Sunday, April 22, 2012

شوف الخامة؟

من أمتع الأماكن السياحية اللي شكلها مبهر عن قرب أكتر من الصور برج إيفل في باريس.. البرج ده هو أطول مبنى في باريس وأكتر مكان سياحي برسم دخول بيتزار على مستوى العالم كل سنة..

البرج اتبنى سنة 1889 عشان يبقى في مدخل المعرض الدولي اللي أقيم نفس السنة.. ومن ضمن الحاجات الطريفة إن البرج كان المفروض تتم إزالته بعدها ب 20 سنة لكن طبعا ماحصلش..

الراجل الأساسي اللي شارك في تصميم البرج هو جوستاف إيفل (واللي طبعا إتسمى البرج على اسمه).. جوستاف إيفل كان بيواجه تحدي غريب.. التحدي ده هو إن فكرة "المبنى الجميل" مرتبطة بالمباني اللي معمولة من حجارة.. مش حديد.. وحتي المباني اللي كان بيستخدم فيها حديد في الهيكل كان بيتضاف عليه من برة حجر stone عشان يدي الشكل الحلو..لكن البرج معمول كله من حديد والمتوقع كان إن المبنى مايبقاش مشهور ولا شكله جذاب ولا يحمل أي عنصر جمال.. لأنه معمول بس من حديد..

الراجل ده صدق إن الخامة مهمة.. لكن الخامة مش كل حاجة.. وعلى قد ما هو مهم إني أشوف "المكونات" و"الـ material" إلا إنه يمكن أهم إني أشوف "مين" اللي صمم.. "مين" اللي فكر في العمل ونفذه.. مين اللي بعبقرية وفن وجمال لمس بإيده حتة حجر أو ورق أو حديد أو طين وشكّل عمل فني راقي مختلف عن أي حاجة تاني..

وإحنا بنبص على البني آدمين عندنا اختيار نشوف في كل واحد فيهم "مجموعة خلايا وأنظمة فسيولوجية شغالة بمهارة" أو "صورة ابتكرها الخالق بإبداع"..

أقدر أشوف فيك "أصل طين" وأقدر أشوف فيك "تعبير عن جمال الله وصنع إيده"..


من الحاجات الطريفة المعلومات اللي بتتناول جسم الإنسان وبتقول إن لو واحد وزنه 70 كيلوجرام فهو عبارة عن "دهن يكفي لعمل 7 حتت صابون" و"كربون يكفي ل 7 أقلام رصاص" و"فوسفور يكفي لعمل 120 راس عود كبريت".. وهكذا..

المعلومات دي مجرد "معلومات طريفة".. لكن أنا وإنت أكتر من مجرد "خامة".. أنا وإنت صنع إيد فنان مبدع.. استخدم "طين" وأبدع صورة منه.. صورة تشاور عليه هو.. صورة تشهد عن روعة وعظمة إله.. إله قادر على صنع أجمل شيء من مجرد طين..


هيفضل برج إيفل يستقبل ملايين من الزوار من مختلف الجنسيات اللي شايفين في مجرد برج حديد جمال وإبداع.. في راجل اسمه لسّة مخلد ومرتبط باسم البرج.. لأنه قدر يصدق إنه يطلع حاجة حلوة من شوية حديد..

وهنفضل أنا وإنت من أصل طين.. لكن اللي عملنا هو أعظم مبدع..

10 comments:

  1. بغض النظر عن المحتوى الأجوف للموضوع
    وعن فقدان الترابط بين الفقرات
    وعن الاسلوب الركيك
    وعن الغلطات الاملائية
    وعن المعلومات المغلوطة
    إلا ان الموضوع تحس ان اللي كاتبه واحد واحشني جدا ويمكن عمري ما كنت نفسي اشوفه اكتر من دلوقتي
    بالمناسبة انا كنت بهزر معاك
    موضوع زي الزفت الصراحه
    .......
    ملحوظة : الفقرة الخامسة فيها غلطة املائية فعلا

    ReplyDelete
  2. أنا فقط اريد التأكيد على ابداع اعظم مبدع فيك يا مجز.... Bless you for always being positive
    Joanna

    ReplyDelete
  3. 'Fearfully and wonderfully made' :) God bless...

    ReplyDelete
  4. موضوع ... كالعادة :) بالذات أنه لمس جوايا حبين ، فرنسا والهندسة :]

    الإنسان فعلا
    made by GOD :)
    بس المصيبة السودا أن الناس مش مقدرة قد إيه هى تحفة تحفة !!
    مشاعرى وعقلى وقدراتى الخارقة للطبيعة للى بتخلينى احس باصحابى البعاد عنى ألاف الأميال .. كفاية المعجزة اللى محدش مستوعبها عن نفسه لحد دلوقتى وهى ... أبديته !!

    وبعدين واحد يفجر نفسة وواحد ينتحر وواحد يدهس بنى أدمين زى الفراخ .. وناس تبص لكل دا بتقزز لمجرد "لخبطة الخامات" زى ما بتقول !!

    دنيا غريبة !

    ReplyDelete
  5. ماشاء الله عندك قدرة جميلة على ربط الافكار و استخراج دلالات رائعة , يارب يوفقك دايما

    عزه عارف

    ReplyDelete
  6. More than wonderful. N

    ReplyDelete
  7. I love the idea that we should see the designer in the design not the material!!! In this sense we will value the people around us more because we won't see them as a certain group of.... whatever but we will see them as God's creation the perfect designer and artist!!! Thanks ya Maged!!! Miss you.

    ReplyDelete
  8. الموضوع شدني علشان ليه علاقة بباريس ، و برج إيف فعلا مبهر و أكتر أثر سياحي يتم إلتقاط صور له

    عجبني التجريد في الجملة ديه
    من الحاجات الطريفة المعلومات اللي بتتناول جسم الإنسان وبتقول إن لو واحد وزنه 70 كيلوجرام فهو عبارة عن "دهن يكفي لعمل 7 حتت صابون" و"كربون يكفي ل 7 أقلام رصاص" و"فوسفور يكفي لعمل 120 راس عود كبريت".. وهكذا..

    Revnia II

    ReplyDelete
  9. الصنعة دليل على الصانع ..!!
    تسلم إيدك :)

    ReplyDelete
  10. Great article. Opens the mind to see beyond what you see. Thank Maged

    ReplyDelete