Friday, August 19, 2011

مافيش شكر كفاية

 بقالي أكتر من ساعة باحاول أنام ومش قادر..فقلت مابدهاش!
 باكتب البوست دي وانا باسمع أغنية "يا بلادي..يا بلادي..أنا باحبك يا بلادي"..أغنية جميلة لرامي جمال وعزيز الشافعي..كلمات وألحان الأخير..والجزء الاشهر في الأغنية لبليغ حمدي
مش قادر أوصف أنا حاسس بإيه بالظبط! مشاعر مختلطة ودموع.. وحزن ممزوج بأمل وفرح...أسف وفي نفس الوقت امتنان ورجاء..ندم وفي نفس الوقت تطلع لمستقبل مختلف...مرارة ووجع ومعاهم حلاوة وابتسامة..
الأغنية على لسان شهيد..بيودع أمه وبلده..رايح لمكان أحسن لكن لسه بيقول عن الملايكة اللي واخدينه "قلتلهم الجنة بلادي!"
إزاي كده؟
إزاي تختار تموت؟ إزاي تختار تموت وانت مش مضطر تعمل كده؟ إزاي تضحي بكل حاجة عشان غيرك...مش لاقي كلام أشكرك بيه!
مت بدالي وبدل ناس كتير..اللي عملته ده يفوق منطق البشر..أنا ممتن جدا ليك!
هافضل مديون بعمري كله للي انت عملته..
ماقدرش أرد الجميل مهما حاولت..
.الحاجة الوحيدة اللي أقدر أعملها إني ماسيبش دمك يبقى راح هدر...و أكيد هاكمل المشوار عشان أرفع راسك..

أشكرك!





4 comments:

  1. عارف إختارو الموت ليه بخلاف إن ده قضاء ربنا أكيد .. هقولك فكرتي ،،
    الإنسان مخير في كل شيء.عدا شيئين. وتكمن المفارقه أن الأشياء التي أجبرنا عليها هي أحب الأشياء إلينا ،، الأرض التي يولد فيها و الأب و الأم فكل منهم يولد حبه مع الإنسان في اللحظات الأولي من عمره علي البسيطه. وهنا لا يحركك للدفاع عنهما العقل ..... إنما اسمي المشاعر

    ReplyDelete
  2. inspiring - has a another dimention for me .. Thank U

    ReplyDelete
  3. أنا بعشق الأغنية دي و عاملاها رنة في موبايلي....!!!!

    ReplyDelete