Saturday, August 22, 2015

النصاب

بييجي لناس كتير إحساس بيسمُّوه "متلازمة المحتال" أو Imposter Syndrome وفي الظاهرة النفسيَّة دي الواحد بيحس إنه مش كفء ومش شاطر كفاية ومش على قد المستوى المطلوب في وظيفته أو الحاجة اللي بيذاكرها أو النشاط اللي بيعمله.. وكمان بيبقى فيه الإحساس بتاع "أنا ماشي بالستر، لو الناس تعرف اللي فيها هايكتشفوا إني أي كلام".. الناس اللي بتحس الإحساس ده مش عدد قليل، وغالبًا بين وقت والتاني بيجيلنا الإحساس ده لما بنشوف ناس "أشطر مننا" في الشغل أو لما بنلاحظ إن فيه زمايلنا "واثقين في نفسهم" أو "عارفين كل حاجة"  وعندهم حلول لكل التحديات .. وممكن أبقى خايف "أتفقس" ويعرفوا إني "نصَّاب"..


إحساس صعب، صعب إني أكون حاسس إنه "على الله ما حدش يسألني سؤال ما أعرفوش" أو "يا رب ما تكسفنيش" أو "ربنا يستر قبل ما ييجي اليوم ويكتشفوا إني ما أستاهلش وظيفتي اللي أنا فيها"..

خوفنا من إننا ما نكونش "أذكيا" أو "شاطرين" ساعات بينسِّينا إن الحكاية مش كلها شطارة أو ذكاء.. فيه دراسة لطيفة اتعملت وإدُّوا مجموعة من الأطفال مسألة يحلُّوها ولما كلُّهم حلُّوها صح، قالوا لنصًّهم "برافو عليك، إنت أكيد شاطر عشان كده عرفت تحلّها" وقالوا للنص التاني "برافو عليك، إنت أكيد بذلت مجهود جامد عشان تحلها".. بعد كده سألوا المجموعتين لو يحبوا يحلوا مسألة أصعب ولا أسهل.. أغلب اللي اتقالهم "أنت بذلت مجهود" اختاروا ياخدوا مسألة أصعب ويتحدوا نفسهم، وأغلب اللي اتقالهم "برافو إنت شاطر" اختاروا مسألة أسهل..

خوفي إني ما أبقاش "شاطر" ممكن يكون معوِّق.. ممكن يكون بيعطلني عن إني أحقق حاجات كتير.. ممكن أخاف إني أجرَّب حاجة جديدة تخلِّيني "أبان" إني مش قد كده.. ممكن يخلِّي السلحفاة توصل قبل الأرنب لأنها صدقت في أهمية إنها تبذل مجهود، وهو كان معتمد على شطارته..

مش دايمًا هاقدر أتحكم في نسبة ذكائي، لكن في إيدي دايمًا إني أجتهد.. أجتهد يعني أعمل خطوات حتى لو صغيرة لكن في الاتجاه الصح.. "إمكانياتي" أو "مواهبي" أو "شطارتي" أو "طبيعتي" كلها حاجات ممكن تعتمد علي الجينات والبيئة اللي اتربيت فيها.. جايز ما أقدرش أتحكم في الحاجات دي بالكامل.. لكن عندي اختيارات أقدر أعملها كل يوم..

بدأت الفترة الأخيرة أختار إني لما أمتدح حد من العيلة أو أصحابي أكون بأشاور على "الجهد" اللي اتعمل مش بس على "الشطارة" الطبيعية اللي في الشخص..

المجتهد اللي بيستخدم إمكانياته القليلة أو الكتيرة مش مفروض يخاف لو الناس "اكتشفت" إنه مش شاطر.. أصل الشطارة مش بس ذكاء لكن قرار مستمر ببذل مجهود في الاتجاه الصح.. ودي يمكن متعة الاجتهاد، إنه طول الوقت فيه فرصة إن الواحد يكون بيتحسِّن..

3 comments:

  1. الله عليك يا ماجد، اسمح لي اشاورعلي مجهودك الرائع في الكتابة كل اسبوع، وعلي حماسك الجميل، وفكرك المتجدد دائماً، وتمنياتي لك بالمزيد من النجاح المثمر والمفيد، أشكرك وتحياتي

    ReplyDelete
  2. تصدق انا بعمل كدا بشكل تلقائى ...
    دايما اقول نعمل اللى علينا ومش لازم نكسر الدنيا يعنى
    يكفى شرف المحاولة وبس
    وربنا يكرم
    انا زى الانونيمس الكريم اللى قبلى
    عاوزة أثنى على " الجهد" الذى بُذل فى الكتابة ومحاولة توصيل الفكرة ببساطة وذوق
    تحياتى وهقولك زى ما بقول للناس اللى بحبها لما تعمل حاجة حلوة
    انتا شطورة من غير حاجة وبرافو عليك
    :))

    ReplyDelete
  3. الموضوع رائع!
    والأروع مش أنك بتشجع ودا اللي كل الناس بتقول عليه لكل الناس .. لكن لأنك تخطيت أهمية التشجيع كشيء مفروغ منه، لأهمية تعديل توجه التشجيع
    :)

    ReplyDelete