Friday, July 29, 2011

مش عايز أبقى أبو قردان

أبو قردان صديق الفلاح! صح؟ مش علمونا كده؟ ليه بقى؟ أصل قال إيه أبو قردان بيساعد الفلاح ومش بيضره..بينقيله كل الحاجات اللي ممكن تضر المحصول..يبقى صديقه ولا لأ؟ لأ طبعا!! وألف لأ!
أنا أفهم إن أبو قردان يبقى صديق الفلاح لما الفلاح يبقى صديق أبو قردان!! الصداقة اللي طرف فيها مبسوط بوجود الآخر لأنه بيفيده أو يحميه أو يوفرله..هي صداقة أبو قردان..
اللغة بتاعتنا بتنقل مفاهيم كتير من غير ما نحس.. ساعات اللغة نفسها بتأثر في نظرتنا للمواقف..وساعات ثقافتنا وتاريخنا بيأثروا في اللغة ويؤدوا لتغيرها..
المهم.. تعالوا نشوف إيه تاني غير حكاية أبو قردان صديق الفلاح..جمل وتعبيرات تورينا نظرتنا للصداقة والأصحاب عاملة إزاي!
لو مش موافق على الجمل دي..فكر بنفسك إيه هي الصداقة!
فلان صاحب عيا! وصحوبية العيا غالبا بترجع لفكرة إن العيا وراه وراه..ملازمه طول الوقت! واللي أعتقده هو إن مش شرط الصداقة تكون كده..صاحبك مش شرط يكون الشخص اللي على طول بتخرج معاه أو بتشوفه..
فلان صاحب أطيان وعمارات! حاجة تقرف (على رأيي)!ومعنى الجملة إن الأطيان والعمارات بتاعته! ياترى توافق إن علاقات الصداقة تكون انت فيها بتمتلك صاحبك؟ تكوني بتتحكمي في صديقتك؟ أكون بأحس إن فلان ملكي؟
فلان هو صاحب الفكرة! هو اللي عملها..خلقها..لولاه الفكرة ماكانتش موجودة! مين يوافق يكون هو محور حياة شخص تاني؟ ومين يوافق إنه يفضل يدور في فلك حد تاني ويكون مجرد فكرة في حياته؟
دور في فلك اللي عملك..اللي خلقك..خللي مركز حياتك الله سبحانه مش حد تاني..
وارفض إنك تدخل في علاقة ممكن يسموها صداقة لو حد من الأطراف مجرد فكرة..أو أطيان وعمارات..أو عيا..
وبالنسبة لأبو قردان فمن أظرف التشبيهات اللي سمعتها: فلان عامل زي أبو قردان..أبيض وغتت!
 أكيد مش عايز تبقى أبو قردان!

7 comments:

  1. حلوة قوى قوى المقاله دى .. وبتتكلم عن أهم 3 أشكال من مرض الأعتمادية فى العلاقات .. لما صحبى يبقى اللى بيعمل كل حاجة معايا أو اللى كل يوم بشوفه ولازء فيه .. أنا ينفع أتمتع بالحياة وأعمل حاجات تبسطنى وانا لوحدى ,, وانا مع ناس تانى مش لازم نفس الأصحاب كل مره

    كمان لو بحب أتحكم فى صحبى أو بحس ان فلان ملكى أنا غالبا عيان قوى .. لأن السؤال الكبير انا ليه بعمل كده ..فى علم النفس بيقولوا ان ده لأن الأنسان اللى بيحاول يتحكم بيكون عنده مخاوف انه يخسر العلاقة أو ميخدش منه اللى هو عايزه ..يعنى عايز يتعامل بطريقة معينه و ياخد حب بقدر معين و بيحاول يتحكم علشان يهدى خوفه ويضمن ان اللى عايزه هيخده
    اما المثال ال3 فهو عظيم لأنه بيتوجد بكثرة بين المتزوجين .. كل حد عايز يكون محور حياة التانى بشكل خاطئ كأن مفيش فى الكون أشخاص تانى غيره ..الزوج اللى يقبل أن مراته توقف حياتها و نشاطتهاودنياتها علشان بس تعيش علشانه شخص انانى عايز يكون محور حياتها ..وياخد أحساسه بقمته منها زى مساس الدم بالظبط وكده الزوجه برده و الأصحاب ..
    وأجمل جمله فى المقاله أن الله سبحانه يكون هو محور الكون لأن ده الحد الكبير والعظيم اللى يستاهل كده واللى معندوش مرض ..يعنى عمره ما هيستغلنا ولا هيعتمد علينا فى انه يحس بقيمته ..حاشا لكن وجوده فى حياتنا كنقطه محور هيظبط توجهتنا نحيه نفسنا والأخر

    ReplyDelete
  2. Elta3lee2 bta3 3'ada Magdy fih kol elly kont 3ayez 2a2olo w kaman yenfa3 ykon emtedad lelmaqal
    Good job Maged :)
    Nice comment 3'ada :)
    You guys should work together or something.

    ReplyDelete
  3. بس هل المقصود بصاحب عيا/أملاك/الفكرة هو إن الشخص هو صديق هذه الأشياء أم المقصود إن الشخص ذو مرض أو ذو أملاك أو ذو الفكرة؟ أعتقد إن المقصود هو الملكية و لكن ده بيرجعنا لفكرتك و هو إن الصداقة فى لغتنا و ثقافتنا بترتبط بشكل ما بالامتلاك

    ReplyDelete
  4. Great Maged
    Ana bgad mo3gab Gedan bkol el 7agat elly btktbha m3a eny areet 4 mwade3 bs w fe3lan a7la 7aga fel mwade3 elly btkbha hya enaha wak3ya gedan w funny w tre2et ktabetha bsyeta w sahla.

    W b7'soos mwdo3 abo erdaan 3agabny brdoo t3lee2 mktoob hna bta3 3'ada magdi w yareet tdeef el examples elly 7ataha l2anaha btatatarak le examples mohema 3n el e3temadya elly entasharet awee el yomeen doo.
    Great job both of you.

    ReplyDelete
  5. 3agebane awe .. awe al fkra bt3t el mawodo3 w 3gbne kman el comment el awlany brdo bta3 ghada magdi .. f3ln klamk mohm w mzbot awe .. fkra kwesa enko tektbo hagat m3a b3d fel mosta2bal

    ReplyDelete
  6. Very deep and important post.I had to think a lot of it.Thanks ya Maged . N

    ReplyDelete