Monday, April 30, 2012

مش من أخلاقي

الأخلاق من المجالات اللي بتشكّل صعوبة خاصة في مناقشتها أو مرجعيتها.. وعلى الرغم من استخدامنا للكلمة كتير إلا إنها يا إما استُهلِكت أو فقدت معناها.. أو ممكن تكون أخدت معاني كتير بعدد مستخدميها..

الأخلاق مش هي القوانين.. الجملة اللي بحبها وباستخدمها كتير بتقول: القانون هو الحد الأدنى للأخلاق.. لأن في الأخلاق إنت بتحط لنفسك معايير أعمق من القوانين الموجودة.. مقاييس بتصعّب عليك استخدامك للحرية..  وحكاية "بتصعّب" دي هي شخصية جدا.. يعني إنت اللي بتحط المقاييس دي وإنت اللي بتراقب نفسك بتطبقها ولّا لأ.. وإنت اللي بتحس بالإحباط لو تصرفاتك ما كانتش قد المعايير الخاصة بتاعتك.. وماحدش هيلومك لو ماستخدمتهاش

عمري ما أقدر أقول إني عندي أخلاق إلا لو عندي اختيار إني ما أطبقهاش.. لو ماعنديش حرية التصرف إذاً أنا "مضطر" إني أتصرف بالطريقة اللي باتصرف بيها.. أخلاقي وأخلاقك هي اللي بتخلينا "نقرر" نتنازل عن حق أو حرية أو احتياج طبيعي.. نتنازل بإرادتنا.. نتنازل عن طيب خاطر.. ونحس إننا بالتنازل ده بنعمل الصح..

أخلاقك هي اللي بتخليك تسيب حتة البيتزا الأخيرة عشان لو حد من إخواتك نفسه فيها.. وهي اللي بتخليك تسيب باباك يتفرج على الأخبار وإنت نفسك تتفرج على برنامج تاني.. هي اللي بتخليك ماتتكلمش عن تضحياتك ومساهماتك للبشرية..

أخلاقك هي اللي بتخليك مستعد إنك تكمّل تعمل اللي إنت شايفه صح من غير ماتتفشخر قدام الناس.. أخلاقك هي اللي بتخليك تتبع الأسلوب العلمي في الوصول للمعلومات حتى لو المصادر التانية على نفس الدرجة من التأكيد..

أخلاقك هي اللي بتخليك تحط قيود على نفسك إنت مش مضطر تحطها.. لمجرد إنك عايز الخير والجمال يسود والأمل والفرح يكونوا حواليك..

أخلاقك هي اللي بتخليك تراعي بتقول إيه على الإنترنت حتى لو مافيش قانون يمنع إنك تشتم واحد أو تركّب صورة أو تشارك في فضيحة..

مافيش حد يقدر يدعو لأخلاق أفضل.. لأن ببساطة لو كل الناس بقى عندها نفس المعايير هتبقى المعايير دي قوانين.. الأخلاق هي الحاجة اللي بتميّزك.. اللي وقتها تسمع الناس بتقول عنك: فلان عمره ما يعمل كده على الرغم إن ده حقه... أنا عارفه كويس..

أخلاقي بتبان في التعاملات اللي مافيش فيها قوانين واضحة.. ولا وصايا صريحة.. ولا "حلال" و"حرام" متفق عليه..

هيفضل العالم بيحاول يوصل لقوانين ثابتة تنظم العلاقة بين البشر.. لكن هيفضل كل بني آدم في صراعه عشان يوصل للمعادلة اللي في منتهى التعقيد.. اللي فيها توازن مابين إنه مخلوق زي باقي البشر.. لكنه كمان مميز عن الكل..

الأخلاق فوق-البشرية هي اللي فيها بأتنازل عن حقّي رغم إني مش مضطر.. في سبيل الخير والجمال والحق والحرية والحب والأمل.. ومن غير ما أمسك ميكروفون وأتكلم عن قد إيه أنا عظيم!

أخلاقك هي اللي بتخليك تتصرف بالطريقة اللي شايف إنك مفروض تتصرف بيها من غير ما تمشي في الشارع وتقول "مش من أخلاقي"!
 

9 comments:

  1. الأخلاق اهم من العبادات (مع اهمية العبادات) انما بعت لأتمم مكارم الأخلاق

    ReplyDelete
  2. الأخلاق اهم من العبادات (مع اهمية العبادات) انما بعت لأتمم مكارم الأخلاق

    ReplyDelete
  3. مقال جميل , ربنا يزيدك من الافكار الحلوة و الاخلاق الحلوة

    و بالتوفيق
    عزه عارف

    ReplyDelete
  4. صراحة مش لقيه كلمة إعجاب واحدة تعبر عن قد إيه المقالة حلوة
    وأحلى لما احتفظ بيها علشان أقراها مرات ومرات
    دمت لنا
    ودامت لنا مقالات

    S

    ReplyDelete
  5. This is why I believe that the society that pushes certain ethics down the throat of its citizens is not an ethical society by any means (even though it appears so) because it transforms the ethics to laws and deprives its citizens from their freedom to choose to be ethical or not.
    Accordingly, the true test for someone who thinks that he has a great deal of virtue and ethics, is to give him the choice and see what he will genuinely choose!
    Thanks!

    ReplyDelete
  6. الأخلاق هي ما تقوم به في غرفتك والانوار مطفئة

    ReplyDelete
  7. Amazing values that are expressed in simple yet very deep words.Keep the magic flowing ya Maged.So inspiring,THANK YOU!:)

    ReplyDelete
  8. انا بستفيد اويييييييييي جدااا خالص من المدونات دي
    ومبسوطه اوي اننا نكون جيل طالع جديد مش بس بيقرا الكلام الجامد ده لكن
    فعلا نكون بنفذه في حياتنا لو كل حد فينا وانا اول الكل اخد قرار انه يعيش اللي بيقراه ده
    اكيد مجتمعنا كله هيبقي حلو اوي ويتقدم كتير
    انا بشكر يسوع لاجل موهبه ححضرتك دي يا دكتور ماجد
    انا تقريبا كل يوم باقرا كذا مدونه لانها بتفيديني وبتشجعني وباشوف افكار وحاجات جديده فيها

    ReplyDelete
  9. كالعاده يا ماجد , بسيطه وعميقة . نفسي 90 مليون مصري يقراوها كويس وشوفوا اخلاقهم عاملة ازاي .. بافتكر مرة في اليابان حصل زلزال قوي ومفيش حد من الشعب دخل نهب المحلات زي ما بيحصل في دول متقدمة كتير ..ووقف العالم مذهول من اخلاق شعب كوكب اليابان ... في انتظار البلوج الجديد ..

    ReplyDelete