Saturday, April 20, 2013

ألزايمر

إذا كان أغلبنا شكلنا لطيف وشيك ومحترم ومرسومين كده على أحلى صورة ففيه مواقف بتبيّن حقيقتنا وشخصيتنا واقتناعاتنا.. وسواء بقى ازدراء أو عنصرية أو إحساس بالدونية أو إحساس بإني أحسن من الناس فهي كلها حاجات محتاجة أعمق من مجرد مناقشة عابرة أو لقاء تيليفزيوني أو مقال نقراه..

مش بس خناقاتنا اللي بتبيّن جزء أكبر من حقيقتنا.. ومش بس المواقف اللي فيها بنبقى متضايقين أو متغاظين.. ومش بس وقت لعب الكورة اللي فيه كل واحد بيبان على حقيقته.. لكن هزارنا إلى حد كبير بيدُل على بعض اقتناعاتنا..

الملحوظ إننا بدأنا في الكام سنة الأخيرة تريقة أكتر من اللازم على مرضى ألزايمر من غير ما ناخد بالنا.. طبعا اسم المرض ما فيهوش ألف ولام التعريف لكن الألف واللام اللي في الأول هم جزء من اسم الطبيب النفسي الألماني Alois Alzheimer  اللي اتسمى المرض باسمه..

ولأننا مش بنقصد التريقة على العيانين فأنا قلت إن الكتابة عن الموضوع ده ممكن تكون مجدية لأن حُسن النية متوفّر..

لو نلاحظ نلاقي كتير مننا بيسخر من نفسه لما ينسى حاجة.. وتلاقي ممكن الواحد يقول "معلش بقى.. الزهايمر" ناسيين إن التشخيص ده في حد ذاته تشخيص مؤلم وبيغير حياة المريض وعيلته بشكل كبير..

ودي مجرد واحدة من مجموعة تعليقات كتير مش بس على مرض ألزايمر لكن على برضه الأمراض النفسية فبنلاقي مثلا لما حد يقول "أنا شكلي كده محتاج دكتور نفسي" تلاقيه بيقولها كما لو إن الرد الطبيعي "ليه بس؟ ده إنت زي الفل".. الظريف إننا بنستغرب لما كتير من الناس اللي بالفعل محتاجة مساعدة نفسية متخصصة مش بتطلب المساعدة دي.. ببساطة لأننا فضلنا نغذي فكرنا وفكر اللي حوالينا إن الاحتياج لمساعدة نفسية هو "للمجانين".. والدليل إننا عمرنا ما بنقول ده على أمراض تانية.. عمرنا ما بنسمع حد بيهزأ واحد صاحبه ويقول له "يابني أنت محتاج تتعالج.. لازم تروح لدكتور أنف وأذن"..

ومننا كتير يا إما قالوا أو سمعوا جملة "بعد السنتين اللي فاتوا دول الدكاترة النفسيين هايشتغلوا هايل".. وعلى الرغم إن الجملة المفروض تكون صح وحقيقية لكن وضعها في إطار سخرية بيخلّي حتى الشخص اللي حاسس إنه محتاج دعم طبيب نفسي متخصص عشان يساعده في فترة إحباط أو فشل أو إحساس عام بالضعف بيخليه "يضحك" و"يتريق" مع اللي بيتريقوا و"يحط مشكلته على رف النكت" على الرغم إن مشكلته لسّة موجودة..

وقتها مش هنكون بنفرق كتير سنة 2013 عن اللي كانوا بيعملوه في إنجلترا مع نهايات القرن السبعتاشر لما كان الناس ممكن يقطعوا تذاكر (تمنها قرش) ويروحوا يتفرجوا على المرضى العقليين في مصحة بِدلام كنوع من الترفيه!..

إذا كنا لسّة في المرحلة اللي فيها النسيان والتقدم في العمر والاحتياج لمساعدة نفسية متخصصة هي حاجات "عيب" و"مثار سخرية وتريقة" يبقى ما ينفعش نستغرب لما أمراض وتحديات ومشاكل تزيد في مجتمعنا مش بس لأننا مش معترفين بوجودها (يا ريت).. لأ.. ده إحنا بنربط وجودها "بالاستغراب" و"النكت" و"استبعاد إنها تحصل" للناس "المظبوطة"..

"رايحة لدكتور السنان" و"راجع من الدكتور النفسي" و"بأحجز لوالدي في عيادة لألزايمر" المفروض تكون جمل متساوية في القيمة ورد الفعل ونسبة التعاطف.. مع اختلاف نسبة التحدي في كل جملة..

4 comments:

  1. " وقتها مش هنكون بنفرق كتير سنة 2013 عن اللي كانوا بيعملوه في إنجلترا مع نهايات القرن السبعتاشر لما كان الناس ممكن يقطعوا تذاكر (تمنها قرش) ويروحوا يتفرجوا على المرضى العقليين في مصحة بِدلام كنوع من الترفيه!.."
    انت بتقول فيها ... بحكم شغلي و انا في مستشفى بشوف نظرات الناس للمرضى اللي داخلين او خارجين من عيادة الامراض النفسية ، و بيبقوا مستغربين جدا لو المرضى دول اتعاملوا طبيعي او كانوا حتى ودودين معاهم ، و لجملة اللي كتير بسمعها " يااااه ، ما هو كويس اهو "
    و مهما كان المستوى المستشفى دي او مستوى و ثقافة المرضى نفسهم .

    زي ما في ناس بتبقى في عربيتها او راكبة مواصلة و يمروا جنب منطقة من اللي بتتسمى عشوائية و يبداوا يتفرجوا ، مش عشان يفهموا او يفهموا الناس دي عايشة ازاي ، لا ، دي ناس بتتفرج على كائنات حاسين انهم جايين من كوكب تاني و بيسخروا من اي تصرف او سلوك او اسلوب حياتهم في اي حاجة ، مع ان الناس دي اقويا جدا و فيهم صلابة و جلد من جواهم مخلياهم يعدوا بكل اللي هم عايشينه بصورة خلوها طبيعية ، و باقل الامكانيات عارفين يتبسطوا و يعيشوا و يبقى لهم مكان في مجتمع متاكدين من انتماؤهم ليه

    المشكلة ان كل حاجة بقت مثار سخرية
    النظرة الدينية بقت مثار تريقة ، سوا موافق على النظرة دي
    و دايما بنسخر من بعض بالتشبيه بالطوائف المختلفة او المعتقدات في كل الاديان.

    المستوى الاجتماعي او المادي كمان

    ساعات بحس اننا بنتريق على نفسنا من خوفنا من الحاجات دي
    احنا خايفين يجي لنا الزهايمر
    و خايفين نروح لدكتور نفسي و نكتشف حاجات في نفسنا بنخبيها على نفسنا طول الوقت

    زي ما الناس كلها دلوقتي بتسخر من كل حاجة مهما كانت صعبة و في الاخر تلاقي بيتقال علينا ، هو المصري كده بيسخر من نفسه عشان يعدي الازمة

    ReplyDelete
  2. ماشى.. أهم حاجة ان حسن النية متوفر

    ReplyDelete
  3. شكرا على الموضوع اخ ماجد
    myphone6

    ReplyDelete
  4. Great article. It touches on an attitude of ignorance. Thanks Maged

    ReplyDelete