Saturday, December 31, 2011

وانت طيب :)

في كل لغات العالم معروف إن اللغة كائن حي بمعنى إن من وقت للتاني ممكن بعض المفردات يبقى لها معني مختلف (ممكن معنى عكسي تماما) عن المعنى الأصلي... واختلاف المعنى ممكن يكون لأي سبب.. مثلا ارتباط اللفظ بحادثة معينة.. فيلم أو كتاب مشهور..

كلمة مثلا زي كلمة "دبابات" كان المعنى الأصلي ليها "الحيوانات" (كل ما "يدب" على وجه الأرض) وهي الكلمة الأقرب لكلمة "دواب" بنفس المعنى.. دبابات دلوقتي معناها طبعا مختلف.. كلمة زي "ناموس" مثلا كانت بتستخدم بمعنى "قانون".. وهكذا غيرها من الكلمات سواء بالعربي أو أي لغة تانية.. كلمة زي gay مثلا.. معناها الأصلي "بهيج" أو "سعيد" لكن المعنى اللي بييجي في ذهن المتحدثين بالإنجليزية دلوقتي هو "مثليّ الجنس"..

المهم إن جملة من أهم الجمل اللي بنحتاج نستخدمها اليومين دول واحنا بنستقبل سنة جديدة هي جملة: كل سنة وانت طيب!.. ومع الأسف كلمة "طيب" هي أحد الكلمات اللي يا إما فقدت معناها أو أخدت معاني مختلفة..

طيب! (بمعنى "أُف! حاضر").. خش يا واد ذاكرلك كلمتين... طيب! حاجة تقرف (حاجة تقرف بتتقال في سرُّه طبعا)

طيّب! (مع الضغط على المقطع التاني وتشديد مبالغ فيه على حرف الــ ي مع نظرات فيها لؤم وتخطيط لشر!).. يعني مش هترجّع الفلوس؟ طيّب! (يعني هاأورّيك!)

فلان ده طيب! وللأسف يمكن المعنى تحور لفكرة "عبيط" أو "ساذج" أو "يتضحك عليه".. أو على أفضل تقدير "مش هيطالب بحقه"..

عشان كده يمكن مش سهل عليّ إني اتبادل التهاني بسنة جديدة بإني أقوللك كل سنة وانت طيب!  لكن نفسي أقول لكل حد من أصحابي:

كل سنة وانت "حر".. 
كل سنة وانت مستمتع بحرية في رأيك وفي لبسك.. في دراستك وفي معتقدك الديني.. كل سنة وانت حر في اختياراتك.. كل سنة وانت حر في شغلك وأكلك وعلاقتك بربنا.. كل سنة وانت حر!

كل سنة وانت "آمن".. 
كل سنة وانت متطمّن على عيالك وبيتك.. متطمن على حقك في وطنك.. آمن على حقوقك اللي عارف إنك هتاخدها.. آمن في الشارع وفي الجامعة.. في وطيفتك وفي مكان سكنك.. كل سنة وانت آمن!

كل سنة وانت "مبسوط".. 
مبسوط بعيلتك وحبايبك وأصحابك.. سعيد بعلاقتك بالخالق سبحانه.. فرحان في شغلك وأنشطتك.. مبسوط ببلدك وبيتك وممتلكاتك.. كل سنة وانت مبسوط!

كل سنة وانت "نفسك".. 
مش بتحاول تبقى حد تاني.. مش بتحاول تقلد عشان توصل.. مش بتحاول تبقى غيرك عشان تكون مقبول.. مش بتحاولي تخسّي عشان تكوني محبوبة.. مش بتحاول تغير في شكلك عشان الناس تحبك.. كل سنة وانت انت!

في الساعات الأخيرة لسنة خلاص بتلم أوراقها.. أحب أتمنى لكل أصحابي سنة مختلفة.. سنة مليانة بالنجاح والخير.. سنة مليانة طموح وتعب لذيذ وشغل.. سنة مليانة وضع أحسن.. ومع كل ألم ييجي أمل..

كل سنة وانت حر.. كل سنة وانت آمن..كل سنة وانت مبسوط..  كل سنة وانت انت.. وزي ما بيقولوا في السودان "السنة الجاية زي ما عايز!"..

كل سنة وانت طيب! :)

11 comments:

  1. كل سنة وانت .... بتكتب :) هابي نيو يير :)

    ReplyDelete
  2. كل سنة وإنت حر... وآمن... ومبسوط... كل سنة وإنت نفسك... كل سنة وإنت طيب يا صديق :)

    ReplyDelete
  3. كل سنة و انت ماجد ( ال سبب سعادة )
    =)

    ReplyDelete
  4. كل سنه و أنت بتمتعنا بكتاباتك ..كل سنة وإنت حر ..مبسوط ..آمن..و طيب ..

    N

    ReplyDelete
  5. كل يوم وأنت أقوي...أنجح...أروع و أروق يا هايل يا ماجد!

    ReplyDelete
  6. جميل قوي يا ماجد
    كل سنه و أتت طيب

    ReplyDelete
  7. كل سنة وإنت زي ما إنت ياماجد
    تم النشر علي الفيس بوك مع الرابط للمدونة

    Revnia II

    ReplyDelete
  8. أنا بقى اللى بتغيظنى .. "كل سنة" أو ,يارب السنة الجاية تكون ...

    أنا لسة هاتستنى سنة !!

    وليه كلللللللل سنة ؟؟؟؟

    ليه ماتقللش المعدل الزمنى شوية ، علشان يبقى فى تكيثف أعلى للأمنيات ؟؟

    علشان كدة دايما فى راس السنة أو فى أعياد ميلاد اصحابى بقول ..
    "كل لحظة وثانية ..."
    :))

    كل لحظة وثانية وأنت أحسن من اللى قبليها :)

    ReplyDelete
  9. Hahahaaa its really happy post at the end of the year :)
    kol sana went mabsoot :D

    ReplyDelete
  10. i wish u and all yr beloved a very happy 2012. i enjoyed every idea u posted.you r blessed with yr writing talent hope u always come up with more
    inspiring ideas.God bless u.
    hala helmy

    ReplyDelete
  11. big like :D strong words

    ReplyDelete