Saturday, February 21, 2015

حد طلب رأيك؟

الصوم والعزلة وأعمال الخير وممارسات التأمل في النصوص المقدَّسة وغيرها من ضمن الحاجات اللي ناس كتير بتعملها على مستوى العالم ومن خلفيَّات دينيَّة مختلفة، والغرض منها عادةً متشابه: تدريب النفس على تمرينات تقوِّيها وترجَّعلها ال focus مرَّة تاني على الخالق، بحيث إن التركيز على الذات يقل.

وعلى الرغم من صعوبة الكتير من الممارسات دي إلا إن في رأيي الممارسات الأصعب هي اللي فيها الواحد المفروض "مايعملش حاجة" مقابل الممارسات التانية اللي ممكن الإنسان فيها "يعمل" خير أو "يدفع فلوس" للفقرا أو "يدرس ويقرا".. الصوم مثلًا صعوبته في إنَّك المفروض "ماتاكلش" (فتلاقي أغلبنا برضه بيفضل تركيزنا على الأكل على اعتبار إننا مش بنقدر ننسى الحاجة اللي المفروض "مانعملهاش")..

إلا إني ساعات بأشوف إن أصعب تدريب هو تدريب الصمت.. في التدريب ده بيتخلَّى الإنسان بإرادته عن حقُّه في الكلام، حقه في التعبير عن نفسه، حقه في مناقشة الأفكار وعرض وجهة نظره.. وعلى الرغم من إن المقصود غالبًا من التدريب ده هو إن الواحد يقضي فترة طويلة مش بيتكلِّم ولا بيرد على تليفونات ولا بيتواصل، إلّا إن فيه بُعد تاني في فكرة الصمت دي وفيها الواحد بيدرَّب نفسه على إنّه ما يقولش رأيه إلا لو اتسأل.. تحدِّي كبير!

يعني يبقى كل اللي قاعدين بيتكلموا عن موضوع في صميم تخصصي (حلوة صميم دي!) لكن أقرر إني أسمع وما أتبرَّعش بإني أقول إيه الصح وإيه الغلط طالما الموضوع مش موضوع حياة أو موت.. صعبة جدًا.. في السياسة أو في الاقتصاد أو في ال business وغيرها.. بنقاوم إغراء إننا "ننصح" و"نصحح مفاهيم" و"ندِّي رأينا كمتخصصين".. وأعتقد إن الاتضاع اللي ممكن نتعلمه من موضوع زي كده يستاهل المجهود..

جزء من التحديات الموجودة قدامنا كبشر بيتفسَّر في فكرة المحدودية، ولإننا محدودين فاكرين إننا ممكن نتغلب على المحدودية دي ونـ control الناس والمناقشات والآراء..

كل ما بتيجي الفرصة للتدريب ده بأحاول أعمله، لكنه صعب قوي! واللي شغال في التدريس بيبقى الموضوع يمكن أصعب وأصعب لأنه في معظم أوقات شغله بيكون موجود في وضع إنه هو اللي عارف كل حاجة واللي حواليه "بيتعلموا منه"..

اختياري للسكوت لما ما أكونش عارف الإجابة هو اختيار منطقي.. واختياري للسكوت لما أكون بأحاول أقاوم إغراء إني أهين حد هو برضه اختيار محمود.. لكن أعتقد إن اختياري السكوت لما أكون عارف الموضوع ومتأكد منه ومتخصص فيه هو اختيار بيكسر جوايا جزء ولو بسيط من محاولات التحكم في الدنيا..

أقول رأيي بمجرد ما يكون عندي رأي واثق فيه؟ ولَّا أستنَّى وأقول رأيي بس لما حد يطلبه؟

5 comments:

  1. This comment has been removed by the author.

    ReplyDelete
  2. It appears that we know it all, express our opinion often. While the real expert, who studied the subject all their lives, have no chance. Upside situation.

    ReplyDelete
  3. Yes, yes, yes. One of the most difficult challenges! Will be working on it!

    ReplyDelete
  4. طب فين المشكله. ما انا اقول رايي ببساطه طالما اني ده رايي وعارف اني مش افضل من الاخرين وكمان بسمع رايهم كويس. انا شايف هي دي التلقاءيه. التمحور حول الذات هو اني اسكت واعمل نفسي مش عارف. بس انا عارف اني عاوف. يعني قال بتواضع. طيب ما انا ةده سبت الموضوع الاصلي وركزت فس نفسي.

    ReplyDelete