Saturday, December 12, 2015

سيبك

مع نهايات السنة أو قبل أعياد الميلاد أو مع بدايات سنة دراسية جديدة ساعات كتير بنبتدي نفكر في حاجات جديدة نعملها، أو نتحمس لمهارات نتعلمها، عادات صحية أكتر، شغلانة جديدة وهكذا.. وغالبًا بيكون أسهل شوية إننا نقبل إننا محتاجين ’’نضيف‘‘ حاجة جديدة لحياتنا الوظيفية أو الاجتماعية عن إننا نقبل فكرة احتياجنا إننا ’’نسيب‘‘ حاجة معينة.. to let go زي ما التعبير الإنجليزي بيقول..

فكرة إننا نسيب حاجة متشبثين بيها فكرة صعبة.. مش بنفس سهولة إننا نبتدي حاجة جديدة أو نتبنى فكرة نضيفها للي عندنا.. إننا ’’نرمي‘‘ حاجة مش محتاجين، أو ’’نتخلى‘‘ عن حاجة متعودين عليها، أو ’’نبطل‘‘ عادة سيئة ساعات بتكون أصعب بمراحل من إننا ’’نشتري‘‘ جديد أو ’’نزود‘‘ أصحاب أو علاقات أو مهارات..

حوالينا ناس مش عارفة تـ  let go.. مش عارفين يسيبوا بلد هاجروا منها من سنين.. توقيتاتهم متشقلبة بحسب توقيتات البلد الأم، مش بيتابعوا غير السياسة والظروف اليومية والشائعات والحكايات والبرامج بتاعة بلدهم الأصلية.. مش بيقابلوا أو بيصاحبوا غير ناس من بلدهم الأصلي، ويمكن بالعافية بيتكلموا مع أي حد تاني في البلد الجديدة..


حوالينا ناس سابوا شغلهم بس ’’ما سابوهوش‘‘.. لسة متعلقين بأخباره، ولسة متابعين مين بيقول إيه.. ناس اتطلقوا لكن لسة ’’مشبوكين‘‘ بالعلاقة القديمة..

حوالينا ناس اتجوزوا بس مش عارفين يسيبوا العزوبية.. متجوزين اسمًا لكن ما حدش قالهم إنهم ما بقوش عُزاب... ناس خلفوا لكن ما سابوش حياة ’’اللا-أطفال‘‘..

زي ما أنا بأحتاج كل فترة إني أقيم الحاجات اللي محتاج أعملها، والخطوات اللي محتاج آخدها، كمان بأحتاج من فترة للتانية أقيم الحاجات اللي محتاج أسيبها.. الكراكيب اللي محتاج أرميها.. الحاجات اللي ما باقيتش مناسبة إني أحتفظ بيها.. على أساس إني ’’يمكن يوم أحتاجها‘‘..

كل أم وأب محتاجين ’’يسيبوا‘‘ أولادهم في مرحلة.. يتخلوا عن فكرة إنهم ما ينفعش يعيشوا من غير بابا وماما.. لكن ’’السيبان‘‘ ده قرار.. مش بييجي لوحده.. محتاج الواحد يبص على علاقاته ومفاهيمه وكراكيبه ويقرر يسيب إيه ويتخلى عن إيه عشان يتحرك لمرحلة جديدة..

أخاف أكون بأتحرك ناحية النضج وأنا لسة واخد الطفولة معايا.. وأتحرك ناحية الجواز والخلفة وأنا واخد معايا العزوبية.. وأتحرك ناحية نضج أولادي وأنا مش عايز ’’أطلِقهم‘‘..

البدايات الجديدة محتاجة كمان ’’تقفيل حسابات‘‘ قديمة.. وكل صفحة بتتقلب بيكون أوقات كتير معاها اختيار إن صفحة قديمة تكون بتختفي..

محتاج أفكر نفسي.. ’’سيبك‘‘

4 comments: