Friday, April 27, 2012

أوّل طلعة

لأننا كائنات أقرب للتعقيد مننا للبساطة غالبا الحاجات البسيطة بنحس إنها يا إما مش مهمة أو فيها نوع من السذاجة أو الطفولة أو السطحية.. وعشان كده التفاصيل و"الحيثيات" و"النقط الفرعية" بتلفت انتباه كتير مننا.. في حين إن بعض الأساسيات ممكن تفوت علينا..

بقالي كذا يوم في ذهني فكرة البدايات.. بدايات أي حاجة.. بداية الشغل.. بداية الجواز.. أول طفل.. أول يوم مذاكرة.. أول حصة تعليم سواقة.. واكتشفت إننا للأسف "خسرانين" كتير بسبب نظرتنا للبدايات..

حاجات كتير سلبية بنربطها بالبدايات.. زي مثلا التوقيت.. بننتقد اللي يبتدي حاجة جديدة في وقت متأخر نسبيا.. ونلاقي ناس تقول: معقول بعد ما شاب ودّوه الكتّاب؟ على الرغم إن مافيش مسابقة لأصغر واحد يروح الكتّاب ولا فيه أي حاجة تمنع إني أبتدي وأنا شعري شايب..

نظرتنا للبدايات هى نظرتنا لأول يومين تلاتة من لبس الجزمة.. أو أول خمس ست شهور جواز لحد ماتتعلم الطبيخ.. أو أول كام يوم يروح المدرسة.. أو أول كام ساعة في الجيم!

إحساسنا هو "يا مسهّل".. وعلى رأي عم أيوب : "هي بس أول طلحة وبعد كده بافتح ع الرابح!"

هو أنا لما بيبقى عندي التوجه ده ممكن أخسر؟ متهيألي آه.. كتير..


زي ما الله سبحانه خلق كل حاجة من البداية الله كمان "خلق البداية".. خلق فكرة "أول كام يوم".. خلق المراحل اللي فيها بنبتدي.. كان ممكن سبحانه يخللي الشمس تطلع مرة واحدة والكون يمشي على الأساس ده.. والناس كلها تتولد كبار وعارفة تمشي.. والورد كله بحجمه الطبيعي.. لكن واضح إن فيه جمال وسحر خاص لفكرة إن الله سبحانه يشوف خليقته الرائعة في كل ثانية "بتبتدي" حاجة..

أتخيل سعادة وفخر الله سبحانه بكل برعم صغير لسّة بيفتّح.. كل طفل بيمشي لأول مرة.. كل اتنين مخطوبين بيتجوزوا ويبدأوا حياتهم.. كل حيوان بيتولد ويحاول يتعلم يقلد الأصوات وياكل ويمشي.. كل فراشة بتخرج لأول مرة من الشرنقة..

المراحل دي مش مجرد مراحل "لا بدّ" منها عشان الوصول للمرحلة "المظبوطة" بتاعة الوردة المفتّحة والشاب الناضج والزوج والزوجة اللي بقالهم 10 سنين متجوزين.. البدايات دي مش مجرد "تدريبات" أو "مراحل فيها معاناة" أو "تعب ضروري" للوصول للوضع النهائي المرغوب.. البدايات دي مقصودة.. ومقصودة جدا..


يا خسارة.. أنا النهاردة ماقدرش أستمتع بأولى محاولات ركوب العجلة.. ماقدرش أفتكر السعادة والشعور بالإنجاز لما مشيت أولى خطواتي.. لما بدأت أعزف على البيانو بصعوبة.. لما طلعت على المسرح أول مرة.. أول يوم شغل.. أول سفر..
لكن نفس المتعة موجودة في كل حاجة هبدأها.. عندي فرصة إني أختبر التحدي واللخبطة ومحاولة الإنجاز في كل حاجة جديدة هبتديها..

سعادة الجد والجدة بتكون غالبا بسبب إنهم بيشوفوا البدايات من أول وجديد.. بيشوفوا الخطوات الأولى.. بيسمعوا أول كلمة "ماما".. بيشوفوا أول ابتسامة..

المساحة في حياتي وحياتك إننا نختبر البدايات مساحة كبيرة.. وعلينا إننا ندوّر على تحديات وبدايات تديّنا المتعة والإثارة والتحدّي اللي موجود في كل "أول طلعة".. أول طلعة ممكن تكون لغة جديدة هبتدي أتعلمها..ممكن تكون مكان هروحه لأول مرة.. علاقة صداقة جديدة.. شغل لسّة ببدأ فيه..

أول طلعة ممكن تكون أبسط حاجة جديدة بأعملها لأول مرة.. وماعنديش مشكلة إطلاقا إن أول طلعة ماتكونش فخمة ولا فظيعة.. أصلها مش أول طلعة جوية!

12 comments:

  1. Very encouraging.Brilliant as usual.
    N

    ReplyDelete
  2. RAW3A !

    mazal al wa7ed momken 55aly mot3a gedida l 7aiato b 2eno kol yom ygarab 7aga gededa ..

    ReplyDelete
  3. حلوة أوى يا ماجد.... لازم يكون فيه بدايات لكن مش شرط يكون له نهاية!!!

    ReplyDelete
    Replies
    1. حلوة أوى يا ماجد..... كل شيئ لازم يكون له بداية لكن مش شرط يكون له نهاية... حقيقة

      Delete
  4. بداية انى اتعرف على البلوج بتاعك واقرأ افكارك المبدعه اللى فيه كان فيها متعه واثاره أرجو ان لا يكون لها نهايه.اشكرك على كل بلوج كتبته .
    هاله حلمى

    ReplyDelete
  5. gamda
    الميزه عندك هنا انك بتتكلم فى حاجات تتحس بسيطه جدا لكن معانيها بتكون جميله اوى
    الى الامام :)

    ReplyDelete
  6. اول مرة آخد بالي.
    صح فعلا دي مقصودة و نص كمان
    بدزن البدايات و عثراتها مش هانحس بحلاوة إنجازاتنا.
    شكرا يا ماجد

    ReplyDelete
  7. حلوة أول طلعة... دوس بنزين :)

    ReplyDelete
  8. ماشاء الله عليك و على افكارك , يارب بالتوفيق دايما

    عزه عارف

    ReplyDelete
  9. I just love new beginnings and always wish them for friends on their birthdays. Brilliant ya Maged and very well written-as always

    ReplyDelete
  10. موافقاك جدا ، ساعات متعة البداية بتبقى اكبر بكتر من متعة الاستمرار .
    اول نقطة مية بتنزل عليك و الدنيا بتمطر بتبقى احلى بكتر من المطر و هو نازل على دماغك لغاية ما يصدعك .
    اول محادثة بينك و بين حد كنت هتموت و تتكلم معاه احلى بكتير من المحادثة التانية و التالتة ، حتى لو الاولى دي عبارة عن تعارف عادي عامل زي برامج القناة الاولى .
    اول تجربة للخطية بتبقى اصعب و بتوجع اكتر بكتيييير من انغماسك في الخطية .
    المشاعر الاولى احساسنا بيها هو احساس الطفل
    اما بقى التفاصيل بقى و الحيثيات و كل الدهاليز دي هو احساس الكبير اللي فينا :)

    مدونتك اكتر من رائعة

    ReplyDelete
  11. Fantastic article. I missed it earlier. Pioneer to say the least.

    ReplyDelete