Wednesday, June 27, 2012

إخواني ومسيحي وسِت

سواء شائعة أو فكرة مطروحة للتنفيذ أو خبر صحيح إلا إننا لازم نقف نفكّر في حكاية إن رئيس جمهورية يعين نواب ليه واحد مسيحي وسيدة..

حُسن النية هو أغلب الاحتمالات كسبب للفكرة إلا إن الفكرة نفسها بعيدة كل البُعد عن أبسط قواعد المساواة وأساسيات الاختيارات العادلة.. ماعنديش مشكلة لو النواب طلعوا مسلمين أو مسيحيين أو لا دينيين.. سيدات أو رجال.. متزوجين أو لأ.. شباب أو كبار طالما إن طبيعة الوظيفة في حد ذاتها مش محتاجة أي من المواصفات دي..

أنا هنا مش بتكلم عن اختياري لزوجة هكون بشترط إنها تكون من نفس ديانتي ومعتقدي وخلفيتي الاجتماعية.. ولا بختار شيخ للأزهر أو بطريرك للكنيسة.. أنا بختار نائب للرئيس.. يعني يقوم بمهام الرئيس في غيابه.. يعني زي الرئيس بالظبط..

مشكلتي لا زالت في التقسيمة.. هتجيب مسيحي؟ وهتجيب سيدة؟ طب مش هتجيب نوبي؟ أو إسكندراني؟ مش هتجيب حد من ذوي الاحتياجات الخاصة؟ سيناوي؟ شمال الصعيد؟

مشكلتي في إننا فاكرين إننا كده بنِنصف فئات هُمشت لفترة طويلة بشهادتنا كلنا.. أيوة بَخَسنا حق المرأة.. أيوة ماقَدّرناش وطنيّة المسيحيين كما يجب.. لكن مش الحل إني أعمل "كوتا" أجيب فيها "أي حد" المهم يكون "مسيحي" أو "سيدة"..

مُفترَض إن رئيس الجمهورية ونوابه والحكومة يكونوا بيعملوا من أجل الكل.. مش محتاج تجيب سيدة مخصوص عشان المرأة ماتتظلمش.. أو مسيحي عشان تصريحات بُنا الكنايس.. ماينفعش في سبيل إني أعوّض فئة عن الظُلم المجتمعي إني أجيبهم يمسكوا مناصب (في أغلب الظن شرفيّة) وفي حد ذاتها مش هتقلل أو تغيّر من الظلم الواقع على الفئة دي أو غيرها.. مش عايز كمصري أخسر فرصة إن ييجي كنائب لرئيس الجمهورية "راجل مسلم" أكثر كفاءة لكن يا حرام ذنبه إنه منتمي لأغلبية عددية والنظام الجديد عايز يبقى "شكله حلو" بإنه بيختار من الأقليات العددية!..

في كتير من الحكومات في دول متقدمة بتلاقيهم يجيبوا أي سيدة سمرا تمسك منصب كبير (ويبقوا ضربوا عصفورين بحجر.. أهي ست أهي.. وسمرا..).. ويا سلام لو مُسلمة.. وقاعدة على كرسي متحرك!

القصة مش مين "يتقمص" لو ما أخدش المنصب ولا مين "هيتنطط" من الفرح بالوظيفة.. إحنا بنتكلم في مواصفات وظيفية نختار ليه الأكفأ..

كل محاولاتنا لإنصاف فئة اتظلمت في الماضي عن طريق "تمييز إيجابي" هي لازالت بتُصَنف تمييز.. السيدات والمسيحيين وكل من يمكن أن يُصنف كفئة تم التعامل معاها على إنها أقلية عددية يشرفهم إن المناصب والمسئوليات تُعطى لناس ليهم كفاءة وفاهمين في المساواة يقدروا يرتقوا بالبلد كلها بكل من فيها..

ده مش هيحصل بمجرد صورة الإخواني والمسيحي والست..

16 comments:

  1. كلام صح مليون في الميه :-) شابو يا ماجد

    ReplyDelete
  2. I think u r totally right because if they r going to choose lady like (Om Aymen) and Christian like (Gamal Assead), I would go to tahrir to say please we need Elshater instead.
    Roza Saweers

    ReplyDelete
  3. تحليل رائع ي ماجد..شكرا

    ReplyDelete
  4. تحليل ممتاز ورؤية متفتحة للصالح الوطني .. أحييك.

    ReplyDelete
  5. love it. so true, the current government in the UK did the same when they got elected, the highest number of women in high positions, now people are cursing the women who are not good enough for the job. Just put the best person and forget about everything else. Long Live Egypt

    ReplyDelete
  6. تقوية لمرض التمييز و الطائفية :(

    ReplyDelete
  7. كلام سليم

    عزه عارف

    ReplyDelete
  8. لا يمكن ان ترضى جميع الناس لاختلاف طبائعهم حتى الاديان المنزلة من فوق سبع سماوات لم يتفق معها الناس

    ReplyDelete
  9. روح يا شيخ ربنا يكرمك ويزيدك من نعيمه كمان وكمان .. انت قلت اللي كان نفسي اقوله ......... احنا مش حنرجع لبلد الصور ... صورة للرئيس وهو بيصلي.. صورة وهوا جوا كنيسة .. صورة لوزيرة امرأة .. صورة لنائب الرئيس القبطي .. مش دي اللي حتحل مشاكل الطائفية .. ولا مشاكل تهميش دور المرأة .... المشاكل دي محتاجة تغيير جذري مش مجرد تغيير صوري .... تغيير حقيقي مش تقلد مناصب عشان نضحك والصورة تطلع حلوة

    ReplyDelete
  10. Article from the heart... continue to educate. Thanks Maged

    ReplyDelete
  11. "في كتير من الحكومات في دول متقدمة بتلاقيهم يجيبوا أي سيدة سمرا تمسك منصب كبير (ويبقوا ضربوا عصفورين بحجر.. أهي ست أهي.. وسمرا..).. ويا سلام لو مُسلمة.. وقاعدة على كرسي متحرك!"

    :)))

    وأخوها شهيد ، وأمها فقيرة ، وأبوها عصامى

    ReplyDelete
  12. More than raa2e3. Howwa da el kalaam !!!
    Thanks ya Maged.
    N

    ReplyDelete