Saturday, August 29, 2015

مثلًا يعني

بنحتاج في كلامنا إننا نستخدم أمثلة وتشبيهات، مرات عشان نبسَّط اللي بنقوله، ومرات عشان ندِّي فكرة التعميم على حاجات تانية شبه المثل..

لكن زي أي 'رمز' الأمثلة والتشبيهات اللي بنستخدمها ليها دلالة أكبر من مجرد توظيفها على إنها مجرد مثل.. الرموز عمومًا بتاخد قيمتها من القيمة اللي مجموعة كبيرة من الناس بتديهالها.. وقتها القماشة الملونة بتبقى 'علم' بيشاور على البلد وعلى سيادتها وتفردها، والورقة المكتوب عليها 'شهادة تخرج' بتبقى علامة على نجاح في دراسة لسنين طويلة ومسوغ للتعيين في وظايف معينة وهكذا..

مفهوم طبعًا إن الرمز في حد ذاته ممكن مايكونلوش قيمة 'مادية' (يعني ورقة ال١٠٠ جنيه ممكن قيمة المواد المستخدمة فيها يكون قريب من قيمة المواد المستخدمة في ال٥٠ وال٢٠ برضه) لكن القيمة بيحددها اتفاق المجتمع على استخدام الرمز أو المثل..

لو بأتكلم معاك وبأدي مثل عن وظيفة أو ديانة أو سن أو دراسة وغيره أنا بأساهم في تكوين وتشكيل قيمة المثل ده في مفهومنا الجمعي..

يعني مثلًا: لو أنا بأشجعك عشان تذاكر وقلتلك 'لو ذاكرت واجتهدت ممكن تبقى .... كبير' وهنا ممكن ناس تقول 'دكتور' أو 'مدرس' أو 'لاعب كورة' أو 'وزير' أو غيره.. على الرغم إن المثل المستخدم هو مجرد مثل عن 'وظيفة كويسة' فلو مش باخد بالي هألاقي إني بأسس عند اللي بأتكلم معاه إيه هي الوظيفة الكويسة وإيه الوظايف الأي كلام..

'حتى لو أبوه بيشتغل .....'، 'إنشالله يا أخي كان بوذي أو يهودي أو مسيحي أو مسلم أو هندوسي أو ملحد أو.. أو..' كلها بتدي انطباعات سلبية أو إيجابية وبتدي للمثل استخدام أكتر من مجرد إنه مثل.. بتحط الديانات دي أو الوظايف دي أو أماكن السكن دي في خانة (حلوة أو وحشة) بتأثر في قبولنا أو رفضنا ليها في المستقبل..

زي ما بيتقال إننا ناخد بالنا من النكت والهزار اللي بنقوله لأن جواه حقيقة مصدقين جزء منها، كمان محتاج آخد بالي من الأمثلة اللي بأستخدمها عشان أوضح أو أشرح حاجة..

المثل مش 'مجرد مثل'، لأن جواه افتراضات ومعاني بتشاور على قيمة ممكن تأثر في استقبالي للحاجة دي في المستقبل لما مايبقاش مثل لكن حقيقة..

2 comments:

  1. جميلة جداً. بالحق في أمثلة كتيرة بنستخدمها بشكل يومي و يمكن سطحية وبتعكس وجهة النظر اللي أنا متبنيها.
    و ساعات ده بيعكس مصداقية عالية و شفافية نادرة...
    لكن كمان بتعمل تصنيف غريب للمجتمع.. بننقلو بدون دراية للأجيال القادمة

    ReplyDelete
  2. انا بنتبه جداااا للحكاية دى ف كلامى
    ودايما اقول ليوسف ابنى لما نتكلم عن المستقبل وهيدرس ايه ويخش كلية ايه
    اقوله مش مهم عندى تدخل كلية بمجموع ونظرة الناس والقصص دى
    يهمنى انك تدخل كلية تتعلم منها حاجة تحبها
    ويهمنى انك تبقى انسان كويس
    أى كان هتشتغل ايه .. !
    دا الاهم

    تسلم ايدك

    ReplyDelete