Wednesday, July 4, 2012

كله كويس

لأ مش كله كويس! مش كل حاجة بتحصل في الدنيا جميلة وهييجي بعدها على طول خير.. لأ.. مش هو ده التفكير الإيجابي ولا التفاؤل..

عشنا سنين بفكرة إن "كله خبر خير".. اللي رجله تتكسر نقوله "جت سليمة.. الحمدلله إنها رجلك الشمال!".. الفلوس اللي نخسرها تبقى خدت الشر وراحت.. السقوط مايضايقناش لأ.. أصله هو بمثابة دفعة لقدام ("مثابة" دي لوحدها تدل على العبط)!

أجيال ورا بعض عشنا على أقل القليل.. أي حاجة تحصل تبقى كويسة (لأن حاجة أوحش كان ممكن تحصل).. الإرهاب؟ الإرهاب في كل دُول العالم.. مش كانوا بيقولوا كده؟.. الأمن؟ طب وإيه يعني؟ مانت ماتقدرش تمشي في نيويورك بعد الساعة حداشر وربع..
أي كلام..


الفكرة دي عششت للدرجة اللي فيها إحنا فعلا مش بنمثل.. إحنا مش بندّعي إننا راضيين.. لأ إحنا فعلا راضيين.. ونكتة "اشكر ربنا يا زفت.. بتعيّط عشان دراعك اتقطع؟ دانت أخوك دماغه طارت ومافتحش حتى بُقه بكلمة" هي أكبر تشبيه..


في الفيلم المشهور بتاع Runaway Brideجوليا روبرتس بتقوم بدور بنت كل ما معاد فرحها يقرب تبقى مبسوطة قوي وحاسة إن هو ده الشخص المناسب.. نفس الأحلام والطموحات.. نفس الهوايات والمزيكا والأذواق في اللبس.. كل حاجة متشابهة مع عريسها.. لكن يوم الفرح بتهرب.. 3 مرات يحصل الموضوع مع 3 عرسان مختلفين..

مشكلتها كانت إن ماعندهاش مشكلة.. كله حلو.. كل اللي يجيبه ربنا كويس زي مابنقول.. إذا ماكانتش نادية تبقى سوسو.. ماكانتش سوسو تبقى نادية.. ماكانتش دي ولا دي تبقى فوزية.. عادي يعني..!


أنا مش بس مش عارف أحدد حلمي وهدفي للحياة والـ mission statement  والـ mission impossible وكل الكلام الكبير ده.. ده أنا مش عارف أنا بكره إيه.. مش عارف إذا بجد بحب محمد منير ولا فاكر إني بحبه أصل كلهم بيحبوه!..

الرضا مش هو الانبساط اللي طول الوقت.. "الرضا بالقليل" مايتحسبش أبداً إلا لو اعترفت إن اللي معايا "قليل".. لو كل اللي ييجي يمشّي.. وأهو هنعمل إيه.. وأهو.. مادام العيال كويسين خلاص أبقى أنا مبسوط.. ابقى بضحك على نفسي..

اعتراف: كتير بحس إن كله كويس..

علم النفس بيتكلم عن آليات دفاعية بيستخدمها الإنسان عشان يقدر يتعايش.. فبدل ما أقول أنا مش بطيق شرب الشاي من غير سكر بس هشربه مادام ماعندناش سكر.. تلاقيني بقول "دي أحسن حاجة في الدنيا الشاي من غير سكر".. "ده السكر أصلا مضر جداً"

الفرق بين "الرضا بالقليل" و"عدم القدرة على تمييز القليل" هو شعرة صغيرة..

لو طول الوقت موافق إني آكل أي حاجة وأتفسح في أي حتة وأشتري أي لبس وإصحابي يجولي في أي وقت وأدرس أي حاجة وأشتغل أي شغلانة وأبقى مبسوط.. في الغالب محتاج أقيم شوية حاجات كتير..

وأهو.. كويس إنه مش شفيق!

7 comments:

  1. BRAVO ya Maged, I love the depth and serenity in every sentence. Thank you :)

    ReplyDelete
  2. Let us expect more from ourselves and demand more from our government.
    Fantastic article.

    ReplyDelete
  3. جميلة جداً ياماجد العمق اللي فيها والحقيقة المتوازنة اللي مش دايماً بنعرف نشفها غير لما حد يقول عنها. إنت مميز بالبعد الفكري والعمق النفسي والروحي والانساني اللي عندك

    ReplyDelete
  4. هو انا معاك فى كلامك و كلام جميل ,بس عايزه اوضح حاجة فى حاجات معينة لازم اعترف بوجودها زى ماقلت وبعدين(اقبلها ) علشان اقدر اكمل واعيش وبعد كدة لازم (احارب) عللشان الحاجة دى تتغي حتى لو هتتغير علشان غيرىر

    ReplyDelete
  5. Sooooo deep.Alarm to wake us up.Yes,you are right in every word in this
    brilliant important article.Thank you Maged.
    N

    ReplyDelete
  6. ana 2reet el post da fe wa2to ya maged !

    ReplyDelete