Saturday, October 8, 2011

هنا يرقُد

من كام يوم جه خبر وفاة ستيف جوبز الرئيس التنفيذي لشركة Apple ولاحظنا اهتمام ناس كتير بالخبر..ناس غيرت صور ال profile  على Facebook  و Twitter لصورته أو صورة حاجة من منتجات Apple! وأخبار كتير ومعلومات بقى عنه زي إنه كان مُتَبَنّى وإن أبوه الأصلي من أصل سوري وأخته كاتبة روايات مشهورة وكتير من معلومات تانية عن أكله المفضل وهكذا..

iPod, iPad, iPhone, iTunes كلها حاجات أثرت وغيرت في حياة ناس كتير وشكلت هوايات وأنشطة وأسلوب حياة لملايين من الناس على مستوى العالم

وعلى الرغم من إن عظماء ومشاهير وفنانين وناس مهمين كتير بيقدروا يتحكموا ويأثروا في العالم بأشكال مختلفة ..ويقدروا يقرروا إيه اللي يقولوه وإيه اللي يخبّوه..دول كمان يقدروا ساعات يتحكموا في إيه اللي يتقال عنهم في الجرايد والبرامج..إلا إن الحاجة اللي يمكن تكون صعبة.. إنهم يختاروا إيه اللي يتكتب على قبرهم!
"هنا يرقد..."
جملة مشتركة...تكملتها هي اللي بتختلف من شاهد قبر للتاني..
"هنا يرقد...أعظم ممثل"؟ "هنا يرقد أفضل مخترع"؟ "أكثر من أثر في البشرية في العصر الحديث"؟
هنا يرقد صاحب أجمل ابتسامة؟

يا ترى ممكن أكون عايش طول حياتي وبعد كل ده يتكتب حاجة مش في بالي خالص؟ حاجة ولا كانت تفرق معايا وأنا عايش؟ حاجة ماكانتش مستاهلة تعبي واجتهادي؟

في Wall Street Journal في مايو 1993 ستيف جوبز قال الكلمات دي:
"إني أكون أغنى واحد في القبر مايفرقش معايا..اللي يفرق معايا إني أنام بالليل وأقول إحنا عملنا حاجة رائعة!"

يمكن وقت كتابة جملة "هنا يرقد.." ماأكونش موجود..لكن عندي فرصة السنين اللي عايشها إني أسيب أثر في اللي حواليا!

هنا يرقد اللي عاش ببساطة وكان مصدر سعادة اللي حواليه..
هنا يرقد اللي شجع وشدد وفرّح ناس..اللي ساعد وحفّز ناس..
هنا يرقد اللي كان صورة حية وشهادة حقيقية عن ربنا سبحانه..
هنا يرقد المجتهد الملتزم الحماسي..
هنا يرقد السياسي المحنّك..
هنا يرقد النصّاب الحرامي..
هنا يرقد الموسيقي الحالم..

يا ترى الناس هتختار تكتب إيه عني؟ في الوقت اللي مش هكون فيه موجود عشان أوضّح أو أشرح أو أعتذر..هيقولوا إيه؟

إيه ال5 أو 6 كلمات اللي هيلخصوا كل الحياة اللي أنا عايشها دلوقت؟

أتمنى مايضطروش يكتبوا "هنا يرقد..واحد كان فاكر إنه عمره ما هيرقد! فضل عايش من غير هدف..زيه زي غيره.."

7 comments:

  1. انا نفسي تتكتب علي قبري كلمة حلوة تخليك تبتسم لما تزروني ... بتخيل مثلا
    هنا يرقد اللي مرقدش بقاله 70 سنه (لو انا مت عن 70 سنه مثلا)ـ
    او
    هنا يرقد شر... ايه يرقد دي هو انا فرخه؟
    او
    هنا يرقد شريف سليمان .. ومسيرك ترقد الرقده دي يا خفيف

    ReplyDelete
  2. انا اتمنى ان ارى ع قبرهم جميعا هنا يرقد من زيف تاريخ الشعب المصرى ..زز فليذهبوا الى الجحيم



    مش عقول كلام مستهلك كتير زى اللى كومنتات اللى قبلى .. بس بفرح لما بشوف البوست الجديد :D:D:D

    ReplyDelete
  3. I second those thoughts and would like to add that people's hearts are great tombstones; what's etched on them is sincerer and more eloquent than what's engraved on stones. It resound in Heaven and outlasts earth's time.

    ReplyDelete