Thursday, April 5, 2012

تنتخبوا مين؟

من أكتر الحاجات المؤرقة لناس كتير وجود اختيارات.. وبغض النظر عن إيه المجال اللي محتاج إني أختار فيه إلا إن معظمنا بطريقة تلقائية بيبدأ يدور على "مين" الأحسن.. مين أحسن واحدة أتجوزها.. مين أحسن مدير أشتغل معاه.. مين أحسن واحد ينفع رئيس جمهورية..

مافيش حاجة في الموضوع ده غلط في حد ذاتها لكن المشكلة بتكون لما بأشوف في "الشخص الصح" ضمان لكل حاجة بعد كده.. هتجوز فتاة أحلامي وأكيد كل حاجة هتبقى زي الفل.. هشتغل مع مدير أحلامي هتبقى متعة مستمرة.. هنتخب رئيس الأحلام هنبقى أحسن دولة.. 

اللي بننساه هو إن على الرغم إن فيه اختيارات غلط لكن مافيش "اختيار وحيد" هو اللي صح.. مافيش match made in heaven ترتيب للراجل الوحيد اللي ممكن ترتبطي بيه.. الرئيس الوحيد اللي هينتشل البلد من المشاكل..

أمّال إيه؟ الفكرة إن مع الاختيار بتيجي "إدارة العلاقة".. وأنا باختار أنا مش باحط في بطني بطيخة صيفي إن ما دام الاختيار "صح" يبقى عمرنا ما هنتخانق.. أنا محتاج أرتب وأدير العلاقة صح..

عشان كده بعض مرشحين الرئاسة سواء اختلف الناس أو اتفقوا على "هم صح ولّا لأ" قرروا ينسحبوا لأن الموضوع معتمد على أشخاص مش منظومة.. في المنظومة أي حد كويس ينفع.. أي حد فيه الحد الأدنى من الشروط ينفع.. في الدول الأكثر تقدما بيبقى التنافس بين المرشحين على حاجات ممكن تبدو لينا فرعية.. وبتيجي وقتها فكرة "لابس شيك ولّا لأ".. "متحدث لبق ولّا لأ"..

وأنا باختار رئيس أنا محتاج أختار حد عنده فكر بخصوص المنظومة.. يقدر يقود البلد في تكوين نظام مظبوط بحيث إن أي حد سواء هو أو غيره ينفع يبقى رئيس.. المرشح اللي مانقدرش نعيش من غيره هو مرشح غير ناجح في إنه يكون منظومة تقدر تشتغل لوحدها حتى لو هو مش موجود..

وأنا باختار شريكة حياتي.. وإنت بتختار مكان شغلك.. هل بافضل أدور على "مين" مناسب؟ المناسبين كتير لكن المجهود الحقيقي اللي أنا محتاج أبذله هو إني أخلق المنظومة اللي تشتغل تلقائي..

عشان كده إذا كان الجواز بنسبة مهمة بيعتمد على اختيار صحيح إلا إن النسبة الأكبر هي "إدارة العلاقة".. عشان كده فترة الخطوبة هي فترة للطرفين مش بس للتحضير للفرح.. لكن للتحضير للجواز كله.. هنتخانق إزاي؟ هنتصرف إزاي مع الفلوس؟ مع العيلة؟ إلي آخره من كل الجوانب اللي مش كفاية إني أشوف فيها "مين" مناسب..

لازلت باحلم بإسقاط النظام الفاسد..اللي كلنا شفنا قد إيه النظام متأصل وضارب بجدوره في كل نواحي حياتنا.. تشيل المسئول الأول؟ ولا حاجة تحصل.. النظام لسة مستمر.. وفيه جواة طاقة رهيبة تخلليه يفضل شغال حتى لو ملاك مسك البلد..

لازلت بأحلم بإسقاط النظام الفاسد.. وبإقامة منظومة مظبوطة فيها أي شخص بالحد الأدنى من المقومات يقدر يقود البلد.. منظومة لوحدها تكون تلقائيا بتقود لعدالة ومساواة وحرية.. مش اعتمادا على وعود شخصية من "رئيس الأحلام"

7 comments:

  1. good good good good :D و رتبتلى شوية افكار كدة كانوا متلغبطين فى دماغى

    ReplyDelete
  2. كئبتنى من حلاوتها وإحنا فى ليلة مليونية أبو سماعيل :S

    ReplyDelete
  3. Wonderful ya Maged!!! You hit home hard.

    ReplyDelete
  4. شكرا يا ماجد إنك نورتلنا حاجات كانت في الضلمة ..محتاجين نتعلم ده كويس ..بوست عميق و أكتر من رائع
    N

    ReplyDelete
  5. gamelaaaaaaaaaaaaaaaaa awiiiiiiiiiiiiii

    ReplyDelete
  6. Fantastic article.
    We need to measure the change, the good and the not so good. This may support the hopes and inspiration for millions.
    Thanks Maged

    ReplyDelete