Monday, August 13, 2012

حلم بسيط

أحلامي بسيطة.. أنا بس نفسي ابني يلاقي شغل..

أنا مش طمّاع.. كل اللي بحلم بيه إني ألاقي شقة أسكن فيها أنا ومراتي..

نفسي الميّة ماتقطعش بكرة عشان أعرف أروح الإنترفيو وأنا حالق دقني ومستحمي..

يا رب الكهربا ماتقطعش دلوقت لغاية ماأوصل البيت عشان ماحدش يعاكسني في الشارع..

على الله الموظفة بتاعة شئون الطلبة يكون مزاجها رايق النهاردة عشان أعرف أخلص ورقي..

نفسي المخبز مايبقاش زحمة..

يا رب عربية الإسعاف تيجي ونلحقه..

يا رب القطر مايتأخرش كتير عشان ألحق الفرح..


أحلام بسيطة.. أحلام أقرب للكوابيس منها للأحلام.. أحلام كان ممكن تتكتب في تدوينة سنة 50 مش السنادي.. أحلام على الرغم من بساطتها غالبا مش بتتحقق.. وغالبا بنحاول بعدها نحلم أحلام أبسط و"أكتر واقعية" وأقل إحباطا..



ممكن ييجي اليوم ونحلم أحلام بجد؟

ممكن ييجي وقت ونبقى "طماعين" ونحلم نبقى أحسن بلد في زراعة القطن أو لعب الكورة أو استخدام الطاقة الشمسية؟

يا ترى ممكن ابني يتمنى إنه يبتكر حاجة تساعد الإنسانية بدل مانكون بنحفّظ كل العيال إنهم يطلعوا يا إما دكتور أو مهندس أو ظابط أو مدرسة؟

مش كل حلم بسيط ممكن يتسمى حلم.. أحلامنا بقت أسوأ من كوابيس..

حلمي شكله بسيط.. بأحلم أرجع أعرف أحلم بجد..

9 comments:

  1. اه.....صحيح احنا أحلامنا بقت ملخص للاعلان بتاع صهيبة "انا نفسي أعيش"

    ReplyDelete
  2. مقال رائع و معبر عن الهم اللي بنعيشه كل يوم....!!!!!

    ReplyDelete
  3. Painful! ده علي كده اما ترجعلنا بالسلامة يا ماجد انت ممكن تكتب ملحمة زي الألياذة كده من البؤس :D

    ReplyDelete
  4. حين تصبح أبسط الحقوق الحتمية ... أحلام الغلابة :((

    ReplyDelete
  5. ربنا يحقق احلامنا جميعا يارب , كلامك يصيب عين الصواب كالعادة

    عزه عارف

    ReplyDelete
  6. Very deep.7elm baseet le waaqe3 mo2lem.
    N

    ReplyDelete
  7. a7lamak law mabt-5wfaksh kfaya l2enaha kbera , matb2ash a7lam !
    just DREAM BIG!

    ReplyDelete
  8. هو فعلا حلم اقرب منه للكابوس... يارب نفوق من الكابوس اللي احنا فيه ده ونشيل التراب من علي احلامنا المدفونة جوانا.

    ReplyDelete