Friday, June 24, 2011

..... الست السمرا المسيحية اللي بتعرج


يعني إية تمييز؟ معناه إيه أنك تضطهد حد؟ وإيه ممكن تكون الأسباب؟
من وجهة نظري بأشوف إن التمييز مش هو إني أتعامل مختلف مع الآخر ومش هو إني أكره حد أو ما احبش حد لأنه مختلف عني..التمييز بيبتدي –في وجهة نظري- قبل كده بشويتين تلاتة..
عارفين بيبتدي امتى؟
بيبتدي من تصنيفي للآخر..فكر كده فيها؟
أنا لما بافترض إني بانتمي للمجموعة الأصلية -أيا كانت المجموعة دي- زي مثلا الرجالة أو الأهلاوية أو الشباب أو القاهريين أو أو أو..بافترض إن اللي برة المجموعة دي هو الآخر..ممكن طبعا بعد الافتراض ده أتعامل كويس مع الناس دي..لكن المشكلة في التصنيف من أساسه..لأني حتى لو اتعاملت كويس مع اللي أنا فاكرهم مختلفين عني باعمل كده من منطلق إني أنا اللي كويس وإني باقبل الآخر –رغم إني عندي اختيار إني ماقبلهومش- لكن لأني إنسان كويس أو معتقداتي بتقوللي أقبل كل الناس فأنا مضطر أقبلهم...
المصيبة في التقسيمة..مش في اللي بعد كده..اللي بعد كده ممكن يكون ممارسات وحشة أو كويسة لكن الفكرة في الدوافع اللي قبل كده...
تعالوا ناخد مثال: هل فيه في بلدك تمييز ضد الستات؟ أو المنتمين لديانة معينة؟ أو اللي ساكنين في أماكن معينة؟ متهيألي ناس كتير ممكن تقول إنه فيه..صح؟
طب هل فيه تمييز ضد الطوال أو القصيرين؟ أو الرجالة اللي بشنب أو من غير؟ ليه مبتسم دلوقتي؟ فهمت الفكرة؟
الفكرة إنك غالبا هتلاقي تمييز لو لقيت تقسيم...لكن لإنك عمرك ما قسمت الناس لقرع وبشعر أو لناس بتحب البني و ناس الأزرق أو لنباتيين أو غيره بتلاقي إن فكرة التمييز على أساس الحاجات دي تكاد تكون ساذجة أو غير واردة...
جايز وانت بتقرا المقال ده تكون هتموت وتعرف الكاتب مسلم وللا مسيحي وللا يهودي وللا لا ديني..ممكن تكون عايز تعرف يا ترى راجل وللا ست.. تمييز؟؟ ها؟ أعتقد كده
يمكن ما يفرقش معاك سنه كام أو بيشجع نادي إيه...
نفسك تعرف لو بتميز ضد ناس معينة وللا لأ؟ فكر في الأسئلة دي:
-لو هتوصف حد لواحد صاحبك هتقوله إيه؟ < الراجل جارنا المسيحي ده > (واخد بالك؟ انت بتوصف بس..انت مارحتش قلتله انت كافر..)
-بتستخدم كلمات زي: بس – حتى – لكن...إزاي؟ < فيه واحد معايا في الشغل مسلم بس متفتح...>
-النكت والهزار رايح لفين...؟
المهم..شكرا على القراية..أحب أوضح إن الفكرة هي في التقسيم..لو بتقسم الناس لعمي ومفتحين أضمنلك إنك عايش في ثقافة فيها تمييز لفئة من الاتنين..وغالبا المشاكل بيحس بيها الأقل عددا أو اللي صوته مش بيوصل...
ستات؟ أطفال؟ رجالة؟ مسلمين؟ مسيحيين؟ شيعة؟ صعايدة؟ دكاترة؟ ذوي احتياجات خاصة؟ فقرا؟ أغنيا؟
مين الآخر؟؟؟؟
لما اتخلقت..انت اتخلقت مميز جدا..ماتسمحش لحد إنه يحدك في مجموعة ويقوللك إن المجموعة دي هي انت وإن اللي مش من المجموعة دي آخر محتاج يا إما تكرهه أو تتعامل معاه كويس..
المرة الجاية لما تحتاج توصف حد جرب تستخدم أوصاف زي: فلان المبتسم..أو فلانة اللي ساعدتنا امبارح...جارنا البشوش..قريبتنا اللي جابتلنا طقم الكوبيات...يمكن ده يكون أحسن شوية من ..... الست السمرا المسيحية اللي بتعرج...

3 comments:

  1. Awesome!simple and to the point style..I like a lot and can't agree more!

    ReplyDelete
  2. أخيرا عرفت اشوف مربع التعليق. وكمان كتبت تعليق طويل عريض وهوف القطة أكلته

    واضح انك مضطهدني هههههههههه

    يعجبني اسلوبك المتفائل الذي ينشر طاقة ايجابية ويعجبني ايضا انك تسلط الضوء على بعض الاماكن المظلمة التي قد لانلتفت إليها لأنها مظلمة

    لاأعرف إن كنت أمارس التمييز أم لا ولكني أحاول جاهدة الا اكون من الذين يصنفون الناس تحت اي مسمى ربما لأني عانيت من التصنيف لفترة وربما لأني عشت وسط أجانب لفترة من حياتي وتعلمت منهم طريقة مختلفة للتعامل مع المحيطين بي فتعلمت أن اقبل الانسان كما هو ككتلة واحدة بعيوبه قبل ميزاته ولا يهمني في شيئ اي تصنيف او مسمى او تقسيم أو أو مما نستخدم في عالمنا العربي الضيق الذي تعود تصنيف الناس وبعدها ممارسة التمييز ضدهم حتى بدعوى قبولهم.

    سأعود لاحقا للتعليق ومعذرة على الإطالة

    تحياتي

    ReplyDelete
  3. أحييك بشده وبعنف بجد على الكلام ده ... كان بقالى فترة بقول مش المفروض إننا نقسم الناس على أى أسس .. وإن كل إنسان هو فى ذاتة تركيبة فريدة من نوعها مش ممكن تتكرر .. ممكن نتفق فى نقط ونختلف فى أخرى .. لكن دائماً وأبداً >> إنت هو الكائن الوحيد اللى شبهك

    (*_*)

    ReplyDelete