Saturday, January 26, 2013

قمر تسعتاشر

قليلين اللي ممكن مايشوفوش جمال وحلاوة في قمر أربعتاشر..زي النهاردة كده.. يوم كل شهر بيبان فيه أروع شكل للقمر للدرجة اللي فيها بنوصف حاجات كتير وناس كتير حلوة بإنهم ولا قمر أربعتاشر..

لكن كتير مننا بينسوا إن قمر أربعتاشر هو نفس القمر.. نفس القمر بتاع يوم خمسة ويوم تمانية ويوم خمستاشر.. يمكن بنشوفه مختلف يوم أربعتاشر.. يمكن وضعه بالنسبة للأرض والشمس وقد إيه منه بيبان لنا هو اللي بيحدد جماله بالنسبالنا..

أتمنى إني أفضل أشوف مراتي جميلة حتى بعد ما جمالها الشكلي يبان كأنه بيروح.. أتمنى أقدر أشوف في ابني اللي راجع من المدرسة بدرجات وحشة إنه مجرد يوم للقمر غير يوم أربعتاشر.. يوم أنا اللي مش شايف جماله.. يوم هايلف ويرجع تاني ليوم أربعتاشر وأقدر بنظرتي المحدودة أشوف الجمال والحلاوة كاملين مرّة تاني..

بلدنا جايز تكون عاملة زي قمر تسعتاشر.. كانت حلوة.. كانت حلوة قوي.. كانت لامّة عيالها فيها وكانت العين عليها لوقت طويل.. كانت في يوم قمر أربعتاشر.. كانت في يوم التاريخ والحضارة والنضافة.. كانت في كذا يوم التسامح والتنوع والجمال والموضة.. كانت ملجأ لناس كتير.. كانت أمان وجو رائع.. الحاجات دي مااختفتش.. الحاجات دي ماراحتش..

كل اللي أتمناه إن الشهر يلفّ بدري.. ويوم أربعتاشر ييجي تاني.. وأرجع أشوف ابني متفوق وبيعمل اللي نفسه فيه.. أرجع أضحك على أيام كنت فاكر إن القمر شكله مش قد كده.. أرجع ألوم نفسي على ضيق أفقي ونظرتي المحدودة اللي نسيت إن يوم أربعتاشر جاي تاني..

كل مرة هأشوف قمر أربعتاشر مش بس هاأشوف منظر جميل.. لكن هاأشوف لمحة من جمال موجود في القمر على طول.. وبيختار بس يفكّرني مرة في الشهر بإن الحلاوة مش بس في اللي الواحد شايفه قُدّامه.. لكن الحلاوة في اللي مصدق إنه موجود..

القمر قمر.. قمر أربعتاشر أو ستّاشر أو حتى قمر تسعتاشر..

9 comments:

  1. العين بتعشق كل جميل لكن مش بنركز مع حالات الجميل دا دايماً بنركز معاه لما بيكون جميل ،، لفته حلوة يا ماجد

    ReplyDelete
  2. So beautiful a thought that it brought both a smile & a tear. Bless that thought descending from the luminous, delicate queen of the sky & most inspiring sphere of the night. Your thoughts tonight were of moondrops! Thank you.

    ReplyDelete
  3. جميل .. مازلت بحبها وبدور على جمالها :(

    ReplyDelete
  4. ...الله عليك...

    ReplyDelete
  5. Great article, fantastic explanation. Thanks Maged

    ReplyDelete
  6. واضح ان مقاييس الجمال عندنا فيها لبس. لأن فى نفس الوقت اللى انت بتشوف فيه القمر دا قمر تسعتاشر فى ناس تانية فى نفس اللحظة شايفاه قمر 14 ونفسها ان الزمن يتوقف عند اللحظة دى .بس المشكلة يا ماجدان فيه اشياء لما بتتغير مبترجعش لحالتها الاولى يعنى عشاق ايرن قبل الثورة فقدوها للابد وعشاق مصر الملكية نفس الشئ . الا لو صدقنا الامل فى اغنية محمد منير:ان غاب قمر مليون قمر طالع

    ReplyDelete
  7. امممممممممممم الهمتنى انى اكتب رسالة لخطيبى :) بنفس المعنى دة
    صح القمر قمر مهما كان شكلة

    ReplyDelete
  8. حتى نفسى وانجازاتى وقبولى لنفسى ممكن ذى القمر ليه وجوه كثيرة بعضها مضئ وواضح وبعضا خافت ضعيف

    ReplyDelete