Saturday, September 12, 2015

ناقص ملح


احتياجي إني أحس بأهميتي وتأثيري ممكن يخليني أتمنى كذا حاجة: ممكن أكون بأحلم إني أكون مصدر إلهام وتغيير وتأثير قوي على اللي حواليَّ.. أكون قيادي ورائد ومُلهم.. أكون بأدخل مكان أقلبه من كُتر الكاريزما وقوة الشخص اللي عندي..


لكن ممكن على الناحية التانية إني أحلم إن تأثيري يكون مختلف.. تأثيري ما يكونش ملحوظ.. لكن اللي يكون ملحوظ غيابي! لو موجود ممكن ناس كتير تحس إن ما فيش حاجة كبيرة حاصلة.. ما فيش لا إلهام، ولا تأثير عظيم ولا أي حاجة.. لكن يكون الفرق هو الإحساس إن "فيه حاجة ناقصة" لو أنا مش موجود..


بنحس بالأكل اللي ناقصه ملح.. الملح نفسه مش جذاب ولا حاجة.. لكن إحساس إن الأكل "عادب" أو "عادم" (اللي بيقولوا عادب بيقولوا عشان زي "عذْب" يعني مش مالح، واللي بيقولوا عادم بيقولوا عشان زي "عديم الطعم")، المهم الإحساس ده هو اللي ممكن "يبْسِط" الملح لو جاز التعبير!


ما بنسمعش عن حد "بيحب الملح" في نفسه كده.. ما فيش حد بيتغذى على الملح وبس، ولا بيِشْعِر في جماله وطعامته.. لكن شفنا مواقف كتير "باظت" عشان شوية ملح.. خناقات كتير واختلافات ضخمة كان ممكن تفاديها "لو الشخص المناسب" موجود.. الشخص ده مش أشطر ولا أذكى ولا أحكم واحد.. ومالوش أي جاذبية.. غير بس إنه "بيُظبط الطعم".. معاه كل حاجة تحسها في مكانها..


يمكن أكون مش بأحب ولا بأكره الملح.. أصله مش حاجة تتحب أو تتكره في ذاتها.. لكن بأحب الناس "الملح".. بأحب الناس اللي "بأفتكرهم" لما اليوم يكون "ناقصهم".. لما اللمَّة تبقى "عادية" من غيرهم.. يمكن لو موجودين ما أكونش حاسس بإحساس مختلف.. وقت غيابهم بس هو اللي بيبيِّن قيمتهم..
 
الورقة اللي موجودة على علبة الملح مش بتقول أي حاجة عن طعامة الملح نفسه، لكن كل اللي بتقوله إنه بيدِّي طعم للأكل، الطعم ده مش طعمه هو! لكن طعم الأكل نفسه.. اللي غالبًا مش هايتاكل لو ناقص ملح..

9 comments:

  1. عجبتني قوي :)
    استمر في الهامنا كده :)

    ReplyDelete
  2. جميلة فعلا وجديدة تفتح المخ نحو اشياء خافية عنا

    ReplyDelete
  3. Aiih el2aw3a di !! You made me think a lot about " salt " in my life.
    Great post.Thanks Maged
    N

    ReplyDelete
  4. روعة .. أنتم ملح الأرض :)

    ReplyDelete
  5. رائعة يا فنان
    بجد روعة
    تعيش وتعلمنا

    ReplyDelete
  6. رائعة يا فنان
    بجد روعة
    تعيش وتعلمنا

    ReplyDelete
  7. الله عليك و على افكارك ... جميلة يا دكتور .... عزه عارف

    ReplyDelete