Tuesday, March 18, 2014

مافيش أمل!


قولوا يا بختنا 
– يا بختنا يا بختنا
قد إيه كلنا 
– كلنا كلنا
فرحانين إننا.. اتولدنا بنات

مقطع شهير غنته سعاد حسني في حلقة من مسلسل هو وهي زمان.. زمان آه! غالبا لو شِعر شبيه بده اتكتب النهاردة هايُصنف "شعر فضائي" أو "شعر غير واقعي" أو "شعر كاذب".. يا بخت مين؟ البنات؟!

مُتأزّم بشكل سخيف اليومين دول من كل أحداث التحرش وبكل المناقشات والتحليلات والمقترحات.. يا ترى البنات والسيدات في بلدي "فرحانين إنهم اتولدوا بنات"؟.. أعتقد، ولمجرد محاولة إني أكون عادل، أنا شايف إن ظلمهم ظلم بيّن، بدءا أصلاُ من استخدام كلمة "يتولد" سواء "للولد" أو "البنت" على اعتبار إن "الأساسي" و"العادي" وال default هو "ولد"! مش معقول يعني نقول "يتولد" لو ولد و"تتبنت" لو بنت!

ومع السخافة المعتادة اللي بقينا مش بنشوف فيها غرابة لما بنشوف واحد بيلوم المُتحرش بيها (حتى لو اللوم شكله شيك وحيادي وعلى مبدأ "أنا بس خايف عليها وبأقول إنها لازم تلبس لبس مناسب") بقينا كمان بنشوف تلميحات بما معناه إن الراقصات عادي جدا إن الناس تتحرش بيهم, وإن اللي بيشتغلوا بالجنس "يستاهلوا" الشباب يتحرش بيهم.. فعلا؟

بقينا نتريق على الشباب اللي لابس لبس "غير مألوف" على إنه "شبه البنات".. بقينا لما نمسك متحرش بنشتمه "بالأم"! بقينا بنخطط حياة بناتنا وأخواتنا البنات وأمهاتنا بحيث يكون فيه حد هايوصلهم ويستناهم وإيه التاكسي اللي يركبوه.. بقينا نقرا عن نصايح من "الطب الشعبي" عن إزاي البنت تضرب المتحرش أو إيه اللي المفروض تكون شايلاه في شنطتها إلى آخره!

وزي مانكون فجأة اكتشفنا إن فيه مخلوق كامل اسمه الأنثى! موجود معانا في المجتمع.. عايش معانا.. بيذاكر ويجتهد ويشتغل ويفكر.. بيربّي ويحب ويسمع مزيكا ويسوق ويلعب رياضة.. زي مانكون فجأة اكتشفنا إن المخلوق اللي بنعامله "كضيف" موجود "مؤقتاً" كده هو صاحب مكان.. زي مانكون اكتشفنا إن "الحلول المؤقتة" ومحاولات إننا "نقلل خساير الضيف" هي محاولات فضائية.. محاولات تدل إن فعلا إحنا مش شايفين الأنثى.. مش معتبرين الأنثى كيان من أساسه.. الموضوع أعمق من مجرد رغبتنا كذكور في التحكم والسيطرة وفرض يلبسوا إيه ومايلبسوش إيه! الموضوع إننا مش حاسين إنهم موجودين..

الأنيل إن المُشرّع ذكر ومنفذ القانون (لو بينفّذ يعني) ذكر برضه ومعظم المسئولين وصناع القرار ذكور لقوا إن "الأسهل" إن الكيان الموجود ده يكون "ضيف" لطيف رقيق جميل.. وبس! التحرش اللفظي مش هو بداية التحرش.. أعتقد إن التحرش بيبدأ جوة البني آدم اللي بيشوف في اللي قدامه "شيئ" مش إنسان..

وقت بدايات فترة دراستي كان "أمل وعُمَر" هم الشخصيتين الأساسيتين في كتاب القراءة.. وطبعا كل صفحة كان فيها جملة واحدة كده من كام كلمة.. "أمل تلعب بالكرة".. "عُمَر ذهب إلى الجُرن" وهكذا.. كانت أيام لطيفة..

الظاهر كده إن الدنيا اتغيرت شويتين!.. أنا الحقيقة حاسس إن المجتمع مش شايف غير "عُمَر".. من وقت للتاني يظهر صوت يساند ويشجع ويحاول يحمي "الضيف" ده.. "السايح" ده.. اللي جاي يقضي فترة صغيرة في مجتمع "مش مجتمعه".. "مش مصمم عشانه".. أصل الشباب متأخر في الجواز.. أصل الشوارع زحمة.. أصل العباية بكباسين.. أصلها عاملها شعرها برتقاني!..

الظاهر إن مجتمع الصعيدي والبحرواي ومجتمع الفلاح ورجل الأعمال والموظف بدأ يتغير.. مجتمع "أمل وعُمَر" بدأ مايبقاش فيه غير "عُمَر".. لأني بصراحة بصراحة وخصوصا في موضوع التحرش ده مش شايف أي "أمل"!


4 comments:

  1. أول مرة تكتب بوست ينتهي نهاية سلبية أو فيه روح سلبية من اصله!!
    أنا كدة قلقت بجد .. مش علي التحرش.

    ReplyDelete
  2. This is one great article. The ending is as brilliant as the rest. Equal rights for all, protected by the government, religion society, and neighbors, the people themselves, are the way for Democracy and freedom for all.
    "أمل" needs to collect all women, military, police, judges, and religious people to bring these issues up to the country.
    Thanks Maged

    ReplyDelete