Thursday, September 29, 2011

أنا مبسوط

من ضمن الحاجات الطريفة إنه كان فيه كده زي اعتقاد علمي إن ماينفعش حد يحلم إنه بيقع من مكان عالي قوي وفعلا يوصل للأرض في الحلم ويفضل عايش..يعني لو حصل كده في الحلم العقل بيدّي إشارة للقلب إنه يتوقف..لأن العقل مش بيقدر يستوعب يعني إيه حد يقع من ارتفاع عالي قوي كده –حتى لو في حلم – ويفضل عايش!

طبعا الحكاية دي بتحسسني إنه: إيه ده؟ إيه العقل العبيط ده؟ إيه العقل اللي ماعندوش مخ ده! باقوللك باحلم!
وعشان كده كان الاعتقاد ده بيقول إنه على الرغم من إن معظمنا عدّى عليه الحلم ده كذا مرة..إلا أننا دايما بنصحى على آخر لحظة قبل الارتطام بالأرض (حاولت أفكر في كلمة غير "ارتطام" بس مالاقيتش..وبصراحة استسهلت)  :)

وعلى الرغم إن الفكرة دي فكرة مش حقيقية دلوقتي (على ضمانة موقع بيتناول حاجات كتير عن الأحلام) إلا إن فعلا عقلنا مش طول الوقت "عقلاني"..عقلنا مش دايما بيفكر "بالعقل"..وعدم المنطقية دي بتدي مساحة كبيرة من احتمالية وجود انطباعات مختلفة حتى لو الموقف أو المعطيات واحدة..

ومن ضمن الحاجات اللي فيها مناقشات كتير وتعاريف وأخد وعطا الفكرة الأزلية القديمة بتاعة "السعادة" وإيه هي..

وأنا هنا مش هتكلم عن الأفكار بتاعة هل السعادة في الفلوس وللا الصحة وللا العلاقات الناجحة وللا الارتباط الوثيق بربنا وللا النجاح في الشغل...لأن المواضيع دي متهيّالي الناس ناقشتها أكتر يمكن من سعيهم للحصول على السعادة بأي طريقة!

لكن لما فكرت في الرسايل اللي المجتمع بيوصلهالنا عن "النموذج المثالي للسعادة" لقيت الموضوع ممتع..

لما تيجي تسأل المجتمع عن السعادة..الإجابة مش بتيجي على طول..(أقصد بالمجتمع العقل الجمعي اللي ناس كتير بتتفق إنه توّجه عام أو معتقد يغلب عليه إنه صحيح..)
 
لو سألت المجتمع عن نموذج السعادة..هتلاقي المجتمع بيرد بسؤال ويقوللك:< قبل ما أجاوبك..قُللي عنك..>

فلو انت مثلا متخرج وأعزب...<إيه ده؟ إحنا امتى هنفرح بيك؟>  ..وطبعا مهما تحاول تستفهم منهم هُمه ليه مش فرحانين بيك..برضه هيعرفوا إنك فاهم وبتستهبل..

لو متجوز...<مش هتجيبلنا بقى حتة عيّل يملا علينا البيت؟> ..والغريبة فعلا هي حكاية "تجيبلنا"..ويبقى نفسك تقولهم..ماتتفضلوا معانا!..لأ وإيه "يملا علينا البيت"..ليه هتخلف فيل؟..ده غير جمل: <نفرح بيهم قبل مانموت>...
وعلى طول ييجي في بالنا صورة أب وأم وطفل صغير جميل ونحِسّ قد إيه إن أكيد الوضع ده هو صورة نموذجية للسعادة..

<مش هتخاويه؟ وللا عايزه يطلع وحيد؟>

<مش هتجيب الواد؟> أو <مش هتجيب البنت؟>..

<إيه ده؟ معقولة هتدخلهم المدرسة دي؟>..

واختصارا..لو سألت المجتمع.."من فضلك في جملة واحدة..قوللي إيه النموذج المثالي للسعادة"
<أي حاجة مش عندك دلوقت> <أي وضع انت مش فيه النهاردة>

أشطر واحد في الفصل عايز يبقى الأول على الجمهورية..والأول على الجمهورية عايز يبقى أشطر وأقوى واحد..وأقوي واحد عايز يبقى كمان أذكى..وهكذا..

ناس كتير بتبص على رئيس الجمهورية لأي بلد وتقول: ياااه..عنده كل اللي يتمناه..أحسن رعاية صحية..كل أوامره مجابة..بيسافر ببلاش..مابيصرفش وللا مليم على لبس ولا أكل..

ورئيس الجمهورية بيبص عليّ ويقول: يااه..عنده كل اللي يتمناه..بيسهر مع أصحابه على القهوة زي ماهو عايز..بينزل يتفسّح في أي وقت من غير حراسة تقرفه..بياكل اللي هو عايزه..

الظاهر كده إن المجتمع بيضحك علينا :)..عشان كده مش عايز ينزّل نموذج واضح..

فقررت إني أفهّم عقلي..وأقول له بصوت واضح إني ينفع أكون مبسوط..

أنا مبسوط..مش لأن عندي كتير..ولا لأن عندي حاجات تعتبر أحلام لناس كتير..
أنا مبسوط لأني مش محتاج أبقى زي أي حد..مش محتاج يبقى عندي حاجة مش عندي..

لو عازب ينفع أبقى مبسوط و"يفرحوا بيّ" برضه.. ولو متجوز هبقى مبسوط..ولو عندي عيال هبقى مبسوط..ولو بقيت رئيس جمهورية هبقى مبسوط (هاضغط على نفسي وخلاص!)  :)

باحتاج أفكر نفسي إني "مبسوط"..باقولها لنفسي كتير..
أنا النهارده مبسوط لأن الشغل مشي كويس..وقابلت أصحاب زي الفل..وشربت شاي بالنعناع (اسمه الكودي: شاي مخاصم بعضه)..مبسوط لأني مش محتاج أبقى زي أي حد..

عقلك ممكن مايكونش "عارف" إنك ينفع تكون مبسوط..فكّره

جرّب تقولها..قول "أنا مبسوط" بصوت مسموع..وأتحداك لو ماابتسمتش! :)

10 comments:

  1. beautifully put together ;) and yeah, you are what you say to yourself so tell it good .. ALWAYS.
    Positiveness, and happiness are contagious, you may infect your own -very- self.
    As for happiness, as i once put it : "I may not have everything, but am blessed with what i DO have." And for that i must be forever grateful and happy.
    Live happily of your 'present', while thinking of the 'future' .. not to lose them both. ;)

    ReplyDelete
  2. ماجد انا يومى من الصبح كانرخم و متلخبط و لما قريت البلوج بقيت مبسوط

    ReplyDelete
  3. وانا مبسوطة انى قريت البوست ده :)))

    ReplyDelete
  4. تحفة تحفة ......بتعجبنى فى طريقة رؤيتك للمواقف وللظروف
    الكلام حقيقى جدا
    بس بصراحة لسة عايزة اعيشه باختبار
    واقول لنفسى انا مبسووووط

    ReplyDelete
  5. simple & realistic :)

    ReplyDelete
  6. انا مبسوط اني اعرفك

    ReplyDelete
  7. مبسوطة انك ماجد و أني قريت
    ال Post
    =)

    ReplyDelete
  8. amazing ... well done Maged ...
    I really enjoy reading ur psots ...
    u r great thinker and writer ...
    keep on ...

    ReplyDelete
  9. وااااااااااااااااااااااااااو دي تحفه اويييييي
    انا مبسووووووووووووووووووووووط
    انا لما قريتها اتبسط :D :D :D

    ReplyDelete