Saturday, January 5, 2013

سونار



طمنني يا دكتور
اتطمني يا مدام.. عندي ليكي خبر هايل
آنسة من فضلك..
آنسة؟ طب عندي ليكي خبر زي الزفت!


معجزة؟ معجزة إيه؟ لأ يا عم.. بلاها المعجزات اللي محتاجة شرح دي.. المعجزات اللي ماحدش هايصدقها..

أكتر من نص سكان الكرة الأرضية بيجلّوا ويقدروا ويحترموا السيدة العذراء والدة السيد المسيح.. وسواء مسيحيين أو مسلمين إلا إن فيه مكانة خاصة في القلوب لبنت وافقت إنها تكون بتستقبل معجزة من عند ربنا.. لكنها معجزة محتاجة تبرير وشرح.. معجزة مكلّفة مش بس في آلام حمل وأوجاع مسئولية لكن كمان في نظرات غريبة من ناس عارفة إن مريم ماكانتش متجوزة وإن فكرة إنها تبقى حامل من غير جواز هي فكرة غريبة ومش مقبولة..

الأيام دي وقت احتفال الشرق بعيد ميلاد السيد المسيح.. ومع التركيز المنطقي على الطفل المولود اللي جه برسالة المحبة والسلام للعالم كله ماينفعش الناس تكون بتنسى التضحية اللي قدمتها السيدة العذراء..

الموضوع مش ببساطة إن فتاة عادية بقت حامل من غير جواز ومنها جه السيد المسيح.. الموضوع أكبر من كده.. ده واحدة كانت مستعدة إن المعجزة تحصل من خلالها وإن رسالة السلام توصل عن طريقها حتى لو دفعت التمن استغراب الناس وتساؤلاتهم ونظرات شك في عينيهم..

والنهاردة وأنا متوقع معجزات في حياتي وعلاقاتي وبلدي وعيلتي غالبا مع كل معجزة بتيجي مسئولية.. بيبقى فيه تمن.. مش كل المعجزات سهلة وبسيطة وتخلي الناس تنبهر وتصقف.. معجزات كتير "بتكسف".. معجزات كتير ناس بتتمنى إنها ماتحصلهمش..

مع تمنياتي لمعجزة تحصل في حياتي سواء على المستوى النفسي أو العلاقاتي أو الجسماني أو يمكن على المستوى الاقتصادي في بلدي أنا محتاج إني أدرب نفسي إن عليّ دور ومسئولية في استقبال المعجزة.. مش كفاية إني أكون مخلص وأمين في صلواتي ودعواتي.. لكن التكلفة مرات بتبقى كبيرة.. ويمكن فيه علاقة بين حجم التكلفة وحجم وتأثير المعجزة..

المعجزات اللي ممكن تحصل في حياتي وفي عيلتي وفي بلدي يمكن تكون على الأبواب.. بس منتظرة إني أكون مستعد وعايز أدفع التمن.. ويمكن أفضل حاجة أعملها وأنا منتظر معجزة هي إني أجهّز وأدرّب نفسي إني أكون على قد المسئولية..

7 comments:

  1. عجبنى التعبير "على المستوى النفسي أو العلاقاتي أو الجسماني"

    بجد نفسى تحصل المعجزة فى بلدى ومستعدة أعمل أى حاجة فى سبيل إن المعجزة دى تححق

    ممكن تقولى أجهز وأدرب نفسى إزاى وعلى إيه؟

    قول وأنا أقول على طول

    ReplyDelete
  2. فعلا يا ماجد حقيقي جداً الكلام ده
    "يمكن فيه علاقة بين حجم التكلفة وحجم وتأثير المعجزة.."

    ربنا يفتح عليك يا صديقي :)

    "آنسة؟ طب عندي ليكي خبر زي الزفت!"
    عاجباني جداً :)))

    كل سنه و أنت سالم .. على رأي الأردنيين

    ReplyDelete
  3. يارب المعجزة تحصل و لو اننا لازم نكون جزء من المعجزة دى , نعمل اللى علينا عشان مصر و عشان نفسنا كمان و كل سنه و انت طيب :) بوست جميل

    عزه عارف

    ReplyDelete
  4. Super M you forgot to mention me,,
    you made me notice that the miracle is already here but waiting my confirmation !
    (Y)

    ReplyDelete
  5. منتظرة نفس المعجزة في حياتي وفي مصر :)

    ReplyDelete
  6. امييييييييييييييين شجعتني جداااا

    ReplyDelete