Friday, October 14, 2011

مستغني عن التطعيم؟


التفكير في استخدام "التطعيمات" بدأ من وقت طويل قوي.. وبدأ بشكل يشبه الصدفة..

كان فيه بنت رايحة للكشف عند دكتور وخلال وجودها في أوضة الانتظار جات سيرة مرض الجدري وده كان مشهور ومنتشر قوي وقتها..المهم إنها قالت للي حواليها إنها عمرها ما جالها الجدري لأنها جالها قبل كده مرض شبيه بيه اسمه جدري البقر وليه أعراض مشابهة..الكلام ده كان سنة 1768..

كان حاضر وسمع الكلام ده طالب بيدرس طب اسمه إدوارد جينر وفضلت الفكرة شاغلة تفكيره لوقت طويل..المهم إنه بعد ما خلص دراسة طب خصص جزء كبير من وقته للأبحاث..وعمره ما نسي كلام البنت دي..

وسنة 1798 عمل أول تجربة مصيرية فيها شاف النتيجة على 4 أطفال كان بالفعل عندهم جدري البقر..ولما اتعرضوا للجدري ما اتصابوش بالمرض..

غريبة جدا فكرة التطعيمات والأمصال واللقاحات دي! أحقن الفيروس أو "مسبب المرض" نفسه عشان مايجيليش المرض؟ نفس الحاجة اللي شكلها وحش ممكن تكون هي نفسها السبب في تفادي المرض؟

في حياتي وحياتك حاجات كنا نتمنى ماتبقاش موجودة..حاجات بنشعر قدامها قد إيه إحنا عاجزين أو وحشين..ويمكن لو جوايا نسبة معقولة من التصالح بيني وبين نفسي أحس إني عندي مشاكل وحاجات وحشة ومناطق عجز لكن أقرر أبص على الإيجابيات والحاجات الكويسة..أنا مش باتكلم في كده خالص..

أنا باقول هل جربنا نبص على أوحش حاجة عندنا على إنها ممكن تكون مصدر قوة؟

ممكن أكون عايش حياتي وباحاول مافكرش في الحاجات اللي "بتنغّص" عليّ عيشتي..على الرغم إن نفس الحاجة دي ممكن تكون مصدر تميّز وسعادة وقوة..

لو أنا عيان عيا مزمن..لو عندي إعاقة معينة..لو عندي ضعف أو إمكانية قليلة في جانب من جوانب حياتي..ممكن كل حاجة من الحاجات دي تكون "تطعيم" خاص..حاجة "شكلها وحش" لكن تأثيرها قوي وماينفعش أستغنى عنه..

لو فقير..لو ابنك عيان..لو بنتك مش أشطر واحدة في المدرسة..لو والدك عنده احتياج خاص..فكّر في أي حاجة "كنت تتمنى ماتبقاش عندك"...مش يمكن الحاجة دي هي أهم فرصة ليك؟
مش يمكن انت الوحيد اللي تقدر تحس بالناس اللي بتمر بنفس التحدي؟ مش جايز وجود المشكلة دي ساعدك في تجاوز مشاكل تانية وإدّاك مهارات ماكنتش ممكن تحصل عليها لو المشكلة مش موجودة؟

فيه فرق بين إني أقول: أنا فقير "لكن"..وإني أقول: أنا فقير "وعشان كده"...

ياترى ممكن أوحش حاجة عندي تكون مخبية أحلى فرصة؟

لو عايز كل حاجة في الحياة تبقى كاملة وحلوة..جايز تكون مستغني عن التطعيم!

8 comments:

  1. as always , creative , simple words , strong subject
    you've never let me down :)))
    Keep it going

    ReplyDelete
  2. Amazing ... can't find any other word :)

    ReplyDelete
  3. Best thing in your jewels ya Maged, that you make everyone feels as if you're writing this specific jewel specially for him/her and in the perfect timing. i recommend that you study NPL, and start changing more lives - to the better of course. ;)

    ReplyDelete
  4. جميلة جداً يا ماجد :)
    فعلاً دائما المبدعين و المخترعين بيخرجوا لينا الابداعات دى بسبب ظروفهم :)
    يعنى مثلاً الدكتور مصطفى السيد اللى خلاه يدور فى تكنولوجيا النانوتكنولوجى على علاج للسرطان هو إصابة زوجته بالمرض ده و رغم إنها ماتت إلا إنه كان دافع ليه انه يجد علاج ينقذ بيه ملايين البشر :)

    ReplyDelete
  5. دايماً رائع و ايجابي يا صديق, نفسي تعمل كتاب بالمدونة دي :)

    ReplyDelete
  6. I second Ms. Marian Magdi :)

    ReplyDelete