيه" كنت بفتكر وانا صغيرة ان قصده علي يوم الأحد بس لما كبرت فهمت ان كل الآيام من صنع رب الأيام والزمن والتاريخ واتأكدتلي فعلا ان القصد من الخلق هو الاستمتاع والبهجة والفرح يارب كل أيامنا أعياد وشوفك دايما لابسة لبس العيد يامصر كل سنة وكلنا طيبين
    Thank u ya Maged
    Joanna

    ReplyDelete
  9. You'r asking us to be happy????? What a great idea. Thanks maged

    ReplyDelete
  10. A great positive post..." Rejoice in the Lord always. Again I will say, rejoice!" Philippians 4:4

    “Our happiness depends on the habit of mind we cultivate. So practice happy thinking every day. Cultivate the merry heart, develop the happiness habit, and life will become a continual feast.”

    Norman Vincent Peale

    ReplyDelete
  11. كل سنة وانت طيب يا ماجد, و اه على فكرة عمري ما سألت مين سعد نبيهة ده, دايماً كنت بسمعها صح :P

    ReplyDelete
  12. أنا كمان كنت باسمعها سعد نبيهه
    :)

    ReplyDelete
  13. Great ya Maged,very simple and deep..I n't only second Marianne..I tenth...waiting for an amazing book(s)..a daily column..a radio or tv talk show..maybe all.THANK YOU

    ReplyDelete
  14. WOWWWWW..Da3wa lel fara7 ? We are all in need of it...Thanks ya Maged for this amazing article .

    ReplyDelete