Monday, March 12, 2012

عايش

إمبارح استمتعت استمتاع فوق العادي.. رحت زيارة لكامبريدج واتبسطت قوي..مدينة مختلفة عن أي حتة تاني.. بتجمع بين جمال وعراقة زمان وتقدم ونظام دلوقت.. اليوم كان أكتر من رائع.. المباني والشوارع وأماكن الدراسة.. الطبيعة والعجل اللي في كل حتة والناس.. كل حاجة رائعة..

لفت نظري في مكان في وسط البلد زي خريطة موجودة في ميدان أو صينية صغيرة كده وعليها رسم للأماكن المهمة في البلد.. أماكن ممكن تجتذب سياح أو زوار للبلد.. لكن اللي لفت نظري إن البيانات المكتوبة على الخريطة فيها كمان كتابة بطريقة "برايل" اللي بتساعد المكفوفين إنهم يقروا..

ماكانتش أول مرة أشوف حاجة مكتوبة بالطريقة دي.. لكن عادة الحاجات المكتوبة بطريقة برايل بتبقى "إرشادية" أكتر.. يعني مثلا في الأسانسيرات أو أرقام المكاتب في المؤسسات الكبيرة وهكذا..

لكن إن طريقة برايل تُستخدم في أماكن للفسحة أو أماكن للاستمتاع! إزاي؟

إنت عايز تقوللي إن الكفيف هييجي عشان يلف في البلد ويقضي وقت؟ عايز تفهمني إنه هيرتب يوم أجازته إنه ينزل "يتفسح"؟ مش ناقص غير إنه يركب مركب عشان "يتفرج" على المناظر الطبيعية!

نظرتنا للمكفوف عاملة إزاي؟ هل باشوف المكفوف على إنه واحد من حقه الحياة؟من حقه يعيش؟ ولّا من حقه حاجة أكتر شوية؟ من حقه "يستمتع" بالحياة..؟ من حقه "يتبسط"؟.. مش بس من حقه إنه "نحميه" عشان "ما يتخبطش".. أو بس من حقه يعرف يوصل المشوار اللي "محتاج" يوصله..؟

مصيبة.. في حياتنا فيه ناس ممكن نحطهم في خانة اسمها "ماهم عايشين أهم".. وكل اللي نحاول نعمله هو إننا نوفر لهم سبل "الحياة" بحيث يكونوا بيعانوا أقل قدر من المعاناة.. على الرغم إنه مش ده اللي بنختاره لنفسنا.. أنا باختار لنفسي إني أعيش وأتبسط وأفرح وأشعر بقيمة.. مش مجرد أتنفس لحد ما أموت!

بعض المجتمعات بتحاول تخرج من الحكاية دي.. المجتمعات دي بتبص على المسنين والأطفال وذوي الاحتياجات الخاصة على إنهم بني آدمين كاملين! من حقهم يعيشوا الحياة "للآخر"..

يا ترى إحنا بنبص إزاي؟ بنبص إزاي على أمهاتنا مثلا؟ على جدك وجدتك؟ على حد فقد إيد أو رجل؟ على حد مش لاقي شغل أو سكن؟ يا ترى ممكن أتخيل إن جدي نفسه يسافر يتفسح؟ هل مسموح إن جدتي يبقى نفسها تشتري لبس جديد؟ إن جاري الأعمى عايز يروح يتعشى في مطعم فاتح جديد؟

أنا وانت وشباب كتير علينا مسئولية.. ولو فضلنا بنشجع التوجه بتاع "أهو حسن الختام".. "هو أنا هاخد زمني وزمن غيري؟".. "أهو رسالة وبنأديها.." هنوصل لمرحلة نتحرم فيها عند سن معين أو مرحلة معينة أو تحدي معين.. من إننا نعيش عيشة "للآخر"..

ربنا سبحانه لما خلق الكون خلق كل حاجة بهدف استخدام كل الـ potential اللي فيها.. كل الإمكانيات.. ماخلقش حاجة لمجرد إنها "تؤدي" دورها وخلاص.. "الاستمتاع" هو جزء واضح جدا في غرض الله سبحانه لخلقي وخلقك..

ماتحرمنيش من إني أستمتع.. أو على الأقل أحاول أستمتع.. ماتقتلش فيّ حاجة الله هو اللي حطها جوايا..

 
والدينا وإخوتنا الصغيرين.. عيالنا "المفاعيص" .. أصحابنا اللي عندهم أي نوع من التحدي أو الإعاقة من حقهم "يفرحوا" مش بس ياكلوا وحد يعديهم الشارع.. من حقهم يرجعوا يتبسطوا تاني..



أتمنى أقدر أروح كامبريدج  مرة تانية قريب.. عشان أتبسط تاني  :)





15 comments:

  1. مكنتش حاطط فبالي اني حصحا على حاجه حلوة كده

    ReplyDelete
  2. مكنتش حاطط فبالي اني حصحا على حاجه حلوة كده

    ReplyDelete
  3. A very nice one, Maged with a new perspective (to some mentalities). I'm trying to convince my mother and grandfather to change, but I kinda lost hope in making them get my point. Bless you :) enjoy every moment!

    ReplyDelete
  4. المشكلة ان فى ناس كثير مش بيقدروا يستمتعوا بحياتهم حتى من غير المعاقيين .ممكن المعاق يكون عنده قبول للحياه اكثر من شخص اخر معاق ايضا بس معاق عن تحقيق احلامه. احزانه تمنعه من الاحساس بالاشياء الجميلة اللى عينه بتشوفها فى نفس الوقت اللى ممكن يشوف فيها اقبح الاشياء جميلة لان احساسه بالسعادة الداخلية والرضا بيضفى جمال على كل الاشياء حوله

    ReplyDelete
  5. فاكر لما انا و انت اتكلمنا فى انو الكفيف "ياحرام" المفروض الناس تقوم و تقعده مكانها فى المترو ولا لا ؟
    و كانت الاجابه انو لا لانه هو رجليه مش تعباه و يقد يقف عادى

    ReplyDelete
  6. Maged,

    I really love how you have a heart to change the negative things in the culture. You can't imagine how did this article touched me! Thank you my dear friend! I miss you.

    Misho

    ReplyDelete
  7. ماجد بقالى دى تانى مدونة معلقش عليها .....فيا حاجة عطلانة بس أكيد مش هطول عن كده
    Joanna

    ReplyDelete
  8. Very powerful , deep and touching . With my tears
    coming down I say ,"Thank you for this post." N

    ReplyDelete
  9. جميلة اوي الفكرة دي فعلا , كنت بستغرب لما الاقي حد عجوز رايح متحف على كرسي وبيتحرك بالعافية فعلا من حقهم يستمتعوا :)

    ReplyDelete
  10. Maged... this is Fantastic, deep and prfound.
    When we, in our minds, put limitation on the others, we realy limiting ourselves.
    Thanks again.

    ReplyDelete
  11. الله عليك يا ماجد!من أحلى الحاجات فى مدونتك إنها كتير تفكرنى بموقف خاص حصل لى..و أكبر ظنى إنى مش لوحدى فى ده لأنها فعلا"مدونة من الحياة"..قبل ما أسافر برة مصر كنت باتطوع مع جمعية أصدقاءالكفيف فى مصر الجديدة(أتمنى تكون لسه موجودة)لايمكن أنسى معاناتهم اليومية فى أبسط أمور الحياة..ودلوقت لما بشوف كفيفى البصر عايشين ازاى فى كندا مش ناقصهم حاجة عن أى إنسان تانى..بافتكر مصر وكلمة قالهالى"أحمد" كان طالب فى الجامعة وقتها..كان "حلمه" يمشى بسهولة فى الشارع ويقدر لوحده يسمع مرة صوت النيل!!أتمنى يكون قدر!!أشكرك على كل شجن ممتع و جميل مع كل تدوينة.

    ReplyDelete