Saturday, October 22, 2011

ماما زمانها جايّة

كل فترة كده بييجي عليّ أنا وأصحابي هاتف (!) يخلينا كده نفتكر أغاني الطفولة القديمة..طبعا حاجة جميلة وكل حاجة لكن ساعات المكان بيبقى مش مناسب قوي..يعني لو إنت وأصحابك قاعدين على قهوة مثلا والدنيا زحمة وافتكرتوا أغنية "أنا أنا أنا أبريق الشاي" وبدأتوا تغنوا بصوت عالي ممكن تلاحظ نظرات جديدة من الناس..مش بيبقى استغراب..ولا متضايقين..بيبقوا "متغاظين" عشان مش فاكرين كلمات الأغنية..وانت طبعا وأصحابك عمالين بتتحدوا بعض مين يفتكرها كلها..

الأغاني دي كانت جميلة وللا لأ؟ مش عارف..بجد مش عارف..مع الموجة العامة اللي بتقدّس كل حاجة قديمة لمجرد إنها قديمة بقيت أحاول أفكر كذا مرة قبل ما أقول "آة طبعا جميلة" (مش متهيألي إن كل حاجة قديمة حلوة..اللوحة القديمة والجبنة القديمة غير الجزمة القديمة تماما!)

المهم ..الأغنية اللي لازقة في دماغي بقالها شوية هي "ماما زمانها جايّة".. غناها محمد فوزي بطريقة جميلة وشقية.. لكن الكلام بيقول إيه؟..

عارف الواد اللي اسمه عادل جه الدكتور وعمله إيه؟ لقى رجليه كانوا زي الفتلة بص شوية جوة عنيه..راح مديله حقنة كبيرة..عارف إدّاله الحقنة ليه؟ (ليه يا ترى؟) مابيشربش اللبن الصبح وكل أصحابه ضحكوا عليه..وأهو من يومها شرب وبيكبر وإتربّاله عضل في إيديه!
طبعا هو بيقول الكلام ده لولد صغير يا حرام مستني مامته..فبيحاول يطمنه! بس بدل ما يطمنه قرر "يرعبه" عشان يسكت خالص لحد ما "ماما" تيجي! وأتوقع إن الكام جملة دول من الأغنية كفيلين بإنهم يخللوا الولد: خايف من الدكتور..مرعوب من الحقن.. مش طايق "كل أصحابه اللي ضحكوا عليه"..طفشان من اللبن.. وبيكره كل العيال اللي اسمهم عادل!

لأ والظريف إن بعد كل الكلام ده يقول له: "ماما زمانها جاية".. وقتها طبعا الجملة بتفقد "الأمل والإشراقة" المقصودين وبتبقى  عاملة زي "ماما زمانها جاية وهتورّيك".. أو "لما ييجي أبوك هقول له!"

عادي..بيحصل إن فيه جزء من أغنية يُخفِق (!).. لكن لأ..إزاي؟ تخلص الغنوة على كده؟ لا لا لا..

وأحمد برضه إيده مربوطة (يا دي النيلة!) ومامته عارف ليه مخاصماه؟ (ليه؟ عمل إيه راخر؟) كان بيحب تمللي يلعب بالكبريت ويشيله معاه .. وفي يوم جاب كام عود ولّعهم ..وأخته بوسي كانت شايفاه (سوسة البت بوسي دي!) راحت النار ملهلبة إيده ولسّه إيديه الاتنين واجعاه.. وأهو من يومها لا بيتعفرت ولا بيشيل كبريت وياه!
لكن تيجي الجملة اللي مليانة أمان واطمئنان إن "ماما زمانها جاية!"

رعب..رعب..رعب..طول الوقت!

"لو ما ذاكرتش هتسقط وتبقى فاشل زي الأسطى سيد" (طبعا الأسطى سيد شخصية موجودة في نطاق كل أسرة لكن يحب الأب والأم ينسجوا –حلوة ينسجوا دي- القصص المبالغ فيها عن إن سبب فشله إنه ماكانش بيذاكر وهو في رابعة ابتدائي.. غني عن الذكر إن الأسطى سيد بيكسب فلوس أكتر من الأب والأم مع بعض.. وفي الغالب بيقول لعياله: لو ضيعتوا وقتكوا في المدارس والكلام الفاضي ده هتبقوا زي الأستاذ أشرف ومدام انتصار!)

"إذا ما عملتش كده ربنا هيزعل منك وهيوديك النار" .. "ماحدش هيرضى يتجوزك" .. "مش هتخلف!" ..

ولسّة مستغرب إننا لحد النهاردة واحنا كبار طول الوقت –طول الوقت- خايفين من حاجة؟

"لو السلفيين وصلوا للحكم هيقطعوا ودان ومناخير الناس".. "لو الليبراليين مسكوا الستات هتتمنع تلبس الحجاب" .. "لو الإخوان بقوا في السلطة مش هيبقى فيه سياحة" .. "لو المسيحيين وصلوا للرئاسة هيلغوا المادة 2"... خوف.. خوف..

مع كل جملة تخوّف أنا باقولها لابني أو صديقي أو مراتي..أنا باحتاج ل 9 أو 10 جمل تشجيع وكلام إيجابي عشان تمحي الأثر!

أنا عارف إنه سهل إني أشوف الحاجة الوحشة وأشاور عليها.. أفترض إن الحاجة الكويسة أمر مسلّم بيه.. بس بجد أنا وانت مش بنعرف إمتى الجملة الكويسة اللي باقولها ممكن ترفع واحد من ضيقة..وكلمة تانية تخليه يكرة المذاكرة ويتضايق من ربنا ويخاف من البلد..

أعرف بنوتة صغيرة مامتها قالتلها "العصفورة قالتلي" فراحت ردت "هي العصفورة دي ماتقولش على حاجة كويسة أبدا!"

كومبيوتراتنا مستفزة لأنها دايما بتنبهنا على الغلط.. error – wrong command – failed operation – download interrupted – bad sector – virus detected – file corrupted  طول الوقت مصايب..ليه مافيش كومبيوتر يقول: جدع – برافو عليك – الأمر ده سهل – هايل – من عينيا هجيبلك الفايل  ؟

تعالوا نبدا بحاجات بسيطة..

ربنا بيحبك قوي – شعرك حلو النهاردة – اتبسطت إنك اتصلت بيا – بافرح لما أشوفك – برافو إنك جبت 7 من 10.. أكيد المرة الجاية هتجيب أكتر – لبسك شيك - ماما زمانها جاية وهتلعب معاك وتبوسك وتعمللك أكل حلو..

ابذل مجهود واسعد بني آدم .. عشان ما تتحولش الحياة لـ "ماما مسافرة وهعمل حفلة" بدل "ماما زمانها جايّة" 



22 comments:

  1. يااااااااة يا ماجد علي جمال الفكرة . فعلا احنا محتاجين طاقة إيجابية تخلينا ننتظر اللي جاي ونستناة . محتاجين حد يخلينا نتفائل ونبص لبكرة نظرة أمل وحب . علي فكرة ات شوية عليك انك تكتب في مدونتك وبس . لو كتبت في جورنال يومي هيبقالك قراء كتيــــر جدا :)) دمت مبدعا

    ReplyDelete
  2. هههههههه....أنا بحب الأغنية دي جداً،بس عمري مافكرت فيها بالشكل كده!!!معاك حق..الرعب والخوف هوالعدوالحقيقي لتحقيق أي نجاح،و كلمة تشجيع بسيطة ممكن تعمل معجزات!!بضم صوتي بشدة لأحمد صبري،لازم ناس كتير جداً تقرالك أو توصلها أفكارك،أنا متأكدةإن حاجات كتير هتتغير وافكار أكتر هتنور في حياتهم

    ReplyDelete
    Replies
    1. وكمان مسلسل هووهي سعاد حسني واحمد زكي
      مأساوي في حلقات كتير منه

      Delete
  3. حرام عليك شوهت الاغنية خالص بس فعلا معاك حق دى اغنية مرعبة عمرى مافكرت فيها كده رغم انى كنت باغنيها لبناتى وهم ىصغيرين ....انا قعدت اضحك على رؤيتك لشخصيات الاغنية وخصوصا بوسى السوسة :):) ...ومعاك كل الحق فى كل الرسايل السلبية اللى بنبعتها لنفسنا والاخرين رغم وصية رسولنا عليه السلام تفاءلوا بالخير تجدوه ....جزاك الله خيرا وادخل السرور على قلبك كما اسعدتنا ........عبير هبة

    ReplyDelete
  4. good job ya sa7by ... very creative as usual.

    Yes, it's all about the strength of impact of the positive words.

    ReplyDelete
  5. I see everyone says as USUAL! so am not gonna add more you always like that buddy.

    ReplyDelete
  6. صباح الفل والأمل والتشجيع والحب عليكي يامصر وعليك ياماجد ...
    Thank u
    Joanna

    ReplyDelete
  7. Simply : "You make it harder on other bloggers." bs keda :)

    ReplyDelete
  8. فاكر ابريق الشاي عند اخر ساعه ؟
    :)

    ReplyDelete
  9. وحش اوي البوست ده يا ماجد ... اسلوب ركيك .. يفتقد المتعه .. يخلو من الدعابه والسخريه .. لا يحمل قيمة انسانيه علي الاطلاق .. ببساطه البلوج كله تضيع وقت
    .....................................
    امضاء،
    بني ادم رخم :D

    ReplyDelete
  10. It's An Amazing way to spread Positive Words :) Well Said :D

    ReplyDelete
  11. متفقة معاك تماما فى إن الكلمة الحلوة وكلمة التشجيع ليها تأثير قوى جدا فى نفوسنا خاصة لما تبقى من ناس بنعزها ونقدرها وإن كلمات التشجيع اللى كنا بنسمعها زمان من مدرسين ابتدائى لسه بترن فى ودانا – ودانى أنا على الاقل- لحد دلوقتى وفعلا ليها تأثيرها.
    بس إنت نسيت الجزء الاولانى من الاغنية
    "ماما زمانها جاية جاية بعد شوية جايبة علشانا حاجات
    جايبة معاها شنطة فيها وزة وبطة بيقولو واك واك واك"
    يعنى كان فيها أمل ودا بامارة إن الولد كان مبسوط و بيضحك
    فاكر تصوير الأغنية كان إزاى كان بيبى صغير لا يتعدى سنتين يعنى يدوب فرح بصوت واك واك وإن ماما جاية.
    ميرسى على كل كلمات التشجيع والأمل

    Waiting 4 more!

    Sahar El-Behairy

    ReplyDelete
  12. اسمحلى اهنيك على الفكره الجميله المتفائله اولا اسلوبك اكثر من رائع سلس و يدخل القلب بس انا بعتب عليك بس انك مجبتش سيره سعاد لما ابله زعلت منها خالص خالص من شهرين
    على العموم عندك حق المسامح كريم برضو
    على فكره انا كمان عندى blog و احب اعرف رايك فيها
    http://raghawisaboun.blogspot.com/

    ReplyDelete
  13. very niceeeeeeeeeeeeeeeeee topic...go on

    ReplyDelete