Saturday, August 13, 2011

حصاني الجديد

كنت في نقاش هايل النهاردة مع مجموعة كبيرة من الناس وافتكرت المقولة دي...المقولة دي هي حكمة لمجموعة هنود داكوتا وبيمرروها من جيل للتاني وبتقول: ترجّل عن حصانك الميت! لقيت المقولة دي بتنطبق بشكل كبير على معظم إن ماكانش كل جوانب حياتي وحياتك...
في حياتي طرق وسكك وأساليب استعملتها واتعودت عليها لوقت طويل..الطرق دي ممكن تكون أدت الغرض في وقت وظروف معينة..لكن دلوقتي ممكن الطرق دي تكون حصان ميت...


ناس كتير ممكن تتعامل مع الحصان الميت بطرق مختلفة هاقتبس بعضها من مقالة ممكن تحب تتطلع عليها:

1-      نقول الحصان لاهو ميت ولا حاجة
2-      نجيب لجنة تبحث طرق التعامل مع الحصان الميت
3-      نضرب الحصان أكتر
4-      نشتكي من اللي كان بيركب الحصان قبل كده
5-      نجمع شوية أحصنة ميتين كتير يمكن يشجعوا بعض ويمشوا أسرع
6-      نعيد تعريف الموت..يمكن الحصان مش ميت قوي
7-      نحط أكل أكتر للحصان
8-      نقلل المسافة المطلوبة إن الحصان يمشي بينا
9-      نعمل ندوات عشان نتصرف مع الحصان
10-   نلوم الحصان
11-   نلوم الناس اللي حوالينا اللي سابت الحصان يموت
12-   نعمل مسابقة نختار بيها ناس جديدة هي اللي تسوق
13-   ننكر إن فيه مشكلة ونقول احنا طول عمرنا بالحصان ده بالشكل ده
14-   نزور أماكن تانية عشان ناخد خبرتهم في إزاي بيسوقوا الأحصنة الميتة
15-   نعين لجنة تحاول تفوق أو تعالج الحصان
16-   نقارن نفسنا بناس ماعندهاش أحصنة من أساسه ونكتشف إننا أحسن من غيرنا
17-   نعلن إن بصراحة وضعنا أحسن والحصان ميت..

أو جايز يكون جه الوقت إني أنزل من على الحصان الميت!
كلنا عندنا أحصنة ميتة...طرق استخدمناها زمان في مدارسنا ومساجدنا وكنايسنا وبيوتنا...طرق مذاكرة أو شغل...أساليب ضغط سياسية...والطرق دي أثبتت بالوقت إنها إما مش كفاية أو مش فعالة أو مش جايبة النتايج اللي اتعودنا عليها..
وعندي اختيارين: ممكن أحارب في إني أحاول أثبت إن طريقتي هي الصح..أو أفكر في طرق تانية تحققلي نفس أهدافي حتى لو هاستغنى عن طريقة ماتت...
ممكن طريقة الثواب والعقاب اللي كانت بتنفع مع ولادك من سنين تكون حصان مات...ياترى هتقضي وقت تشرحلهم قد إيه طريقتك كويسة؟
ممكن الاعتصام في سبيل تحقيق هدف سياسي يكون حصان مات...يا ترى هأفضل أحكي للناس قد إيه أنا كويس؟ وللا أفكر في حاجة تانية تجيب نتايج؟
ممكن طرق مذاكرتك القديمة تكون حصان مات...هتفضل متمسك بيها لمجرد إنها نفعت في تالتة ابتدائي؟
أنا مش عايز أكون باحاول أستخدم نفس الحصان لمجرد إني مكسوف إني أعلن إنه مات..أنا الوحيد اللي هاخسر..
الأفضل إني أنزل وأكمل المشوار في السكة الصح... وأكمل مشي..أو جري..أو على حصان جديد...

3 comments:

  1. الوعي...الوعي..لو نتكلم علي شعبنا المصري العزيز،اللي أكثرمن 40% منه أميين،يبقي صعب جداً نتكلم عن تغيير الأفكار أو حتي الاساليب،التعليم الصح،ومعرفة أهميةالقراءة أول الخطوات للوعي وللتقدم،بالنسبة للحصان الميت و أي ميت،دايماً إكرام الميت دفنه!!

    ReplyDelete
  2. انا متفق معاك تماما في ناس ممكن تفضل متمسكة بفكرة تكون ماتت وتفضل منشفة دماغه لغاية ما تخصر حاجات أكبر

    ReplyDelete
  3. حلوة أوى المقالة قرتها أكتر من مرة وفى كل مرة يجى فى ذهنى تعليقات على كل طريقة من الطرق المقترحة للتعامل مع الأحصنة، مش عارفه ليه قررت فى مرة إنى أكتب التعليقات دى جنب كل طريقة بس خايفة تأثر على معنى المقالة (مش عارفه هسيبك إنت تحكم).
    أنا كتبت التعليق باللون الأحمر بس شكله مش هيظهر هنا بس إنت أكيد هتعرف .
    هسيبك بقى مع التعليقات ويارب تعجبك

    كنت في نقاش هايل النهاردة مع مجموعة كبيرة من الناس وافتكرت المقولة دي...المقولة دي هي حكمة لمجموعة هنود داكوتا وبيمرروها من جيل للتاني وبتقول: ترجّل عن حصانك الميت! لقيت المقولة دي بتنطبق بشكل كبير على معظم إن ماكانش كل جوانب حياتي وحياتك...
    في حياتي طرق وسكك وأساليب استعملتها واتعودت عليها لوقت طويل..الطرق دي ممكن تكون أدت الغرض في وقت وظروف معينة..لكن دلوقتي ممكن الطرق دي تكون حصان ميت...


    ناس كتير ممكن تتعامل مع الحصان الميت بطرق مختلفة هاقتبس بعضها من مقالة ممكن تحب تتطلع عليها:
    1- نقول الحصان لاهو ميت ولا حاجة يعنى نضحك على نفسنا
    2- نجيب لجنة تبحث طرق التعامل مع الحصان الميت يمكن يلاقوا طريقة سهلة للتعامل معاه بحالته دى
    3- نضرب الحصان أكتر بس دى هتبقى وحشية
    4- نشتكي من اللي كان بيركب الحصان قبل كده شكله كان مفترى
    5- نجمع شوية أحصنة ميتين كتير يمكن يشجعوا بعض ويمشوا أسرع مين عارف كله جايز
    6- نعيد تعريف الموت..يمكن الحصان مش ميت قوي أه يعنى ممكن يبقى ميت اكلينكياً بس لسه فيه الروح
    7- نحط أكل أكتر للحصان ممكن يبقى هفتان بس
    8- نقلل المسافة المطلوبة إن الحصان يمشي بينا نقصر المشاوير شوية يعنى
    9- نعمل ندوات عشان نتصرف مع الحصان لربما حد يطلع بفكرة حلوة علشان نفوؤه
    10- نلوم الحصان ماهو برضه شرير
    11- نلوم الناس اللي حوالينا اللي سابت الحصان يموت يا ساتير ما بقاش فى رحمة فى قلوب الناس
    12- نعمل مسابقة نختار بيها ناس جديدة هي اللي تسوق ماهو اصل السواقة دى فن وذوق يعنى مش أى حد
    13- ننكر إن فيه مشكلة ونقول احنا طول عمرنا بالحصان ده بالشكل ده هو احنا ليه جايبين السبب على الحصان
    14- نزور أماكن تانية عشان ناخد خبرتهم في إزاي بيسوقوا الأحصنة الميتة وهو نستفيد من خبرات الناس التانية
    15- نعين لجنة تحاول تفوق أو تعالج الحصان يمكن ربنا يكتب فى إيديهم الشفا
    16- نقارن نفسنا بناس ماعندهاش أحصنة من أساسه ونكتشف إننا أحسن من غيرنا ماهو اللى يشوف بلاوى غيره
    17- نعلن إن بصراحة وضعنا أحسن والحصان ميت.. ممكن برضه

    أو جايز يكون جه الوقت إني أنزل من على الحصان الميت!
    كلنا عندنا أحصنة ميتة...طرق استخدمناها زمان في مدارسنا ومساجدنا وكنايسنا وبيوتنا...طرق مذاكرة أو شغل...أساليب ضغط سياسية...والطرق دي أثبتت بالوقت إنها إما مش كفاية أو مش فعالة أو مش جايبة النتايج اللي اتعودنا عليها..
    وعندي اختيارين: ممكن أحارب في إني أحاول أثبت إن طريقتي هي الصح..أو أفكر في طرق تانية تحققلي نفس أهدافي حتى لو هاستغنى عن طريقة ماتت ...
    ممكن طريقة الثواب والعقاب اللي كانت بتنفع مع ولادك من سنين تكون حصان مات...ياترى هتقضي وقت تشرحلهم قد إيه طريقتك كويسة؟ ممكن الاعتصام في سبيل تحقيق هدف سياسي يكون حصان مات...يا ترى هأفضل أحكي للناس قد إيه أنا كويس؟ وللا أفكر في حاجة تانية تجيب نتايج؟ ممكن طرق مذاكرتك القديمة تكون حصان مات...هتفضل متمسك بيها لمجرد إنها نفعت في تالتة ابتدائي؟
    أنا مش عايز أكون باحاول أستخدم نفس الحصان لمجرد إني مكسوف إني أعلن إنه مات..أنا الوحيد اللي هاخسر..
    الأفضل إني أنزل وأكمل المشوار في السكة الصح... وأكمل مشي..أو جري..أو على حصان جديد...

    الأهم من كل دا إننا نعترف إن عندنا خيول اصلا ولو ربنا بيحبنا يلهمنا الحكمة ويقدرنا اننا نتعرف على الميت منها علشان نستبدله


    sahar El-Behairy

    ReplyDelete