Friday, December 9, 2011

رحلة تواضعي

من أكتر الفضائل اللي بيُساء استخدامها من وجهة نظري: التواضع.. في نظر كتير مننا إن المتواضع هو اللي بيقول "أنا ماسواش".. أو "لأ صدقني.. ده ربنا هو اللي سترها معايا".. أو "لأ يا عم مش للدرجادي.. أنا غلبان".. مرات كتير بنشوف إن المتواضع هو اللي شايف نفسه أقل من غيره.. أو هو اللي باصص على ضعفه وقصوره.. أو هو اللي مش بيتكلم عن إنجازاته إطلاقا حتى لو اتسأل عنها.. أو هو اللي بيفكر نفسه طول الوقت إنه ماعندوش كل حاجة..

بيبان ده في ردودنا على الناس اللي بتمدحنا.. تلاقي الواحد بيحاول "يتفادى" إنه يسمع أي كلام مشجع.. وكل ما الواحد كان "متواضع" أكتر كل ما يحاول "ينفي" اي إنجازات أو "يشاور" على إنجازات غيره.. وحتى على بعض المستويات الأبسط نلاقي إننا ساعات نحاول "نتحاشى" إن حد يعمل فينا "جِميلة" بإننا نحاول نردها على طول..

فتلاقي مثلا محادثات زي: "حلو قوي فستانك" <ده انتي اللي فستانك يجنن>  وطبعا كده يبقى الاتنين خالصين! حتى فكرة إن حد يدفعلي مرة في المشاريب أو حد يجيبلي هدية.. إزاي ما أردهاش على طول؟ لازم.. ماهو مش معقول يبقى هو "أحسن" مني!

وزي فضائل كتير التواضع ممكن يكون مزيف.. شكله من برة تواضع وهو تكبر متنكر! المتواضع المزيف مش ماشي في الشارع بيقول "أنا متواضع" لكن تصرفاته بتقول كده!

التواضع مش إني أحس إني أقل من الناس أو إني أقل من اللي أنا واصله.. التواضع هو إني أعرف إنجازاتي واللي باعرف أعمله واللي أنا متميز وشاطر فيه.. وكمان أبقى فاكر إن قيمتي مش في ولا حاجة من الحاجات دي.. لكن إن قيمتي في الصورة اللي الله سبحانه خلقني عليها.. صورة لو أي حد فكر فيها بحيادية هيبقى منفوخ ومتكبر لولا بس إني بافكر نفسي إني ماليش أي يد أو مجهود في الصورة دي..

لو أقوللك إن لبسك شيك اتبسط.. لو رحبت بيك أو عزمتك على حاجة اشكرني واستمتع.. لو جبتلك هدية ماتضيعش وقتك وطاقتك في إنك تفكر إزاي تردها.. لو امتدحت جزء إيجابي في شخصيتك صدقني وافرح..

"رحلة تواضعي" أو "خطوة بخطوة نحو تواضع كتواضعي" هي عناوين كوميدية لكتب مش موجودة لكنها لسان حال متكبرين وش! 

"أنا ماستاهلش" أو "أنا أوحش واحد فيكم" هي عناوين مؤلمة لكتب موجودة وسطنا في ناس فاكرين إنه هو دة التواضع..

زي الأطفال في بساطتهم.. لما بتقولهم على حاجة حلوة فيهم أو حاجة كويسة عملوها.. بيصدقوا ويفرحوا.. أتمنى ترجعلي البساطة دي!

13 comments:

  1. that's so right ! STUNNING post ya MAGED =)
    ( w fwa2too ) ,,

    ReplyDelete
  2. حلوة اوي معالجة الموضوع ده فعلا , عندنا مشكلة في فهم التواضع , فعلا لازم نصدق وننبسط بس من غير الأنا تعلى عندنا اوي
    رائع :)

    ReplyDelete
  3. حلوة بساطة الأطفال واحاسيسهم في حاجات كتيرة جداً...لأنها صادقة وفعلاً من القلب،زي تدويناتك كدة يا ماجد،وبكل صدق شكراً لك

    ReplyDelete
  4. Nice ya Maged :)
    Amir Awad.

    Awel mra testakhdm klmt Wesh 3la fkera :)

    ReplyDelete
  5. Likeeeeeeeeeeeeeeeee :)
    Esnawy

    ReplyDelete
  6. جميل جدا مع اختلاف بسيط هو التواضع انك تقدر تتعامل مع كل المستويات لأن فية ناس بتلبس لبس التواضع مع اللي في مستواها ميقدرش يعطف علي شحات او ضرير عايز يعدي الشارع او ست كبيرة هدومها متبدهله بداعي القرف من المنظر و في حاجة انا من الناس اللي مش بتحب "النفخ" اللي هو لما حد بيمدحك بيزيط فيها عندنا احنا المصريين كدة بينفخوا الواحد لحد ما يقرب يفرقع و الأهم زي ما انت قولت ان الواحد يبقي عارف هو شاطر في اية و عارف امكانياتة اللي هيتشكر علية .. كالعادة رائع ووحشتنا اليومين اللي فاتوا التدوينات بقت زي البرشامة و احنا ادمناها

    ReplyDelete
  7. حلوة قوى قوى .. بسيطة وواضحة ومن غير كلكعات فارغة ... خد المجاملة دى واتبسط بقى يا معلم .. حقك والله :)

    فادى رمزى

    ReplyDelete
  8. Finally you did it ......A great clear simple and genuine truth... Thank u
    Joanna

    ReplyDelete
  9. و ـنا كمتن أتمنى ترجعلى البساطه دى

    ReplyDelete
  10. Maged,I am so lucky because I met you and very happy to see people like you amoung us in egypt.
    khalid

    ReplyDelete
  11. Fantastic... God Bless.
    Modest...huh.. let me think about it.

    ReplyDelete
  12. ياريت نقدر محافظ ببساطة الأطفال


    حلوة أوي مبسوطة أوي
    ميرسي ياماجد بجد بتنقلنا من مود لمود تاني مختلف تماماً
    S. El Behairy

    ReplyDelete