Monday, October 15, 2012

أحلى صباح

قرينا من كام يوم خبر جواز صباح للمرة التامنة عن سن 89 سنة.. وبعيدا عن تفاصيل الخبر وعن صحة حكاية موسوعة جينيس من عدمها إلا إن ردود الأفعال ناحية الخبر بتدل على كذا حاجة..

وعلى الرغم من اقتناعنا العقلي بإن من حق أي واحد يتجوز في أي سن هو عايزه إلا إننا برضه بنلوم ونعتب ونتريق ونستنكر.. عندنا شعور ضمني بإن فيه مرحلة معينة من الحياة "مش من حق" الكبير أو العجوز أو المسن (أو أياً كانت التسمية) إنه يفرح ويهيّص ويعمل حاجات تبان لينا إنها تافهة.. الكبير في السن يقعد في البيت منتظر إنه يموت.. يتفرّج على التيليفزيون حسب ميول باقي أفراد الأسرة.. يروح معاهم الأماكن اللي يروحوها.. وياكل الأكل الموجود.. في المرحلة دي "ممنوع" إنه يبقى "نِفسه" في حاجة.. الأحلام والتطلعات والكلام ده هو بس للي لسة قدامه على الأقل بتاع تلاتين أربعين سنة في عمره!

فكرة غريبة.. ومؤلمة.. بنوعظ وننصح بمعدل رهيب قد إيه الحياة حلوة وقد إيه التفاؤل كويس.. بنسمع أقوال مأثورة عن الأحلام والتطلعات مهما كان الإحباط والمشاكل.. لكن نيجي عند محك حقيقي نتصرف بطريقة مختلفة..

كلنا بنحب صباح وهي في العشرينات من عمرها.. وهي في العشرينات من حقها تغني وتمثل.. من حقها تلبس أحلى فساتين.. من حقها تحب وتتجوز.. من حقها تصرف فلوسها زي ما هي عايزة.. لكن لو فكرنا كويس يمكن نلاقي إن صباح وهي 89 أحلى.. أحلى في حبها للحياة.. أحلى في تصرفاتها اللي مش بتضايق حد لكن بتحققلها سعادة.. أحلى لأن وهي مش معاها فلوس ولا شغل ولا جمال قادرة إنها تعيش وتتبسط وتعبر عن مشاعرها.. قادرة إنها تكون جذابة لشخص مش مضطر بأي حال من الأحوال إنه يرضى يرتبط بيها..

اقتناعنا بإن الانتحار مش صح أخلاقياً لأننا مش بنمتلك حياتنا مش بيمنعنا من إننا نشعر إنه "الحل الوحيد" للي عجّزوا.. حتى لو ما انتحروش حرفيا إلا إننا بنأكد ليهم إن "الحل الوحيد" هو انتظار الموت.. ماهو مش معقول بعد ما شاب يودّوه الكتّاب.. فمش من حقه يتعلم حاجة جديدة ولا يمارس هواية مختلفة ولا يسافر (أصلنا خايفين عليه) ولا يتجوز (أصل هاتيجي واحدة تضحك عليه وتاخد فلوسه) ولا يحلم ولا يعيش في مكان جديد ولا يشتري حاجة جديدة غالية.. ولا أي حاجة.. بس ممكن يتنفّس!

أعتقد إن صباح الحلوة الجميلة الموهوبة الشيك الغنية لو قارناها بصباح دلوقتي هنلاقي إن صباح دلوقتي هي صباح اللي شايفة الحياة جميلة حتى لو مافيش فلوس.. وحتى لو الجمال راح.. حتى لو مافيش شغل ولا أضواء ولا برامج ولا جوايز.. صباح اللي لو في مكان تاني كانت تبقى نموذج لحب الحياة.. نموذج للرغبة في الاستمرار بغض النظر عن الظروف.. حتى لو سمعها ضعف.. حتى لو مش قادرة تغني أو تتكلم زي زمان.. فعلا "غريبة لعبة الساعات" على رأي عبد الرحمن الأبنودي اللي كتب الأغنية المشهورة "ساعات ساعات"..

مقارنة بالوقت اللي فات أعتقد إن صباح 2012 ببساطة هي أحلى صباح


9 comments:

  1. أحلى مطربة و احلى صباح و احلى نظرة للحياة انك تعيشها بسعادة حتى اخر نفس :)


    عزه عارف

    ReplyDelete
  2. Fantastic again and again. Great voice for tomorrow's thinkers.
    Handicaped parking, disability accomodation among other things indicates the social fabric of a good society.
    By the way, the elderly in USA have a large voice in the election. Thanks Maged.

    ReplyDelete
  3. الله! الله! الله عليك يا أحلي وأرق ماجد في كل مكان وزمان وحياة...كل التحية والاحترام والتقدير لتفكيرك وأفكارك...تمنياتي بالنجاح الباهر الدائم بإذن الله.

    ReplyDelete
  4. Wonderful post.Very , very touching.First time for me
    to FEEL this song ;fe3lann "3'areeba le3bet elsa3aat".
    Thanks ya Maged for "A7la Sabaa7".
    N

    ReplyDelete
  5. فكرتك فى حد ذاتها راقية ومقنعة وللاسف فى مجتمعاتنا يوجد خلط ما بين فكرة "الاقبال على الحياه" و"التصابى" بس فى حالة صباح تحديدا هناك ابعاد اخرى ... الزواج للمرة الثامنة يعنى ان السبع مرات اللى فاتوا او يمكن اقل من سبعة شوية انتهى الزواج بالانفصال! الانسان ممكن يغلط فى اختياره مرة او اثنين بس سبعة دى تعنى انه غير مسئول وغير ناضج عاطفيا معناها انى معنديش نية ان الشخص اللى هرتبط بيه ده هو شريك حياه فعلا بكل معنى الكلمة ولكن اصبح مجرد وسيلة للتغيير والتجديد لما هتفقد رونقها هتخلص منها واشوف حاجة ثانية. فيه حاجة كمان لو اخترت شخص اصغر منى ب10 او عشرين سنة مرة او اثنين يمكن نعذر الحب ولكن لو هو ده اختيارى كل مرة فاعتقد ان ده ليه دلالة نفسية بتزيد خصوصا عند الفنانات وهى الاحساس بانى رغم سنى ورغم زوال الجمال الشكلى نوعا ما فانا مازلت اكثر جاذبية من اخريات اقل عمرا .مجرد وجهه نظر لا تتعرض مع تقديرى للفنانة صباح

    ReplyDelete
  6. اول مرة اختلف معاك :)

    ReplyDelete
  7. دايما المادية مسيطرة على أفكارنا والسطحية يعني لو بنتكلم عن الحب نفتكر الشكل الجميل قبل العطاء والتضحية والروح ..زي الشكل في الدين أو النص الي ممكن يكون ضد الانسانية وجوهر الدين ونتمسك بيه

    ReplyDelete
  8. طريقة الفكرة جميلة بس احنا شعب نكدي بيحب الحرمان بيخاف يختار حتي انه يكون سعيد و مقبل علي الحياة و دا بيخلي الواحد يدفن نفسه بدري بدري

    ReplyDelete
  9. فعلا والله الانسان العجوز تحس ان الناس بتعمله على انه ملوش حق انه يعيش, كل اللي عليه ان هو يقعد في البيت وينتظر الموت , اد ايه الشعور ده مؤلم اوي انك تحس ان كل الاي حواليك مستنينك تموت :(

    ReplyDelete