Saturday, January 19, 2013

النور جه


أفلاطون ليه تشبيه مشهور قوي بيوصف فيه حال الإنسانية وبيربطها بالفلسفة أو المعرفة والاستنارة.. التشبيه بيوصف مجموعة من الناس اتولدوا وعاشوا طول عمرهم في كهف ضيق مافيهوش نور خالص.. متربطين من إيديدهم ورجليهم بحيث مايقدروش يتحركوا.. ووشهم ناحية حيطة من الكهف.. مش شايفين أي حاجة غير شوية ضل وأشكال عشوائية بتظهر كل شوية على الحيطة اللي قدامهم..

فجأة.. واحد من الناس دي بتتفك السلاسل اللي رابطاه وبيقدر إنه يتحرك بعيد عن الحيطة دي ويخرج لمكان برّة الكهف.. وفي سكة الخروج دي بيكتشف إن فيه عالم تاني كامل مختلف تماما عن العالم اللي كانوا عايشين فيه.. بيشوف النور اللي جاي من برة الكهف واللي كل شوية كان بيخليهم يشوفوا الظلال اللي على الحيطة..

القصة بتحكي إن الراجل ده بيرجع للناس اللي كان عايش معاهم في الكهف وبيبدأ يحكيلهم عن قد إيه العالم اللي برة مختلف.. قد إيه الحبسة اللي هم فيها مالهاش معنى.. قد إيه النور اللي برة جميل.. مش بيصدقوه.. بيضحكوا عليه.. وفي أحد الروايات بيقتلوه..


الناس دي ماقدرتش تستحمل النور.. ماقدرتش تتوقع الجمال.. ماعرفتش إن ممكن اللي هم فيه يكون فيه أحسن منه.. مش ممكن يكون الراجل دي عاقل.. مش معقول يكون شاف حاجة غير اللي إحنا شايفينه ليل نهار في الكهف..

على الرغم إن مرّات كتير مش بنبقى محتاجين نُخرج من الكهف عشان نكتشف إنه فيه برّة نور.. ساعات بنبقى محظوظين إن النور شخصيا بييجي.. الأمل والرجاء والحياة والاستنارة والفهم بييجي لحد عندنا.. لكن مش بنستحمله.. بنقتله..

"النور جه" جملة بيتبسط بيها الأطفال لما يقولوها.. يمكن عشان الأطفال أقرب للبراءة والنقاء والنور مننا.. يمكن إحنا بنشوف في النور إنه بيفضح.. إنه بيكشف.. إنه بيعلّي المقاييس نلبس إيه ونتصرف إزاي لأن الناس كلها شايفانا.. في حين إن الضلمة ظريفة.. مش مهم لو شعري متلخبط أو لبسي مش مكوي..

الاختيار عندي.. لما النور ييجي أقلق وأخاف من تغيير أسلوب حياتي وأركز في كل حاجة بأقولها وأعملها وأفكر فيها.. أو مستعد إن النور ييجي ينضّف ويطهّر ويجمّل ويغيّر ويحرر.. لكن كده كده النور جه..

12 comments:

  1. الاخوان فى الكهف :)

    عزه عارف

    ReplyDelete
  2. المشكلة ان لما الصراصير طلعت م البلاعة للدنيا بقت عايزة تحول الدنيا لبلاعة كبيرة ..

    تسلم إيدك..

    ReplyDelete
  3. وأحب الناس الظلمة أكثر من النور ...

    ReplyDelete
  4. Thank you ya Maged maha

    ReplyDelete
  5. :) بجد مدونتك حلوة اوى وبسيطة اوى
    وبصراحة استفد منها انا عقدت اقرى منها كتير تشبيهاتك بسيطة وحلوة وممتعة
    تسلم ايديك بصراحة وصح لسانك

    ReplyDelete
  6. النور جه :) كلمة لسة بنقولها واحنا طوال وبار كدة وبنفرح اوى لما بيجى
    بس بصراحة احيانا بدايق انو جة برضة الضلمة حلوة فى اوقات
    بوست جميل تسلم ايديك

    ReplyDelete
  7. Very nice , simple yet deep . Thx

    ReplyDelete
  8. Very nice , simple yet deep . Thx

    ReplyDelete
  9. حلوة جدا يا ماجد :))

    ReplyDelete
  10. "النور حاء الى العالم واحب الناس الظلمه اكثر من النور لان اعمالهم كانت شريره"
    كالعاده حلوه قوى ..........استمر يا ماجد
    hala mitri

    ReplyDelete
  11. يارب النور ما يقطعش ويفضل موجود على طول
    S. El-Behairy

    ReplyDelete