Monday, August 15, 2011

أنا وابن عمي وأسماء


 أنا وأخويا على ابن عمي وأنا وابن عمي على الغريب..وبعد كده: أنا والغريب...! صعبة دي! أنا والغريب على مين؟ على الأغرب؟
دايما الحاجات الجميلة صعبة..العدل صعب..صعب قوي..
امبارح كان يوم خاص فكرت فيه كتير في موضوع العدل والظلم...الكلام كتير والأفكار مش هتخلص لو فكرنا في الموضوع ده...واللي يفتكر إنه يقدر في بوست أو مقالة أو حتى كتاب إنه يغطي مواضيع زي دي..يمكن محتاج يعيد التفكير..
اللي حيرني كان رد فعل البعض بخصوص موقف سياسي كان رأيهم فيه في منتهى الوضوح..لكن رأيهم ده اتغير بتغير الأطراف اللي دخلوا..ناس كانت رافضة المحاكمات العسكرية لغير العسكريين..لكن لأن الوضع كان بيمس ناس مختلفين معاهم في بعض التوجهات كانت وجهة النظر ما بين: وأنا مالي.. وأحسن!
الفكرة الصغيرة اللي نفسي أطبقها على نفسي أولا هي إن العدل ممكن يحصل لو اللي حط القانون-أي قانون- حطه من غير ما يعرف الأطراف اللي هتتحاسب مين..وقتها القانون مش هيكون بيتفصل على حد معين هيستفيد...
كلام شكله ساذج ومباشر..أنا عارف..لكن فكّر معايا كام مرة أنا وانت سألنا عن الأسماء قبل ما نحكم! فيه "أسماء" معينة نتمنالها تتظلم وتتعذب وتقهر وتتبهدل..أحسن..عشان تتربى! وفيه أسماء تاني نطالب فيها بالعدل ورفع الظلم وتحقيق المساواة والالتزام بحقوق الإنسان..
ملك مشهور سأل رئيس الوزرا بتاعه: أعمل إيه في راجل عايز أكرمه؟ رئيس الوزرا كان بقاله كام يوم حاسس كده إن الملك مبسوط منه..راح قال له: لو فيه حد الملك عايز يكرمه يبقى يخللي واحد من القصر يروح للراجل ده ويركبه على حصان جميل ويلبسه لبس ملكي و..و..و.. الملك طبعا كان بيتكلم عن حد تاني وطلب من رئيس الوزرا بنفسه إنه ينفذ الكلام ده لإكرام الراجل ده..
ماينفعش تبقى عايز تبقى عادل..وفي نفس الوقت تحط قانون انت عارف هيفيد او يضر مين..القانون العادل هو اللي يعمله حد بحيث إنه يتطبق على الكل...يتطبق على رئيس أو رئيس سابق أو مرشح محتمل للرئاسة..
لما الله سبحانه عمل الجاذبية الأرضية..فِضل عدل الله يتطبق على كل اللي على الأرض..الأطفال والشيوخ والستات..المؤمنين وغيرهم..اللي مصدقين في الجاذبية وغيرهم..الكل...الكل..الناس القريبين قوي من ربنا..والناس البعاد عنه..وعلى الرغم من مقدرة الله سبحانه إنه يوقف عمل القانون ده إلا إنه لازال بيطبقه على الكل بعدل متناهي الحياد والدقة..
يا ترى هل فيه عندك "أسماء" معينة ماعندكش مانع إنها تتظلم لأنك مختلف معاها؟

3 comments:

  1. كلام جميل يا ماجد
    لكن اللى زى دى اللى أسائت للثوار الشرفاء و لحست بيادة العسكر و اترمت ف حضن الجماعات المتأسلمة تستاهل ... كله من عملها
    لو كانت احترمت الثورة و الثوار كان موقفى هيتغير
    انا حاليا لا مع و لا ضد
    و شوفنا الجماعات الارهابية اللى اترمت ف حضنهم و لا عبروها و لو حتى بإدانة بسيطة لمحاكمتها
    اهم سابوها اهو ...

    ReplyDelete
  2. Maged,
    ana ha3alak 3ala 7aga tani 3'er el mawdo3, 3ala eslobak fi el ketaba. Awalan el eslob wa el tari2a 3agbany gidan, el sora elly 7ateteha lelmawdo3 is wonderful mo3abera gidan. 3agabny awi keseet el malek wa el ragel elly 3awez yekremo wa enk esta7'demtaha fi makal zay da, kan nefsy aktar enk te2ol esmo wala enta al2an men el nas elly betfakar fi el asma2 el awel 3alashan 3ala 2asaseha te7aded iza kane el 3adl howa elly yetaba2 wala el ra7ma. Has2alak so2al ana me7tar fi 2egabto, kolena ka bashar 3arfeen el 3adl la2nena 3arfeen el 7'er wa el shar wa 3arfeen ya3ni eh sa7 wa 3'alat, so2aly, hal fi 3alamena el saket haza momken 7a2i2y yet7a2a2 el 3adl? wa leeh? mesh 3aref iza kan ta3leky leeh lazma wala la2 bass I hope eno yekon fara2 fi 7aga wa law so3'yar. Misho

    ReplyDelete
  3. So true, we want justice when others are involved and we want mercy when it affects us! But the law has to be above all and that is how nature work like you said. In fact, the law should be inforced even more on those who should know better!

    ReplyDelete