Tuesday, September 20, 2011

النجم شخصيا؟

مفهومنا عن النجومية مفهوم غريب شوية..وأقصد بغريب إنه مالوش معايير قياسية (حلوة الحتة دي) تُحكم على مدي نجومية واحد من عدمها..
فيه نُجوم فُقرا ونجوم أغنيا..بيفيدوا مجتمعاتهم بطريقة مباشرة أو غير مباشرة..بيعملوا شغلانات صعبة أو سهلة..شكلهم حلو أو لأ..مافيش حاجة محددة..

وزي ما النجومية كان بيُعبَر عنها قبل كده في العلماء والمخترعين والمفكرين وزاد عليهم الممثلين والمغنيين ولعيبة الكورة..بدأت دلوقتي صورة مختلفة من النجومية تتضاف على النجوم دول..

وبنسمع كتير جُمل زي: "عارف مين عمللي  follow النهاردة على تويتر؟"..مصحوبة غالبا باسم نجم من النجوم كان حظ صاحبنا حلو إنه يقع عليه الاختيار في إن حد مشهور ومعروف وناس كتير بتتابعه وتقراله على تويتر يكون شخصيا بيتابعه..

من أسبوع بالظبط قابلت واحدة من الراهبات اللي كانوا بيدَرّسُونا ويشرفوا علينا في المدرسة..أنا سبت المدرسة دي من أكتر من 21 سنة! واستغربت إني أشوف الراهبة دي وإنها تقف وتسلم علىّ وتفتكرني بالاسم وتسأل عني وعن إخواتي بالاسم..

أنا عارف إن ده تحدّي صعب.. خصوصا لما الطبيعة تكون مش بتساعد إنك تفضل محتفظ بشكلك اللي كنت عليه وانت 10 سنين! :)  خضار العينين بيغمق طبعا :).. واللون الأصفر للشعر بيروح (في حالتي الشعر نفسه كمان بيروح) وهكذا! :) :) ..لكن افتكرتني..

إحساس رهيب إن النجم يفتكرك..إن حد مشهور يعرفك..إن واحد مهم يشجعك..


بس اللي كمان اكتشفته إن أنا وانت نجوم..نجوم لناس تانية..نجوم في أماكن تانية..ناس كتير بتحكّي وتقول: "عارف مين عمللي  follow النهاردة على تويتر؟" وبيبقى السؤال دي مصحوب باسمك انت!

في حياتك ناس بتبصلك على إنك عالي ومشهور..نجم..
يمكن الناس اللي بتقدملك خدمات؟ يعني مثلا سواق التاكسي أو الميكروباص؟يمكن بنت أخوكي؟ أخوك الصغير؟
الطلبة بتوعك؟ فريق العمل اللي انت بتديره في الشغل؟ حارس العمارة اللي ساكنين فيها؟
ممثل خدمة العملا على التيليفون؟ طيار الديليفري؟ المضيفة في الطيارة؟ السباك والكهربائي اللي بيصلحلك أو يركبلك حاجة؟

كل دول ناس شايفينني نجم! تخيل؟ كل دول شايفين فيك حد مهم..حد بيفهم..حد يتمنوا رضاه في معظم الأوقات!

الإحساس اللي كان عندي لما الراهبة دي سلمت بحرارة..والإحساس اللي عندك لما حد مهم عمللك follow  شبه جدا الإحساس اللي عند حارس العمارة لما بتقول له: "صباحك فل..بأتبسط لما أشوفك الصبح.." (تخيل رد فعله طول اليوم)..
أو لو عزمت على اللي بيجيبلك طلبات على القهوة إنه يقعد معاك انت وأصحابك وتعزمه على شاي بالنعناع..
أو لو امتدحت ممثل خدمة العملا على ذوقه أو سرعة الخدمة..أو لو لعبت مع بنت أختك لمدة ساعة..أو لو قلت جملة حقيقية من قلبك تعرّف فيه عامل في المطعم إنك بتيجي المطعم ده بالذات عشان الخدمة الممتازة..

في إيديك تخللي يوم حد تاني من أجمل الأيام..
 
ناس كتير شايفاك نجم!
دوّر على ال fans  بتوعك.. ابتسامة أو تعليق حلو أو كلمة تشجيع ممكن تقلب كيان بني آدم خصوصا لو جاية من قلبك يا...يا نجم! :)

7 comments:

  1. مقاله اخرى لك استمتع بقراءتها.. تسلم ايدك

    ReplyDelete
  2. by the way she's my star too :) مكنتش مصدقة نفسي لما سلمت عليل باسمي مع ان برضو شعري الاصفر و عنيا الخضر اسودوا !!!!! بس المحبة اللي فقلوبهم بتديهم قوة ذاكرة خارقة للطبيعة بيها يكونو سبب لفرحت اجيال ربوها علشان هما فى يوم من الايام كانو ستار لبنت صغنونة زيى ..... بجد موضوع رائع فكرتني بعنيا الخضرا :)

    ReplyDelete
  3. موضوع الشعر الأصفر اللى بيقع والعنين الخضرا اللى بتستوى وتقع أو بتسود دا كله بسبب الحوادث. معلش كل الناس قبل الحادثة بتبقى مختلفة.

    المقالة دى فكرتنى لما دلوقتى وبعد فاصل طويل جدا من الزمن بشوف ناظر مدرسة إبتدائى ماشى فى الشارع وتخيل إنه بيبقى فاكرنى وبيوقفنى علشان يسلم على. ياااااااااااااااا على الإحساس.

    ولا لما تلاقى حد تعرفه بيحكلك عن موقف مر بيه وهو بيعمل مقابلة فى مكان شغل جديد واللى بيقابله بيحكيله عن الناس اللى شغلت الوظيفة دى قبل كدا ويفتكر حد بعينه ويشكر فيه جدا تخيل بقى لما يطلع الشخص اللى بيتكلم عنه دا هو أنت؟ بجد شعور مختلف من ناس اشتغلت معاهم فترة ومشيت بعد كدا يفضلوا فاكريناك ويحكوا عنك.

    المواقف اللى زى دى بجد بتفرق معايا جدا وبتأكدلى إن ربنا مش بيضيع حق ولا مجهود حد وأنه لو فى حد متضايق منى مع إنى والله عمرى ما قصدت اضايق حد إلا إن فى كتير جدا بيفتكرونى زى الراهبة اللى كانت بدرسلك بالظبط.

    ReplyDelete
  4. ماجد
    الصورة الجديدة اللى هنا على البلوج مختلفة تماما بيتهيألى إنها قبل الحادثة صح؟

    ReplyDelete
  5. النوت جامدة اوي وفعلا كلامك صحيح زي ما انا شايف نفسي نجم جدير بالمتابعة من غيري غيري نفس الحكاية لما انا باكتم بيه واحسسه باهميته كده باحط لينك في دماغه لما بيدوس عليه هو او غيره بيفتركني بحاجة كويسةهو نفسه بتوصله العدوى بيحس ان نجب وجينات الكاريزما بتشتغل جواه وحقيقي النجومية عطاء مش اخد وبس وبعد النوت دي انا قررت انك تكون نجمي المفضل ومنتظر منك اكتر من كده وربنا يوفقك
    مجدي عزمي محامي وقاص

    ReplyDelete
  6. وااااااااااااااااااااااااااااااااو
    مؤثره جدااااااااا انا عايزه اتعود اعمل ده
    اوقات كتير بابقي عايزه اعمل كده لكن مش بقدر
    شكرا علي البوست
    يا د ماجد جميييييييل اويييييييييييي :D :D

    ReplyDelete
  7. Great article and very true. I just got the chance to read it.Better late than never. Thanks Maged

    ReplyDelete