Thursday, December 22, 2011

شايف العصفورة؟


أنواع الألم اللي الجسم بيعبّر عنه كتير.. لكن من ضمن الحاجات اللطيفة اللي ليها علاقة بالألم هي الطريقة اللي ممكن الجسم يتكيّف بيها عشان يحس بالألم بدرجة أقل.. اللي ساعات الجسم بيعمله هو إنه "يغلوش" على وجع في جزء معين.. لكن الغريب إنه بيعمل كده عن طريق وجع "جزء تاني" من الجسم!..

يعني مثلا لما بنحسّ بوجع جامد عادة رد الفعل الطبيعي هو إن الواحد يصرّخ بصوت عالي (لدرجة بتوجع الأغشية الصوتية) فبيبعد تركيز العقل على الجزء الأساسي اللي بيوجع.. أو مثلا لما الواحد يتعوّر تلاقيه بيدوس جامد على مكان الوجع..الضغط ده في الواقع "بيوجع" لكن لأنه بيوجع جزء مختلف عن مكان الوجع الأساسي فالجسم بيحسّ قال إيه إن الوجع الأولاني مش مؤلم قوي!(وده ساعات بيسمّوه في الطب counter-irritation)..

فمثلا من ضمن الحاجات اللي كانوا بينبّهونا ليها واحنا لسة طلبة بندرس طب أسنان إن مرات كتير العيّان ممكن بسبب وجع في أسنانه يحط قرص أسبرين جنب السنة الموجوعة (بدل ما يبلعها).. واللي بيحصل إن قرص الأسبرين ده ممكن يخفّف الوجع بس عن طريق إنه يسبّب حاجة شبه "القرحة" في الخد من جوة.. القرحة دي بتوجع وبتنسّي العيان وجعه الأول.. والعيان بيفتكر إن ده خفف الوجع!

فكرة "شايف العصفورة؟" مش بس بيستخدمها الجسم عشان يحاول تفادي الوجع.. لكن مرات كتير في مناقشاتنا "بنخاف" نتناقش في الموضوع الأساسي.. لأن الموضوع الأساسي محتاج مجهود.. محتاج تركيز.. محتاج "اعتراف" بتقصير أو بمشكلة.. ليه؟ وعلى إيه؟ أسهل حاجة نعملها هي "شايف العصفورة؟"

وطبعا مش دايما بنقول شايف العصفورة لكن بنقول: "وإيه اللي نزّلها أصلا؟".. "طب ما الإرهاب موجود في كل حتة".. "ثُم مين أصلا قاللك....".. "وبعدين أنا مش باتكلّم عنك انت..".."أمال مين يعني اللي ينفع رئيس؟" وهكذا.. جمل كلها بتزُق ناحية: سيبك من الموضوع الاساسي وخلّينا نتكلم عن حاجة تانية.. أو نتّهم الضحية بعدم الحرص أو بالتسيب ..أو نتّهم اللي بنحكي معاه بإنه مش بيفهم أو ماعندوش معرفة كاملة أو أو.. أسهل بكتير!

العصفورة مهمة.. العصفورة مخلوق جميل.. العصفورة مش معمولة عشان "نغلوش" بيها على مواضيع.. العصفورة مخلوق بيعبر عن منطق وإبداع وخيال جميل من الله سبحانه.. شايف العصفورة؟

11 comments:

  1. العصفورة في المؤسسات واماكن العمل وفي الجيش بردو .. مخلوق عايز الحرق بجاز

    ReplyDelete
  2. يبقى فى مصر التعبير الأمثل

    شايف العصافيييييييييير

    ReplyDelete
  3. ALLAAAAAH!a new addition to your sweet deep river of thoughts,smoothly running for us to reach and taste through this wonderful blog.Wish you a Merry Christmas ya Maged,may God bring PEACE to our beloved Egypt and to the entire world in the new year.

    ReplyDelete
  4. وحشتنا جدا الفترة اللي فاتت يا ماجد و دايما بترجع لنا بحاجة جميلة بتعبر عن الواقع المرير بتاعنا بحاجة لطيفة

    ReplyDelete
  5. وحشتني كتاباتك يا ماجد جدا :)
    عجبتني فكرة انك رابط counter irritation
    بالعصفورة بتحسسني ان الطب جميل :)
    بس احيانا فكرة الغلوشة دي بتبقى فرصة الهروب من المواجهة وتخليص الحق صنعة :)

    ReplyDelete
  6. كان فيه عصافير كتير قبل الانتخابات البرلمانية

    Revnia II

    ReplyDelete
  7. Missing ur articles that has indicative meanings.
    بمنطلق المعني في بطن الشاعر

    How true it is.

    S. El Behairy

    ReplyDelete
  8. Missing ur articles that has indicative meanings
    بمنطلق المعني في بطن الشاعر

    How true it is!

    S. El Behairy

    ReplyDelete
  9. كلنا فى حياتنا مركزين مع العصفورة وناسيين حاجات كتير اهم

    ReplyDelete