Thursday, April 18, 2013

اللي يموّت الموت

معظمنا جاله وقت وإتمنى أمنية "آه لو نعرف نموّت الموت".. "آه لو نقدر ما نعبّرش الموت ولا يكون فارق معانا".. رغبتنا في إننا نغلب الموت رغبة قريبة قوي من الغريزة لكنها كمان بتبان منطقية وجذابة لو فكرنا فيها..

لما بتيجي أخبار عن موت حد نعرفه أو شاب صغير أو ناس بريئة أو أطفال بتيجي مع كل خبر أحاسيس مُرعبة من الحيرة واللخبطة.. مشاعر إن الموت مالوش "مسكة".. ما حدش إذا جاز التعبير عارف "يلمّه".. ماحدش قادر يفهمه أو يتوقعه أو يستعد له للآخر..

ومع كل الصدمة والألم والبُكا بتيجي مرحلة من شوية حسابات غالبا معظمنا بيعملها تلقائيا بعد ما يهدى شوية.. أسئلة وعلامات استفهام زي "هو أنا ممكن أموت قريب؟" "في السن ده؟" "أهلي وأصحابي وحبايبي هايعملوا إيه؟".. وبرضه بتيجي كسرة القلب مع كل تعليق بنسمعه اتقال على لسان اللي ماتوا.. إزاي كانوا متضايقين في آخر وقت.. أو إزاي كان ممكن يتفادوا الحادثة.. أو قد إيه أحلامهم كانت أحلام بسيطة.. أو قد إيه كانوا بُسطا وطيبين ومحبوبين..

والظاهر كده إن الحكاية دي حركت ولسة بتحرك أنشطة كتير في الحياة زي مثلا الاختراعات والأبحاث اللي بتحاول تطوّل العمر أو تمنع التعب أو تعالج أمراض.. أو الأنشطة اللي بتساعد الناس تكسب فلوس أكتر عشان تعيش عيشة أريح وتأجل "الضيف السخيف" اللي كلنا عارفين إنه هاييجي..

أكترنا قبول لفكرة الموت بيشوف فيها انتقال لحالة أفضل فيها حياة لكن من نوع شكله مختلف عن الحياة على الأرض.. لكن من أكتر الناس قبول للفكرة فيه ناس مش عايزة الموت عشان الألم والوجع اللي بيسببه مش لينا لكن للناس اللي بنحبهم وبنسيبهم ورانا..

ولأن الموت في مفهومنا البسيط هو أقصى درجات غياب الحياة, فالمطلوب لهزيمته حاجة تكون "أقصى" برضه.. ما ينفعش نُص نُص.. واعتقادي الشخصي هو إن الوحيد اللي يغلب الموت هو "الحب"..

الحب هو اللي بيخلي الأم والأب على استعداد كامل إنهم يموتوا حرفيا عشان ابنهم ما يتأذيش.. ذكرى اللي بيموت بتفضل مستمرة مش على قد ما أنجز من اختراعات وفايدة للبشرية.. ومش على قد تأثيره وقوته السياسية ولا عدد الأحلام اللي عرف يحققها.. ناس كتيرة "ماتت" وهي لسة بتتنفّس وبتاكل وتشرب وتمشي لأن ما حدش حبها.. ذكرى اللي بيموت بتفضل مستمرة عند الناس اللي بتحبه.. وعند الناس اللي حبهم..

الحاجة الوحيدة اللي تخلي إنسان يفضل عايش حتى لو مات هي إنه يكون حَب واتحَب للآخر.. ساعتها بس وجود الجسد الضعيف ده أو غيابه مش هو العلامة الوحيدة اللي بتدل على الحياة..

كل واحد عرف يحب وعرف يستقبل الحب غالبا أخد شوية خطوات عشان يموّت الضيف السخيف اللي ممكن يفرّق أجسام الناس عن بعض لكن ما يقدرش يمسح مشاعر حب اتكونت بين المحبين..

كل حد حبني وحبيته محبة حقيقية هايفضل عايش على طول.. والحب هو اللي هايخليه عايش في تفكيري.. عايش في ذكريات حلوة بأفتكرها.. عايش في ألبوم الصور وفي أماكن روحناها وحكايات قلناها.. عايش في أحلام حلمها وناس أثر فيها وبصمات سابها..

اللي غلب الموت ما غلبهوش بالشطارة ولا التكنولوجيا والعلم.. اللي موّت الموت موّته بالحب..

7 comments:

  1. احيانا الحب بيموت القلب و هو عايش , ربنا يفرح كل البشر
    كالعاده بتلمس افكار حلوه , و كأنك بتطير تجيبها من وسط السحاب :)
    عزه عارف

    ReplyDelete
  2. أكثر من رائعة ياماجد

    ReplyDelete
  3. كلام صح جدا جدا جدا.وعن تجربة شخصية ممكن أقولك كمان أنك لو كان ممكن بعد فترة تنسى حد حبيته لكن صعب جدا جدا تنسى حد حبك أوى حبك لدرجة انه خلاك نسيت تفكر انت كمان بتحبه ولا لأ و محستش بنفسك غير لما الوقت فات و كان فارق حياتك والدنيا كلها بدون سابق انذار وقتها بتحس بدايرة كبيرة حواليك فاضيةمهما كان عدد الموجودين بعدها,بتحس كأنك كنت ملك وحد أخذ منك عرشك. وكأن الموت أصبح انتقام الحبيب من المحبوب يعنى لو ما أخدتش حقى فى التفكير منك وانا عايش هخليك تفكر فيه باقى عمرك !مش هروح عن بالك ابدا الا فى ساعات النوم ! وتحدى رهيب على طريقة عبد الحليم" أن يسعدنى تبعد عنى وتجرب غيرى فى هواك شوف مين حبه أكتر منى لو شاف اللى انا شوفته معاك. ابنى اماله وهدها واحسب دموعه وعدها وتعال قولى بعدها هو حبيبك ولا انا" عموما مش كثير على اللى حبونا اننا نفتكرهم كل وقت لو كانت الذكرى هى الحاجة الوحيدة اللى ممكن تخليهم عايشييين على الأقل جوانا...

    ReplyDelete
  4. الموت مشكلته من وجهة نظري اانه اقصى صورة للاحساس بالعجز
    فقدان السيطرة و لتحكم
    انا عن نفسي اموت ما اموتش ، طز ، مش مشكلة
    لكن كوني اتخيل ان حد بحبه يموت
    يا لهوي
    دي كارثة
    مش عشان بس هيوحشني
    لا
    عشان انا هكون عاجزة عن انقاذه
    حتى لو ما كنتش معاصرة وقت انتقاله من الحياة
    او ما كانش بسببي
    بس اصلي عارفة ان الموت لما بييجي مافيش حاجة هتمنعه
    الدنيا كلها مترتبة ان يحصل انتقال الشخص ده
    لو رحنا المستشفى ممكن نقع في ايد دكتور ما بيفهمش
    او بيفهم بس مش عارف يتصرف صح
    او المرض او المشكلة اكبر من قدرته
    الجسم بيستسلم فمش عارفين نلحقه
    الاعضاء بتبوظ
    الاجهزة بتقف
    و مش عارفين نلحقها
    القدر _ ان استخدمنا اللفظ ده _ بيتحرك و بيوجه كل حاجة في الاتجاه ده
    قيس على كده كل حاجة
    مرض - حادثة - خطا طبي - مشكلة - حتى الوفاة دون اسباب خارجية
    دي فكرة بتجنني
    بتحسسني بالعجز
    لما باجي اوصل اهلي اي مشوار
    حتى لو مش في طريق سريع
    يعني لو منطقة عادية جدا او زحمة كمان
    بيجنني احساس العجز ده لحسن يحصل لهم حاجة
    مش عشان خايفة احس بالذنب
    لكن خايفة احس بالعجز فعلا قدامهم
    ببقى عايزة اقولهم يقفلوا الlock
    بتاع الباب لحسن حد يتعرض لنا
    او لحسن الباب يفتح مرة واحدة
    بس برجع و اقول لا لحسن تحصل حادثة فيكون الاحسن لهم انهم يفتحوا الباب و ينقذوا نفسهم
    .
    طب يربطوا الاحزمة ، اهو امان لو حصلت اي فرملة ، بس لو حصلت برضو حادثة مش هيعرفوا ينجوا بنفسهم .

    يمكن يكون كلامي او مشاعري ناحية الموت مختلفة شوية عن اللي انت شايفه
    بس هو ده الموت بالنسبة لي

    ReplyDelete
  5. مش فاكرة دي المرة الكام اللي بقرا فيها البوست، لكن كل مرة بقراه زي أول مرة وبيحرك جوايا حاجات كتير. شكرا على الأفكار وعلى صياغتك الجميلة ليها. أمنيتي إن قبل ما يجي ميعاد زيارة الضيف أكون حبيت للآخر.

    ReplyDelete