Tuesday, October 11, 2011

لسّة ما مُتِّش

حزن وألم .. غضب ولخبطة .. وجع فراق .. ندم ...
دموع وصراخ .. زغاريط .. هتافات ..
ناس لابسة إسود .. ناس لابسة أبيض .. ناس شايلة صور ..
تقارير مستشفى .. عربيات رايحة جاية .. ترتيبات واتصالات

مشاهد شفناها وبنشوفها لما "الموت" بيزور عيلة أو شارع أو قرية أو بلد بحالها..
لكن خلاص كده؟
مُوتة زي ما أي حد بيموت؟
فترة وننسى؟

عمر ما كان الموت هو النهاية..عمر ما كان الموت أبشع حاجة تحصل لبني آدم..

الحبّة اللي بتترمي في الأرض بيبان إنها ماتت..لكن نفس الحبّة دي هي اللي بتخرّج حياة..

خَضار وجمال وأمل ممكن يخرج من قلب الموت..
عزيمة ورجاء وشدة ممكن تطلع من وسط الموت..
قوة واتحاد ونظرة أشمل ينفع تخرج من وسط البكا والحزن..

الحبّة اللي مش عايزة تموت جوة الأرض هي الحبّة اللي بتفضل ميّتة..

الفراق مؤلم..إني ماقدرش أشوف اللي باحبهم تاني شيء صعب..لكن..
لكن..
الموت مليان حياة..الأرض الناشفة المشققة هي أكتر أرض مستعدة للمية وعارفة قيمتها..
حياتك لو غرقانة موت..أكيد عطشانة لنور وخَضار وفرح وشِبع وارتوا...
بلدك اللي داقت موت ولادها مستنية "حياة"..مستنية "بداية جديدة"..

يمكن موتُه مش نهاية..غالبا موتُه بداية!
جايز موتها مش معناه إنه "خلاص بقى!"..يمكن موتها هو إعلان صفحة جديدة..حاجة مختلفة..إمكانية رائعة؟

أنا هختار إن الموت اللي حواليا يبقى:
بداية..أمل..حاجة جديدة..رجاء في بكرة..إصرار إني أكمّل..اشتياق لوضع أحلى..

أنا باختار إن الموت اللي حواليا يبقى:
وحدة مع أصحابي..عزيمة وحماس..إحساس بمشاعر غيري..

مش كل موت وحش...أوحش موت هو الموت اللي بيموّت كل أمل!

لو متّ والأمل عاش..أبقى مامتّش..
وعشان كده أنا لو عايش على الأرض النهاردة وهموت بكرة..هبقى برضه لسّة ما مُتّش!

11 comments:

  1. لم لزل منصور و لم اهزم
    انا لسه فاكر جملة من بوست "هنا يرقد"
    إيه ال5 أو 6 كلمات اللي هيلخصوا كل الحياة اللي أنا عايشها دلوقت؟
    من الاخر الحق عيش حياتك قبل
    it's too late
    وديما خليك فاكر ان نهاية حياتك ممكن تبقي بداية حياة حد تاني

    ReplyDelete
  2. لو كل انسان وقف حياتة بعد موت أحد المقربين لية يبقي مش هيعيش . لكن بيفضل رحيلة معلّم جوا القلب .... عن تجربة شخصية . انا والدي متوفي من 8 سنين . عايش حياتي عادي جدا .. لكن دايما حاسس ان حاجة نقصاني واني عايش بنص قلب ونص عقل !!!

    ReplyDelete
  3. الموت هو نهاية سيرة إنسان بالخير.. يمكن مش لازم يكون الكلام مدح سواء في حياته أو مماته! بس أكيد طول ما ذكراه طيبه وسطينا عمره ما هيموت.

    ReplyDelete
  4. It is never the end, no matter how painful it is. May we live and die knowing that we are loved. Wonderful as always.

    ReplyDelete
  5. love never dies.Plant love and u will not die

    ReplyDelete
  6. This's the spirit we need!
    Hope to prevail.

    Sahar El-Behairy

    ReplyDelete
  7. إن لم تقع حبة الحنطة في الأرض وتمت فهي تبقي وحدها ولكن إن ماتت تأتي بثمر كثير...حقيقة طبيعية علمية كتابية مؤكده

    ReplyDelete
  8. Yes!Maged,that's the spirit we all should host!!
    thank you!

    ReplyDelete
  9. شكرا يا ماجد كتاباتك مشجعه ولذيذه ربنا يستخدمك اكتر واكتر
    وفي ميزرباك ترجمتك كانت جميله جدا

    ReplyDelete
  10. الموت ما طلعش وحش و لا بيخوف
    حاجات كتير باقية و ابقي
    =)

    ReplyDelete