Thursday, August 18, 2011

نقطة وللا علامة استفهام؟

إيه الأهم؟ الجملة وللا السؤال؟

لاحظت إن أي حد بيتكلم عن قد إيه ابنه ذكي..دايما بيجيب أمثلة عن أسئلة الولد بيسألها مش جمل عميقة الولد بيقولها؟
ليه الأسئلة بتغيظ المدرس اللي مش جاهز؟ ليه بعض القادة السياسيين أو الدينيين ممكن يحاولوا يهربوا من الأسئلة؟ هي الأسئلة بالقوة دي؟
ليه الأغاني اللي فيها أسئلة زي:" انت فين؟" أو" أحب غيرك إزاي؟"...بتبقى أقوى من "أنا مستنيك".. أو "مش باحب غيرك"؟

امتى آخر مرة سألت نفسك أسئلة..وأطلقت لخيالك العنان زي مابيقولوا في إنك تسأل وتسرح في أسئلة أعمق؟
فكرت هتعمل إيه لو معاك مليار جنيه؟
إيه أكبر حلم بتحلم بيه؟
إيه أكتر حاجة نفسك تغيرها فيك؟ في بلدك؟ في شغلك؟ في بيتك؟
إيه اللي يخلليني أنا وانت نقرا مقالات أو بلوجز أو كتب بتقوللنا بالتفصيل المفروض نعمل إيه..لما ممكن نقرا حاجة تخللينا نفكر بنفسنا ونسأل أسئلة؟
ليه ماتخلليش في جيبك دايما ورقة وقلم؟ مش جايز تلاقي أسئلة كتيرة بتجيلك وتخلليك تفكر أعمق؟
هو أنا ممكن عقلي يشتغل أعمق وأسرع لو اتدربت أسأل كتير؟ حتى لو مالاقيتش إجابات؟

هل الناس هتقدرك أكتر لو خليتهم يفكروا ويسألوا؟ وللا لو إديتهم إجابات جاهزة؟

هو أنا ممكن أبقى فنان أو شخص مؤثر لمجرد إني دربت نفسي أسأل؟
هتجرب؟
يا ترى أخدت بالك إن البوست دي مافيهاش ولا جملة خبرية؟:)  تفتكر كانت أسهل وللا أصعب من البوستس اللي قبل كدة؟

5 comments:

  1. Ashal :P
    Asl ana 3aref enk met3awed tes2al ;)

    ReplyDelete
  2. النقطة بتقول ان الكلام خلص .. مفيش أضافة محتمله لكن السؤال ممكن قوى يجب 10 أسأله وراه .. السؤال بيخلينا نفكر أكتر و نجبها يمين و شمال ..قصدى الفكرة اللى بنسأل عنها .. السؤال بيعمل جوه ذهننا زى الزلطة اللى اترمت فى بركة ميه مبتتحركش ..أول ما الزلطة بتترمى بتعمل دواير ...والدواير بتوسع .. اعتقد انه فيه أسأله لا غنى عنها فى الحياة (الناجحة) زى ليه لأ ؟
    Ghada

    ReplyDelete
  3. طبيعة الانسان البشريه بتميل ناحية الغموض .. وده اللي بيخلي الناس تحب الاسأله حتى لو ملهاش اجابات او اجاباتها معروفه .. زي لما اخش عليك بعلبة حمراء واقولك "تفتكر جبتلك ايه فهديه في العلبه دي" ... حتتشوق تعرف اكتر ما كنت حقول "انا جبتلك هديه في العلبه دي" ... انها طبيعة الانسان منذ الخليقه .. ولا تنسى ماذا فعل سيدنا ادم عندما قال الله تعالى له "كل ما شئت ولا تقرب هذه الشجره" فقد كان الغموض وراء ما وسوس له به ابليس .. وخلانى انا وانت نيجي الدنيا دي

    ReplyDelete
  4. I did notice .. from the 5th line, or to be exact: the 6th question :D :P

    i just want to tell you "Yikes" or "Pleh" for a change. But you're not giving me the chance to :P

    << N I C E >> ;)

    ReplyDelete
  5. في اللغة العربية الفعل اهم من الفاعل
    والانجليزى العكس
    ياريت تكتب مقالة عن كدة وتشرحلنا انهى الاحلى !!
    جون

    ReplyDelete