Saturday, December 22, 2012

على الأرض السلام


زي اليومين دول من 98 سنة كانت الحرب العالمية الأولى بدأت (أكيد طبعا وقتها ماكانش اسمها الحرب العالمية "الأولى" لكن في التاريخ اتسمّت الحرب العظيمة أو الحرب التي ستنهي كل الحروب).. المهم إن مع كل الألم والموت والجرحى اللي كانت مصاحبة للحرب دي إلا إن كتب التاريخ بتتكلم عن حادثة غريبة جدا في الوقت ده.. والحدث ده بيسمّوه في التاريخ "هدنة الكريسماس" أو Christmas Truce.. الفترة دي كانت غريبة لأن وسط الحرب ووسط العداوة الشديدة بين الألمان والإنجليز كان الجنود الألمان والإنجليز بيلعبوا كورة مع بعض في المنطقة اللي بيسموها في الحروب الـ No-man Land اللي هي أرض مش بتاعة حد من الطرفين لسة لكنها أرض المفروض إن كل طرف بيحاول الحفاظ عليها وإلا العدو هايتوغل زيادة... كانوا بيسلّموا على بعض ويلعبوا ضد بعض ماتشات كورة..

كورة؟ في الحرب؟ وبين أعداء؟ غريبة جدا.. لكن حدث زي ده إذا دل على حاجة فهو بيدُل على الميل الفطري عند البني آدم للسلام.. محاولة إن يبقى فيه "تلكيكة" عشان نسلّم على بعض ونتكلّم ونتنافس في لعبة جميلة.. رغم إننا عارفين إن "المفروض" إننا مش طايقين بعض..

في مجال العلاقات الدولية فيه نظريات كتير بتشوف الدول والمؤسسات والأفراد والهيئات بيتعاملوا مع بعض إزاي.. وعشان النظرية تكون مقنعة, أصحابها بيشرحوا هم شايفين الطبيعة البشرية إزاي وكمان متوقعين مستقبل العالم والتعاملات مابين الدول والأفراد يكون رايح على فين.. حادثة زي دي بتلخبط أصحاب نظرية الـRealism لأنهم ببساطة بيقولوا إن الطبيعة البشرية بتميل لمحاولة السيطرة والوصول للسلطة وإن الخوف بيتحكم في حاجات كتير.. وده طبعا بيفسّر حروب كتير واستبداد السلطة وتدخلات الجيوش على مستوى العالم.. لكن بيقفوا محتارين قُدام حدث زي اللي حصل في الحرب العالمية الأولى ده وقت الكريسماس..


من أكتر من أسبوع معظمنا سمع عن الحادثة اللي حصلت في أمريكا واللي أدت لوفاة أطفال ومدرسين نتيجة لهجوم مسلّح على أحد المدارس.. كمان سمعنا عن مُدرسة من المدرسات اسمها Victoria Soto اللي حرفياً دفعت حياتها تمن حماية الأطفال اللي عندها في الفصل لما دخل عليها اللي معاه سلاح فقالتله إن الطلبة بتوعها في الجيم برة الفصل.. طخّها وماتت لكن كانت خبت الطلبة بتوعها في دواليب وأماكن مستخبية جوة الفصل..


أحداث زي دي مش بتقول غير حاجة واحدة.. إن الخير موجود.. ومش بس موجود ده موجود "بفجاجة" (إذا جاز نقول كده) في سياق يكاد يكون أبعد مايكون عن وجود أي خير أو حتى سيرته..

وسط حرب أو وسط هجوم مسلّح ونلاقي نور.. نلاقي شوية أمل.. نلاقي حتّة خير بتشع بمنتهى الوضوح عشان تقول إن الأصل في الإنسان الخير.. الطبيعي والمنطقي والأصيل جوة البني آدم هو الجمال والحب والتعاون والمشاركة والتضحية..

إذا كان العالم الأيام دي بمختلف مذاهبه ومعتقداته بيحتفل بميلاد السيد المسيح فالاحتفال مش مجرد احتفال بشجرة وأغاني وزينة وهدايا.. الاحتفال برسالة حب وعطاء وتضحية من السما.. باختلاف معتقداتنا الدينية معظمنا بيُجمع إن المسيح هو رسالة سلام للعالم.. كلمة من الله سبحانه بتشاور على ود وحب وتضحية..

وسط الألم والوجع الرهيب اللي بلادنا والعالم بيعيشه لسه الأمل ماماتش.. لسة الحب ما استقالش.. لسّة الخير بيتلكك إنه يُحشر نفسه في أي مجال متاح.. لسّة فيه شباك جَمال وباب محبة مفتوحين بيبُصوا على إمكانية كبيرة لتعايش وسلام وتعاون.. 

عندنا اختيار إننا نشوف على الأرض حروب وصراعات واستبداد وفساد.. ناس بتموت وناس بتجوع وناس بتتعذب وتتظلم..  لكن لسّة كمان عندنا فرصة نشوف خير وجمال وحب وتضحية وتعاون وطفولة ومستقبل حلو.. ونشوف على الأرض السلام..

12 comments:

  1. حبيبي يا ماجد .. متاخذ هدنة بقى وتيجي نسلم عليك

    ReplyDelete
  2. بذرة الخير موجودة طول الوقت المهم الارض اللى هتتزرع فيها. فى ارض جاهزة تطرح ثمر وفى ارض محتاجة تتعالج شوية من بعض التلوث وفى ارض فسدت طبيعتها تماما مش هينفع فيها معالجة والمجهود اللى مبذول فيها مجهود ضائع لا يؤتى بثمر

    ReplyDelete
  3. حلو البوست دا اوى و خلانى عايزه ابكى , يارب نشوف الحب و السلام دا فى مصر رغم ان قلبى مليان غضب من الاخوان

    عزه عارف

    ReplyDelete
  4. Nice one..merry christmas ya maged :)

    ReplyDelete
  5. This is by far the most touching post I have read for you, Maged. Bless your mind and heart. Have a very special and merry Christmas :)

    ReplyDelete
  6. yalla Come to Egypt to celebrate Christmas :)
    I am still insisting on publishing your posts in a book :)

    ReplyDelete
  7. Great reminder that much good still in the world even in difficult time. We have to see it, recognize it, encourage it, and more importantly create it. Now is the time. Thanks Maged.

    ReplyDelete
  8. كلام راااااائع يبعث الامل والتفائل في النفوس من جديد احييك علي نقلك الينا لهذا الجانب الرائع من الحياة

    ReplyDelete
  9. انت برنس يا دكتور :)

    ReplyDelete
  10. Merry Christmas ya Maged,God bless!:)

    ReplyDelete
  11. ماجد .. انت بتضيفلي كتير
    سواء جانب معرفي او ثقافي او تنموي
    ..
    علي فكرة انت مابقتش بتعملي
    Mention
    ماتنساش البوست الجاي =)





    ReplyDelete